Read Banggai TOBUATAN 39 Bible Online

TOBUATAN 39 - Banggai bible

TOBUATAN 39

¹Bezaleel tukon Aholiab mokubai pakean kaledaan luwedoi wol manampal, samelaon tukon memela, tuuk doi sasaibino koimam-imam doi tempo napai batugasan doi Kombiang Moliyous. Imam napakeyan motuuk doi Harun kinubai pokakana komo TEMENENO parentakene doi Musa.

²Efod kinubai luwedoi toik lenan moalus, wol manampal, samelaon tukon memela, tukon banang mosoni.

³Yanila motutuk mosoni bisi-bisilo tukon doibundu pinatol-patol teali banang manipi, maka tinonun teali toik lenan mo alus tukon wol manampal, samelaon tukon memela.

⁴Sambuno lapa doiya kinubai kolua koalos pokoot efod doi bengeno mo kinoitikon doi lisuko.

⁵Poboot owako motinonun alus kinubai luwedoi lolonggu pokakana maka nakinoitikon doi efodtoo sampe teali meeng koobos pokakana komo TEMENENO parentakene doi Musa.

⁶Yanila mobilas batu delima maka napokonoikene doi bingkai mosonidoo lalomo. Tukon donapo pandoiyanoo yanila botike Yakub napau mosongulo lua sambu-sambuno doi batu-batudoo.

⁷Doibundu dobatu-batudoo kinonoikon doi efodtoo aloso taalikon doi bengeno salaku meeng kopaloosan pononook naikon doi songulo lua ko Israel miano, pokakana ko TEMENENO napinalentahkon doi Musa.

⁸Bezaleel tukon Aholiab mokubai potombuki oyop luwedoi lolonggu mo pokakana tukon efod, tukon kosujianokai pokakana.

⁹Kondondoongo tapanapat mo pinaku lua, konakebelan tukon kona kobulus suwe-suwele 22 kosentimeter.

¹⁰Doi potombuki oyopoo yanila konoikene sangkap kodadalo kobatu permata. Doi dadalo komeengo batu delima, topas tukon baiduri sepah.

¹¹Doi dadalo koluano zamrud, batu nilam tukon intan.

¹²Doi dadalo kotoluno batu lazuardi, akik tukon batu kecubung.

¹³Doi dadalo kosanggapo batu pirus, yakut tukon latna cempaka. Dopermatadoo mosongulo lua kinoot tukon mosoni.

¹⁴Doi memeeng dopermatadoo binotik Yakub napau mosongulo lua sambuno salaku paloosan pononook naikon doi Israel bense-benseno.

¹⁵Maka kinubai lua korante luwedoi mosoni motulen pinatol buno alos.

¹⁶Kinubai koidan lua kokulaluk mokinonoikon doi loolua kobunduno tubono dopotombuki oyopoo.

¹⁷Maka dorante mosonidoo molua inusokon doi kulaluk-kulalukoo lalomo,

¹⁸tukon looluakon kobunduno bailonggon kinooton doi looluakon kobingkai, sampe kopotombuki oyopo moola pinotaamikon tukon taambikon doi salaano doefod alosodoo moluwe doi bengeno.

¹⁹Maka kubaiyomo lua kokulaluk mosoni koidan mokinonoikon doi potombuki oyopo, doi bunduno bilit tambikon doi lalomo kana koefod natangabosan.

²⁰Sambuno lapa doiya kinubai lua kulaluk mosoni mo kinonoikon doi tambikon doi salaano loolua koefod aloso doi bengeno, loolani kona potaamian kokoitiano adukon doi yade, doi pokoot owak bunggono luwedoi tonunan moalus.

²¹Pokokonoi tukon TEMENENO naparentah doi Musa, kulaluk potombuki oyop pinotaamikon tukon alos manampal doi efod kulaluko sampe potombuki oyopo tataap daano doi pokoot owako bunggono tukon aki natoliat.

²²Jubah mo pinake doi efod bunggono, sasaibino kinubai luwedoi wol manampal.

²³Kobulungo buango kinoonggol tukon pita motinonun sulano aki naambang mosiak.

²⁴Doi potikunggon kobibilo tambikon ade kinubai kobubungano delima saano luwedoi toik lenan moalus tukon wol manampal, samelaon tukon memela, pinoata-atanggon tukon nggiling-nggiling luwedoi mosoni, pokokonoi tukon TEMENENO napinalentahkon doi Musa.

²⁷Yanila mokubai kalambi tuuk Harun tukon napau-pau,

²⁸koidan tuala, saluan palus luwedoi lenan,

²⁹tukon poboot owak moluwe doi toik lenan moalus, wol manampal, samelaon tukon memela binubungai tukon suji, pokakana komo TEMENENO parentakene doi Musa.

³⁰Koidan kinubai kobubunga luwedoi mosoni tulen, paloosan baikon yanila lapamo inalaas tuuk doi TEMENENO. Doi bubungadoo tobotik kobantilan-bantilan “Inalaas tuuk TEMENENO”.

³¹Bubungadoo kinonoikon doi tuala tambikon doi salaano, pokokonoi ko TEMENENO napinalentahkon doi Musa.

³²Konapupusan lapamolapa sasaibino kolimang kubaiyano ko TEMENENO na Sandung. Israel miano lapamo kubaiyo sasaibino pokakana komo TEMENENO napinalentahkon doi Musa.

³³Yanila babayo doi Musa ko Sandung tukon sasaibino kololongguno, bangi-bangiisonano, kayung-kayung motopopong, sudong-sudong tukon soaano,

³⁴potombuki luwedoi mbembe langgilo kulito mo siname memela, pokukupo luwedoi kulit moalus, toik tuala.

³⁵Peti Perjanjian moinusoki looluakon kobatu tukon kayung patanggungo tukon pokukupino,

³⁶meda tukon sasaibino kololongguno tukon roti sidakan,

³⁷lampu aino luwedoi mosoni tulen, lampu-lampuno tukon sasaibino kololongguno, lisison motuuk doi lampu,

³⁸balabaan moluwedoi mosoni, lisison bakolobokiyan, kamangian mo babangi, Sandung tataapono lalanseno,

³⁹balabaan tambaga tukon kowal moinanam luwedoi tambaga, kayung patanggungo tukon sasaibino kololongguno; bak tampat bakumosian tukon soaano,

⁴⁰kadut-kadut motuuk doi basalean tukon sudong-sudongo maka paalaso, basalean tataapono mo babasal lalanseno tukon alos-aloso, papasok-papasok Sandung; sasaibino kopakakaso mo pinake doi Sandungoo lalomo,

⁴¹tukon pakean kaledaan motuuk doi sasaibino koimam doi tempo yanila nabatugasan doi Kombiang Moliyous tukon pakean mo inalaas tuuk Harun tukon napau-pau.

⁴²Israel miano lapamo kubaiyo sasaibino dolimangoo pokakana komo TEMENENO parentakene doi Musa.

⁴³Musa palesayo sasaibino tukon kitayo baikon lapamo yanila kubaiyo pokakana ko TEMENENO moparentahkene. Maka Musa balakaatiyo yanila.