Read Banggai TOBUATAN 34 Bible Online

TOBUATAN 34 - Banggai bible

TOBUATAN 34

¹Doibundu TEMENENO bantile doi Musa, “Mangamaatimo lua ko batu bisilo pokakana domo loolukoo. Doi batudoo Yaku naikon tulisiyo bantilan-bantilan mo pokakana tukon komo daano doi batu mo lapamo ikoo pipise.

²Bato-batotobomo namodowa dowa-dowa sulano mutoliboiyo ko Bunggul Sinai tukon mangadap doiya-Ku doi bunggul bunggonodoo.

³Akiyo komeeng komiankai mo moola malaing tukon ikoo kai komo daano tambikon doi naandokai doi bunggulo. Sapi-sapi tukon domba-domba inai nabinatadikon bakoikaan bulung doi bunggulo uuno.”

⁴Maka Musa mangamaati lua kobatu bisilo koidan, tukon modowakon kooloyono dowa-dowa tuuno yana babayomo liba doi Bunggul Sinai bunggono pokakana ko TEMENENO napinalentahkon doi yana.

⁵Maka buluso ko TEMENENO doi meeng kobunom lalomo; Yana kokondong tukon Musa doi tampatoo, tukon bantilemo kosambuno mo moliyous, doiyamo TEMENENO.

⁶ Doibundu TEMENENO alon doi Musa salaano tukon bantile, “Yakumo ko TEMENENO, doiyamo ko Mian Bisa momoono monondokan noa tukon peseang. Dakuseang lobi-lobian, Yaku setia tukon aki Kumosobit nggimal.

⁷Yaku tataap seseange doi libu-libuso ko turunan tukon ompuniyo kokasalahan tukon lalim; bai komian modaano konasalah aki Kusodiiyo luwedoi nainukuman, tukon Kuukume koidan kopau-pau tukon tumbu-tumbu polong katulunan kotoluno tukon kosanggapo tobikon naporang tua nalalim.”

⁸Tempodoo koidan Musa tootuku mososuba.

⁹Konabantilano, “Temeneno, kalu Ikoo bisa-bisa pokokonoi yaku, yaku kabiyo, sanaango Temeneno malaing tukon kami. Bangsadoo takainomo motikas konoano, bai ompuniyomo komai kulokisan tukon komai lalim tukon talimayomo kami salaku Mumian susuumu.”

¹⁰TEMENENO bantile doi Musa, “Budodoiya Yaku mokubai perjanjian tukon Israel miano. Doi yanila matano salaano Yaku naikon mokubai langge-langge minasaindinggon mo akiyoon nabiasa kinubai doi antara indeemo kobangsano doi dunia. Sasaibino kobangsa naikon kitayo kolangge-langge minasaindinggon Yaku mo kubaiyo, sabab Yaku, TEMENENO naikon mokubai meeng kolangge molokis tuuk doi komuyu.

¹¹Lingiyomo koaturan-aturan Yaku mobeekene doikoo oloyo nia. Yaku naikon siikayo kobangsa Amori, Kanaan, Het, Feris, Hewi tukon Yebus doi tempo pomajuan.

¹²Inaimokai momokubai perjanjian tukon mian-mian doi lipu polinubotii, sabab langgedoo moola teali talong mokubaiyo matean doikoo.

¹³ Jadi, inaimo mokubaiyo bunodoiya, bai lopoyomo konapo balabaan-balabaan, manasemo konapo pilogot uuno tukon tapeyomo konapo lambea Asyera sudong-sudongo, yanila napopilogot.

¹⁴Inai mososubaiyo ko ilah bailon, sabab Yaku TEMENENO, daanokai Mian Bisa moaki naiyase pinokanakon tukon oilamokai.

¹⁵Inai mokubai perjanjian tukon dolipudoo tumbuno, sabab doi tempo napo sosubaan tukon mososubakon sosubakon doi yanila napilogot-pilogot, yanila naikon tobiyo komuyu, tukon komuyu naikon malaing.

¹⁶Kalu komu labuk-labuk osowaan tukon boi-boine molulubaton, yanila naikon biniduki doi boi-boinedoo sulano naotinggale Yaku maka nasosubaiyo konapo pilogot-pilogot.

¹⁷ Inai mokubai ilah-ilah doi logam tukon pososubaiyo.

