Read Banggai TOBUATAN 5 Bible Online

TOBUATAN 5 - Banggai bible

TOBUATAN 5

¹Doibundu Musa tukon Harun ampakon mangadap doi tomundo Mesir tukon bantile, “Bunonaiya ko TEMENENO naparentah, Israel na Mian Bisa, ‘Pataikenemo Daku bangsa naampakon sulano yanila moola bakaleda doiya-Ku doi padang lalomo.’ ”

²“Indeekai TEMENENO doo?” tomundo sadaiyo. “Bulaando mosio kupaduliyo Yana tukon pataikene ko Israel miano naampakon? Yaku aki kutingoniiyo do TEMENENO doo, tukon Israel miano aki kupataikene ampakon.”

³Musa tukon Harun bantile, “Ibrani miano na Mian Bisa lapamo okitakene kobutongo doi kami. Pataikenemo mai ampakon doi padang lalomo kona odoon tolu kooloyo koampakonan tuuk mososubakonan sosubakon doi TEMENENO, mbai Mian Bisa. Kalu kami aki mbai kubaiyo doiya, kami naikon inakatemo tukon sesel kai polobosiyan.”

⁴Tomundo bantile doi Musa tukon Harun, “Bulaando komuyu mokubaiyo domianoila molalaikanggene yanila nalimang? Sumboliiyomo doata-atadoo balimang!

⁵Domianoo todudulo badaang koaito. Tukon budodoiya komuyu yase sulano natade balimang!”

⁶Dooloyodoo koidan sasaibino kopadagai bangsa Mesir tukon Israel miano namandor-mandor malaat palenta moluwe doi tomundo,

⁷“Inai koidan pobeena laing doi bangsadoo tuuk momokubai batu tela. Batadikenemo yanila ampakon namoumbolii susuungo.

⁸Bai sumboliiyomo yanila namokubai batu tela aki nakurang koaito doi molapa-lapamo. Yanila yase kekebea tolong; doiyamo kosabapo yanila banggadudul nggimal sulano napinataikon ampakon tuuk mososubakon sosuba doi yanila na Mian Bisa.

⁹Pakisaayo domianoo nabalimang lobian motoong, sulano yanila sibuk tukon limang tukon akiyo kotempo tuuk mondongolii salita-salita mokala.”

¹⁰Dobangsa Mesiroo napai padagai tukon Israeldoo namandor-mandor tobuat maka bantile doi Israel miano, “Tomundo maparentakene sulano komuyu akimo koidan pobinee laing.

¹¹Komuyu sio pomoumbal susuumuyu inaando tolong, bai neneeke, batu tela komuyu mokubaiyo aki namoola kurang doi molapa-lapamo.”

¹²Maka ampakono ko Israel miano dadange posaapon kotano Mesir tuuk pototongikene kolaing.

¹³Sasaibino kopadagai-padagai banggadudul desaake sulano sasamba kooloyo yanila namokubai batu tela mopokakana kona kadaang buno doi tempo yanila bineean laing tumbe.

¹⁴Sasaibino dopadagaidoo nanale komandor-mandor Israel motinugaskanggon dagaiyo dobalimanganoo. Yanila mansadai, “Bulaando budodoiya komubangsa aki namokubai batu tela mopokakana konakadaang buno lolukon?”

¹⁵Maka komandor-mandor Israel ampakon momangadap doi tomundo tukon mongoluh, “Bulaando Tomundo mokabaiyo buno naiya doi kami?

¹⁶Kami aki mbai binee laing, bai pinakisaa makabai batu tela! Budodoiya kami inumbas baanggokai Tomundono napagawe-pagawe komo salah!”

¹⁷Tomundo timbiliyo, “Komuyu takainomo bea tukon aki poiyase balimang. Doiyamo kosabapo komuyu makabi izin doiyaku sulano poampakon mososubakon sosuba doi mu TEMENENO.

¹⁸Ampakono balimang koidan. Laing akimo naikon nabineekon doi komuyu, bai komuyu tataap makabai batu tela mopokakana konakadaang.”

¹⁹Mandor-mandoroo toiyomo baikon yanila doi kasulitan lalomo salataa binontiikon baikon ko Israel mian sio namokubai kobatu tela motataap pokakana konakadaang buno komo lapa-lapamo.

²⁰Salataa yanila tobuat luwedoi kamali, yanila pososuung Musa tukon Harun modaano totiiliyo yanila.

²¹Mandor-mandoroo bantile, “TEMENENO toiyo komu kukokubai! Yana naikon ukume komuyu! Komuyumo komo mangaanikene tomundo tukon napagawe-pagawe mosikitene kami, sampe yanila yase akateyo kami.”

²²Maka Musa mangadap doi TEMENENO koidan tukon bantile, “Temeneno, bulaando ko Israel miano Ikoo mokubaiyo doi nalokisanoo? Bulaando Ikoo mosumboliiyo yaku doisumai?

²³Salataa yaku mangadap tomundo tukon basilingan luwedoi sambu-Mu, yana tambuuno sakisaayo nabangsa nia. Tukon Ikoo aki namoola mokubai oioila sulano tulungiyo yanila.”

²⁴TEMENENO bantile doi Musa, “Budodoiya ikoo naikon kitayo bulaando Daku tindakan motuuk doi tomundo. Yana naikon Kupakisaayo mosodiiyo Daku bangsa. Nabisa-bisaan, yana naikon Kupakisaayo mosiikayo yanila luwedoi lipu nia.”