Read Banggai TOBUATAN 35 Bible Online

TOBUATAN 35 - Banggai bible

TOBUATAN 35

¹Musa pototongikene sasaibino ko Israel miano maka bantile doi yanila, “Naiyamo ko TEMENENO naparentah motuuk doi komuyu:

² Daano noom kooloyo motuuk balimangan, bai oloyo kopituno daanokai oloyo tadean, oloyo babasal mo inalaas tuuk doi TEMENENO. Indee komo balimang doi oloyo Tadean sio nainukum mate.

³Doi oloyodoo komuyu aki namoola mokoitiyo kobilat doi mubonua.”

⁴Musa bantile doi sasaibino ko Israel miano, “Bunonaiyamo ko Temeneno naparentah:

⁵Babayamo kososubakon doi TEMENENO. Indee komo tounggot konoano, sio namososubakon mosoni, perak, tukon tambaga;

⁶toik lenan alus, toik wol manampal, samelaon tukon memela; toik luwedoi mbembe buluno;

⁷domba langgilo kulito mo siname memela; kulit moalus, kayung akasia,

⁸lisison motuuk doi lampu; rampah-rampah tuuk lisison bakolobokiyan tukon tuuk kamangian mo babangi;

⁹permata delima tukon permata bailon moinatul doi kalambi efod tukon Imam Babasal napotombuki oyopo.”

¹⁰“Sasaibino komo molole mo pandoi-doi komuyu nokon sio nalubat sulano nakubaiyo sasaibino ko TEMENENO napinalentahkon doiyamo:

¹¹Sandung, ato tukon tunggupo, kait tukon lolongguno, kayung-kayung topopong, tataapon sudongo tukon soaano;

¹²Peti Perjanjian tukon kayung patanggungo, potombukino tukon toik poitolungino;

¹³meda tukon kayung patanggungo, sasaibino kololongguno tukon roti mokinaan

¹⁴lampu aino tuuk pokodiyolonii tukon lolongguno, lampu tukon naminyak;

¹⁵balabaan tampat mosuaan kamangian tukon kayung patanggungo, lisison bakolobokiyan, kamangian mo babangi; lalanse tuuk Sandung tataapono,

¹⁶balabaan tuuk sosubakon mosinua tukon kisi-kisi moluwe doi tambaga; bak tampat bakumosian tukon soaano, kadut-kadut tuuk doi basalean;

¹⁷sudong-sudong tukon soaano lalanse tataapon gerbang basaleano;

¹⁸paloosan-paloosan tukon alos-alos tuuk doi Sandung tukon tuuk doi basaleano;

¹⁹pakean kaledaan tuuk doi sasaibino koimam doi tempo napai batugasan doi Kombiang Moliyous tukon pakean motangalaas doi imam Harun, tukon napau-pau.”

²⁰Sambuno sasaibino ko Israel miano mo pototongidoo pobabandakon,

²¹tukon indee tolong komo tounggot konoano, mababa sosubakon doi TEMENENO tuuk osukupiyo ko TEMENENO na Sandung. Yanila koidan babayo sasaibino komo pinalaluu tuuk kaledaan tukon lolonggu tuuk doi imam napakean.

²²Indee tolong komo yase, mau mala-malane maukai boine, lubat mababa patalap mosoni, sumbang-sumbang, sousolut, inoon, tukon sasaibino kokaliangano koperhiasan mosoni tuuk sinosubakon doi TEMENENO.

²³Sasamba komian mo daano kona toik lenan moalus, toik wol manampal, samelaon kai memela, toik moluwe doi mbembe buluno, domba langgilo kulito mo siname memela, kai kulit mo alus, sasaibino doiya yanila sio nasosubakene dolanggedoo.

²⁴Sasamba komian mo moola mebee perak kai tambaga, sio nababayo tukon sosubakene doi TEMENENO. Bunomo doiya koidan kona kinubaiyan doi mian badaang mo daano kona kayung akasia tuuk doi limangoo.

²⁵Sasaibino koboine mo pandoi baputal mababa banang lenan mo alus maka banang wol manampal, samelaon tukon memela mo lapamo yanila kubaiyo.

²⁶Yanila koidan moputal banang luwedoi mbembe buluno.

²⁷Sasaibino kokatua mababa permata delima tukon permata-permata bailon sulano nainatur doi efod tukon potombuki oyop.

²⁸Yanila koidan mababa lamba-lamba tukon lisison motuuk doi lampu, lisison bakolobokiyan tukon kamangian mo babangi.

²⁹Sasaibino ko Israel miano tukon sanaang konoano yanila babayo kososubakon doi TEMENENO tuuk doi limang TEMENENO momaparentahkene lolo doi Musa.

³⁰Doibundu Musa bantile doi Israel miano, “TEMENENO lilikemo Bezaleel Uri napau, Hur natumbu, luwedoi Yehuda nabenseno

³¹tukon balakaatiyo yana tukon Nakuasa. Ko Mian Bisa beena yana pangalatian, pandoiyan tukon kemampuan doi sasaibino kopandoiyan kaliangano,

³²sulano namokubai anggaran mo pinalaluukon kopandoiyan, tukon kolimangano moluwedoi mosoni, perak tukon tambaga;

³³tuuk mobilasan batu permata moinatul; tuuk mobotikan kayung tukon tuuk sasaibino kopandoiyan kaliangano bailon.

³⁴Doi Bezaleel tukon Aholiab, Ahisamakh napau luwedoi Dan nabenseno, TEMENENO beena pandoiyan sulano naotunggukene yanila napandoiyan doi mian bailon.

³⁵Yanila binee pandoiyan doi sasaibino kolimang kaliangano doi mian mo pandoi bangamaati, parancang tukon mian mo pandoi motonun lenan mo alus, wol manampal, samelaon tukon memela, tukon toik bailon. Yanilakai mian mo pandoi manganggar tukon moola kubaiyo sasaibino kolimang kaliangano.