Read Banggai TOBUATAN 40 Bible Online

TOBUATAN 40 - Banggai bible

TOBUATAN 40

¹TEMENENO bantile doi Musa,

²“Kekendengemo Daku Sandung doi tanggal meeng bituwon komeengo.

³Usekenemo doi lalomo ko Peti Perjanjian koantoko Songulo ko Palentah tukon konoikenemo kotoik poitolungi doi salaano.

⁴Abesemo komeda tukon lolongguno. Usekene koidan kolampu aino tukon konoikenemo kolampuno.

⁵Abesemo kobalabaan mosoni doi tampat mosuaan kamangian doi Peti Perjanjian salaano, tukon iisenemo kolalanse doi Sandung tataapono.

⁶Abesemo kobalabaan motuuk sosubakon mosinua doi Sandung tataapono salaano.

⁷Abesemo kopaisu boako doi napokalalatanan ko Sandung tukon dobalabaanoo, maka ontokiyomo tukon paisu.

⁸Doibundu konoikenemo kokadut doi potikunggon ko Sandung basaleano, tukon iisene kolalanse doi basalean tataapono mobabasal.

⁹Doibundu Sandung tukon sasaibino kololongguno, sio musosubakene doiya-Ku tukon kokubai motuluiyo tukon lisison bakolobokiyan, maka sasaibino doiya inalaasanggon tuuk doi Yaku.

¹⁰Sosubakenemo kobalabaan tukon sasaibino kololongguno tukon dokokubaidoo, sulano sasaibino inalaasanggon tuuk doi Yaku.

¹¹Kubaiyomo buno doiya koidan tukon paisu boako tukon soaano.

¹²Lapamo doiya, sumboliiyomo Harun tukon konapau-pau nalubat doi Sandung tataapono tukon koliyousiyo kobutongo.

¹³Konoikenemo koimam napakean doi Harun, tukon tuluwomo yana sulano yana nainalaasanggon tuuk leleaniyo Yaku salaku meeng koimam.

¹⁴Maka sumboliiyomo konapau-pau naloolanikon, tukon konoikenemo kokalambi doi yanila.

¹⁵Maka tuluwomo yanila pokakana komu tuluwano kotamanoila, sulano mau yanila namoola leleaniyo Yaku salaku meeng koimam. Tukon bakolobokiyan lisisonoo yanila nabenseno turunano mataani basambuan imam.”

¹⁶Musa kubaiyo sasaibino pokakana ko TEMENENO napinalentahkon.

¹⁷Maka doi tanggal meeng bituwon komeengo doi taun koluano lalomo salataa lapa ko Israel miano otinggale ko Mesir, TEMENENO na Sandungoo kinokondongo.

¹⁸Musa abesemo kosoaan-soaano, kekendenge kopakakas-pakakaso, konoikenemo kokayung-kayung motopopong tukon koloyose kosudong-sudongo.

¹⁹Maka nabanatene ko Sandung atono tukon tunggupo tambikon tonggulung doi bunggono buno ko TEMENENO napinalentahkon.

²⁰Doibundu loolua dobatudoo nausekene doi Peti Perjanjian lalomo. Maka Musa tutupe do Petidoo tukon usekene doikayungoo patanggungo doi nakulaluk lalomo.

²¹Maka yana abese do Petidoo doi Sandungoo lalomo tukon iisenemo kotoik poitolungi doi salaano, buno komo TEMENENO parentakene doi yana.

²²Doibundu Musa abesemo ko meda doi Sandung lalomo, tambikon doi lembet taalikon doi toik tonggulungo,

²³maka doi medadoo bunggono inabos koroti sidakan.

²⁴Inaboso kolampu aino doi Sandung lalomo, tambikon doi lalom posasalaan tukon domedadoo,

²⁵maka, kinoitimo dolampu-lampudoo doi TEMENENO salaano.

²⁶Balabaan mosoni inaboso doi Sandung lalomo, doi toik salaano,

²⁷maka nasinua kokamangian mo babangi pokakana komo TEMENENO parentahkene doi Musa.

²⁸Musa iisenemo ko Sandung tataapono lalanseno

²⁹tukon doi tataaponoo salaano inaboso kobalabaan teali sosubakon mosinua. Doi balabaanoo bunggono sinosubakono kososubakon mosinua tukon sosubakon sidakan.

³⁰Bak tambaga inaboso doi napotangaiyan ko Sandung tukon balabaan, maka nainontoki tukon paisu.

³¹Musa, Harun tukon napau-pau kumosiyo kolimano tukon ainoila idoo,

³²sasamba luunggon yanila nausok doi TEMENENO na Sandung lalomo kai moloolaniyo kobalabaan.

³³Doi potikunggon ko Sandung tukon balabaanoo Musa konoikene kokadut, maka yana iisene kobasalean tataapono mobabasal lalanseno. Maka lapamo lapa sasaibino dolimangoo.

³⁴ Doibundu bulus kobunom motombukiyo ko TEMENENO na Sandung, tukon do Sandungoo moono tukon TEMENENO nadaanoan laango.

³⁵Tobikon doiya Musa aki namoola usok doi Sandungoo lalomo.

³⁶Sasamba luunggon dobunomo naliba luwedoi TEMENENO na Sandung bungkuto, ko Israel miano lomboyo konapo basandungan tuuk biyol doi tampat bailon.

³⁷Bai kalu dobunomo aki natolibo, yanila aki nalengget luwe idoo.

³⁸Selama ko Israel miano nalausalaan, TEMENENO daano doi Sandungoo doi ndondoongo buno bunom doi tempo oloyo tukon doi ndondoongo buno aung doi tempo popook.