Read Banggai TOBUATAN 38 Bible Online

TOBUATAN 38 - Banggai bible

TOBUATAN 38

¹Bezaleel mangala kayung akasia, maka mokubaimo balabaan tuuk mosuaan sosubakon. Balabaanoo kondondoongo tapanapat konakobulus tukon nakebelan 2,2 kometer, tukon konakatandak 1,3 kometer.

²Doi sasamba kopasuno babo minokubaikon tanduko mo teali meeng tukon balabaanoo. Sasaibino linapis tukon tambaga.

³Yana mokubai koidan balanga-balanga, sikoop, manggo-manggo, porok tukon bangabosan aung. Sasaibino dololonggunodoo kinubai luwedoi tambaga.

⁴Mokubaikenemo kowal moinanam luwedoi tambaga mokinalokon doi balabaan tambikon bilit, konakatandak pokuwakon dobalabaanoo.

⁵Maka namokubaikene sangkap kokulaluk tuuk doi kayung patanggungo doi mosangkap kopasuno doi yadeno.

⁶Kayung patanggungodoo nakubaiyo luwedoi kayung akasia molinapis tukon tambaga.

⁷Maka loolua kayung patanggungodoo nausekene doi kulaluk-kulalukoo lalomo doi loolua dobalabaanoo lisuko. Dobalabaanoo nakubaiyano luwedoi dopi tukon tambikon doi lalomo buang.

⁸ Bezaleel mokubai bak moluwe doi tambaga tukon koposoanino tambaga. Tambagadoo luwedoi boi-boine nasulumi-sulumi moleleaniyo ko TEMENENO na Sandung tataapono.

⁹Bezaleel pagariyo ko TEMENENO na Sandung basaleano tukon kadut luwedoi toik lenan moalus. Tambikon doi lalom konakobulus 44 kometer,

¹⁰kopataano lua kolono kosudongo moluwedoi tambaga suwe-suwele sinowaani tambaga, kobangiisonan tukon bakaitonano luwedoi perak.

¹¹Tambikon doi lembet kinubai bunodoiya koidan.

¹²Tambikon doi talise kinonoikon kokadut kona kobulus 22 kometer, tukon songulo kosudong tukon songulo kosoaan; bangiisonan tukon pataamino kinubai luwedoi perak.

¹³Tambikon doi tolopot, mo daano kotataapono, kokaduto nakebelan koidan 22 kometer.

¹⁴Doi bobo bakalinga dotataaponodoo kinonoikon kokadut, suwe-suwele konakobulus 6,6 kometer, tukon tolu kosudongo tukon tolu kosoaano.

¹⁶Sasaibino kokadut doi potikunggon kobasaleanodoo kinubai luwedoi toik lenan moalus.

¹⁷Kosudong-sudongo paalaso kinubai luwedoi tambaga, sabeakai kobangiisonan, bataamian tukon kosudongo bunduno kinubai luwedoi perak. Sasaibino kosudongo doi posaapon dobasaleanoo pinotaamikon meeng tukon bailon tukon bakaitonan perak.

¹⁸Dobasaleanoo tataapono mo babasal kinubai luwedoi lenan mo alus mo tinonun tukon wol manampal, samelaon tukon memela tukon binubungai suji. Konakobulus 9 kometer tukon kona katandak lua kometer pokakana tukon kobasalean kaduto.

¹⁹Dotataaponoo toikoo tinaan doi sangkap kosudong tukon sangkap kosoaan tambaga. Sasaibino kobangiisonan, potombuki tubono tukon bakaitonano kinubai luwedoi perak,

²⁰bai kopapasok-papasoko do Sudongoo tukon kopagalo kinubai luwedoi tambaga.

²¹Naiyamo kona tinulisan kologam mo pinake doi TEMENENO na Sandung lalomo, kona tangabosan dobatudoo molua tukon Songulo ko Mian Bisa na Parentahdoo. Daftaro kinubai luwe Musa naparentah tukon Lewi miano mobalimang doi Itamar nabakatuaiyan, Imam Harun napau komo susune.

²²Bezaleel Uri napau, Hur natumbu luwedoi Yehuda nabenseno, yanila kubaiyo sasaibino ko TEMENENO napinalentahkon.

²³Kopotomboniino, Aholiab Ahisamakh napau luwedoi Dan nabenseno, daanokai meeng kotukang pobotik, panganggar tukon potonun toik lenan moalus, tukon wol manampal, samelaon tukon memela.

²⁴Komosoni mosinosubakon doi TEMENENO tuuk Sandung Moliyous sasaibino konakadaang solloon kokilogram, tinimbang pokokonoi kotimbangan mopinake doi TEMENENO na Sandung.

²⁵ Perak mo linaat luwedoi bangaitan Israel miano koaito 3.430 kilogram tinimbang pokokonoi kotimbangan mo pinake doi TEMENENO na Sandung.

²⁶ Doaitodoo pokakana tukon oila komo bineal doi sasaibino komian mototulis doi bangaitanoo lalomo. Sasamba komian beale koolino motinantukanggon, tinimbang pokokonoi kotimbangan mo pinake. Doi bangaitanoo lalomo totulis 603.550 komian mala-malane kona umur lua kolono lobian kotaun.

²⁷Luwedoi perakoo 3.400 kilogram pinake tuuk nakinubaiyan kosakat kopaalaso do TEMENENO doo na Sandung sudongo tukon tataapon toikoo. Sasamba kopangalaso konakotoong 34 kokilogram.

²⁸Luwedoi perakoo labino, kona kadaang 30 kokilogram, Bezaleel kubaiyo pata-pataami tukon bangi-bangiisonan motuuk doi sudong-sudongo, tukon pokukupo dosudong-sudongoo tubono.

²⁹Kotambaga mosinosubakon doi TEMENENO sasaibino koaito, 2.425 kilogram.

³⁰Dotambagadoo pinake tuuk kinubai TEMENENO na Sandung tataapono pangalaso, balabaan tukon kowal moinanam luwedoi tambaga, sasaibino kobalabaan lolongguno,

³¹potikunggon kobasalean kaduto pangalaso kotataapon mo babasal, sasaibino ko Sandung papasoko tukon basaleano potikunggon.