Read Banggai TOBUATAN 36 Bible Online

TOBUATAN 36 - Banggai bible

TOBUATAN 36

¹Bezaleel, Aholiab, tukon sasaibino komomolole mo malaat pandoiyan tukon pangalatian mo luwedoi TEMENENO, moola kubaiyo sasaibino komo pinalaluukon motuuk doi kubaiyano ko TEMENENO na Sandung. Yanila sio nakubaiyo sasaibino buno komo lapamo TEMENENO parentakene.”

²Musa uwange Bezaleel, Aholiab tukon sasaibino komian mo malaat pangalatian moluwedoi TEMENENO tukon komo yase motombonii, maka sumboliiyo yanila motambuune.

³Musa beekene doi yanila sasaibino ko Israel miano nasumbangan tuuk doi bangunano ko TEMENENO na Sandung. Bai ko Israel miano tataap mababa sosubakon doi Musa sasamba kodowa-dowa.

⁴Maka sasaibino komian mo molole mo kubaiyo dolimangoo

⁵popitoikene doi Musa, “Domianooila nasosubakon lobiano komo pinalaluukon tuuk doi limang TEMENENO mo parentakene.”

⁶Maka Musa popitoikene doi posaapon kobasandungan baikon mosukupo kosumbangan motuuk doi TEMENENO na Sandung; jadi komian akimo namababa oi-oila koidan.

⁷Langge-langge samba mo lapamo yanila sumbangkanggene lobiano doi nasukupan tuuk moalapayo sasaibino dolimangoo.

⁸Doibundu doi yaniladoo mopandoi tuuno doiyamo komo kubaiyo ko TEMENENO na Sandung. Yanila kubaiyo do Sandungoo luwedoi songulo kopatolo kotoik lenan moalus tinonun tukon wol manampal, samelaon tukon memela, maka nasinuji tukon domahlukoo doi surgaa modaano kokapilo timbalango.

⁹Sasamba kopatolo pokakana konaukulan; konakobulus songulolua kometer, tukon konakebelan lua kometer.

¹⁰Lima kopatolo kotoik pinotaamikon teali meeng kokadut, tukon lima kopatolo mo bailon kinubai bunodoiya koidan.

¹¹Doi lolua dokadutoo bibilo kinubai kobakaitonan luwedoi toik manampal,

¹²limakolono kobakaitonan doi suwe-suwele kokadut, sampe buno pokakana meeng kopasang.

¹³Maka kinubai kolima kolono kobangiisonan mosoni tuuk mopomeenggene lolua dokadutoo.

¹⁴Sambunolapadoiya yanila kubaiyo do Sandungoo atono luwedoi songulo meeng kotoik patolo mo luwedoi mbembe buluno.

¹⁵Sasamba kopatolo pokakana konaukulan, konakobulus songulo tolu kometer tukon konakebelan lua kometer.

¹⁶Lima kopatolo pinotaamikon teali meeng kokadut, tukon noom kopatolo bailonggon kinubai bunodoiya koidan.

¹⁷Lima kolono kobakaitonan doi kadut bibilo tumbeno tukon lima kolono kobakaitonan doi kadut bibilo koluano.

¹⁸Maka kinubai limakolono kobangiisonan luwedoi tambanga tuuk mopomeenggene loolua dokadutoo teali Sandung atono.

¹⁹Lapamo doiya kinubai kolua kopokukup tuuk tambikon doi Sandung, komeeng luwedoi domba langgilo kulito mo siname memela, tukon kobailon luwedoi kulit moalus.

²⁰Doibundu yanila kubaiyo ko Sandung pakakaso motongokokondong moloyos luwedoi kayung akasia.

²¹Sasamba kopakakaso konakatandak sangkap kometer tukon konakebelan noom kolono noom kosentimeter.

²²Doi sasamba kopakakaso kinubai lua kopapasok mo lulua, sulano dopakakasoo namoola pinotaamikon meeng tukon bailon.

²³Doi Sandung taalikon lalom kinubai lua kolono kopakakaso,

²⁴tukon sangkap kolono kosoaano luwedoi perak, lua doi yade sasamba kopakakaso tuuk doi loolua kopapasoko.

²⁵Do Sandungoo tambikon doi lembet kinubai lua kolono kopakakas,

²⁶tukon sangkap kolono kosoaano luwedoi perak, lua doi yade sasamba kopakakaso.

²⁷Tuuk doi Sandung tonggulungo tambikon doi talise, kinubai noom kopakakas;

²⁸tukon lua kopakakas tuuk doi pasuno.

²⁹Pasunodoo pakakaso pinosumbokiikon doi aino banggadudul polong tambikon doi babo. Loolua kopakakaso motukobai pasuno kinubai tukon cara doiya.

³⁰Jadi sasaibino daano koalu kopakakaso tukon sungulo noom kosoaano perak, lua doi yade sasamba kopakakaso.

³¹Maka yanila mokubai songulo lima kokayung motopopong luwedoi kayung akasia, kolima tuuk doi pakakas-pakakas doi meeng ko Sandung lisuko,

³²kolima tuuk doi lisuko bailon, tukon kolima koidan tuuk doi Sandung tonggulungo tambikon talise.

³³Kayung mo topopong doi tanga kinonoikon konakatandak pokuakon kopakakaso, luwedoi bunduno polong doi Sandungoo bunduno.

³⁴Sandung-sandung pakakaso tukon kayung-kayung mo topopongoo linapis tukon mosoni, maka kinonoikon kokulaluk-kulaluk mosoni sulano nataane kayung-kayungdoo.

³⁵Yanila koidan mokubai toik tataapon luwedoi lenan mo alus motinonun tukon wol manampal samelaon tukon memela, maka nasinuji tukon mahlukoo doi surgaa modaano kokapilo timbalango.

³⁶Tuuk dotoikoo kokotanano minokubaikon sangkap kosudong moluwedoi kayung akasia motalapis mosoni tukon bangiisonan mosoni mokinonoikon doi soaano perak mosangkap kobunggono.

³⁷Maka naminokubaikon lalanse tuuk doi Sandung tataapono luwedoi lenan moalus motinonun tukon wol manampal, samelaon tukon memela mobinubungai tukon sinuji.

³⁸Tuuk doi toik tataaponodoo minokubaikon lima kosudongo mopinosumbokiikon tukon bangi-bangiisonan. Kobundu-bunduno tukon pata-pataanino dosudongoo mo lima linapis tukon mosoni, bai lima kosoaano kinubai luwedoi tambaga.