¹⁸ Lamekenemo ko Lamean Roti Moakiyo ko Ragino. Buno mo lapamo Kuparentakene doi komuyu, komuyu sio pomakaan roti moakiyo koragino pitu kooloyo konakalumbit doi bituwon Abib lalomo, sabab doi bituwonoo lalomo komuyu otinggalemo ko Mesir.

¹⁹ Sasamba kopau malaneno langgongo tukon iyayon langgilo mo sinuung tumbe daanokai Koonggu,

²⁰ bai komuyu sio posoboliyo keledai napau mosinuung tumbeno tukon mososubakon meeng kodomba pauno tuuk posobolino. Kalu komuyu aki poiyase mosoboliyo, dokeledaidoo bulungo sio polotoyo. Sasamba kopau-pau malaneno langgongo sio musoboliyo. Akiyo komeengkai komian momoola lubat doiya-Ku kalu aki namababa sosubakon.

²¹ Daano noom kooloyo tuuk balimangan; inaimo balimang doi oloyo kopituno, maukai doiya doi tempo bapajekoan kai tempo bapupuiyan.

²² Lamekenemo ko Lamean Batumbeiyan gandum. Lamekenemo koidan ko Lamean Sandung Moinalatoi Loon doi napupusan kotaun, doi tempo pobapupuiyan langge-langge saono.

²³Tolu luunggon sataun sasaibino komala-malane sio nalubat sosubaiyo Yaku, TEMENENO Israel miano na Mian Bisa.

²⁴Sambunolapa Yaku siikayo kobangsa-bangsa luwedoi salaamuyu tukon Kukebelake komulipu, akiyo komeengkai komian naikon mobarani lambase komulipu doi tempo poampakonan tuuk molamekene ko Lamean Roti Akiyo ko Ragino, Lamean Batumbeiyan tukon Lamean Sandung Moinalatoi Loon.

²⁵ Doi tempo pomososubakonan iyayon motinembel, inai mososubakene kooioila mokinubai mapake ragi. Iyayon piniala mo tinembel tuuk sosubakon lamekanano ko Paskah sio nainakabus doi popokoo koidan; aki namoola daano kolabino polong modowakon kooloyono.

²⁶ Sasamba kotaun komuyu sio pomababa doi TEMENENO na Bonua mu Mian Bisa komu asi atoko tumbeno. Domba pauno sailo kai mbembe pauno aki namoola sinaang tukon tinano susuno paisuno.”

²⁷TEMENENO bantile doi Musa, “Tulisemokai dobantilan-bantilanoo, tobikon luwe dobantilanoo Yaku mokubai perjanjian tukon ikoo tukon koidan ko Israel miano.”

²⁸Sangkap kolono kooloyo sangkap kolono kopopook Musa dungol idoo podungoli ko TEMENENO, tukon konakalumbitoo yana aki nakaan tukon aki namonginum. Bantilan-bantilan perjanjianoo, doiyamo Songulo ko Mian Bisa Naparentah konatinulisan doi batu bisilo.

²⁹ Salataa Musa bulus luwedoi Bunggul Sinai babayo ko Songulo do Parentahdoo, koduduso lalaangan sabab yana lapamo posalitai tukon TEMENENO, bai Musa susuungo aki natoiyo baikon koduduso molalaangan.

³⁰Harun tukon sasaibino korayat kitayo baikon Musa lalaangan koduduso, tukon yanila matakut moloolaniyo.

³¹Bai Musa uwange yanila, maka Harun tukon sasaibino konapo katua-katua lolaniyo yana, tukon Musa basalita doi yanila.

³²Salataa doiya ko Israel miano pototongi tikumiyo yana, tukon doi yanila sasaibino Musa pelenggene sasaibino ko TEMENENO naaturan bineekon doi yana doi Bunggul Sinai bunggono.

³³Sambunolapa pobasalitai yanila, Musa tombukiyo koduduso tukon toik.

³⁴Sasamba luunggon Musa nausok doi TEMENENO na Sandung lalomo tuuk pobasalitai tukon TEMENENO, yana bukayo dotoikoo polong potobuaton. Sambuno nalapa yana mopelenggene doi Israel miano sasaibino ko TEMENENO nateteba,

³⁵tukon yanila kitayo Musa duduso mo lalaangan. Maka yana tombukiyomo koidan koduduso polong doi tempo mo lubat kalu yana basalita koidan tukon TEMENENO.