Read Banggai TOBUATAN 6 Bible Online

TOBUATAN 6 - Banggai bible

TOBUATAN 6

¹ Mian Bisa basilingan doi Musa konabantilano, “Yakumo ko TEMENENO.

²Yaku okitakene kobutonggu doi Abraham, Ishak tukon Yakub salaku Mian Bisa Mo Babasal konakuasa, bai Yaku aki Kuokitakene kobutonggu doi yanila tukon ‘TEMENENO’ sambuno.

³Yaku koidan makabai perjanjian tukon yanila. Yaku paladandi naikon mobeekene kolipu Kanaan doi yanila, tampat yanila nalipu tuboan looluk buno mian lulubaton.

⁴Yaku lapamo lengele ko Israel miano namanggadidian bangsa Mesir molailainggene, maka Yaku neneeke naikon Daku dandidoo.

⁵Jadi pelenggenemo doi Israel miano baikon Yaku bantile doi yanila: Yakumo ko TEMENENO; Yaku naikon sodiiyomo komuyu luwedoi bangsa Mesir naataiyano komuyu. Yaku naikon otudoikene Daku kokuasaan mohebat tuuk mosalamatene komuyu tukon otuwongikene koukuman momotoong doi bangsa Mesir.

⁶Komuyu naikon Kutealikene Kumian, tukon Yaku teali mu Mian Bisa. Maka komuyu naikon toiyo baikon Yaku nia TEMENENO, mu Mian Bisa, moosodiiyo komuyu luwedoi poinataiyan do Mesir.

⁷Naikon Kubabayo komuyu doi lipu Yaku modandikene tukon totopi doi Abraham, Ishak tukon Yakub; tanodoo Kubeekene doi komuyu teali mulangge susuumu. Yakumo ko TEMENENO.”

⁸Sasaibino do TEMENENO doo nateteba Musa pelenggenemo doi Israel miano, bai yanila aki naiyase paduliyo Musa, sabab mangataiyan molokisoo lapamo kubaiyo yanila botol konamoinian.

⁹Doibundu TEMENENO bantile doi Musa,

¹⁰“Ampakono mangadap doi tomundo Mesir tukon bantile baikon yana sio napataikene ko Israel miano naotinggale konalipu.”

¹¹Bai Musa timbiliyo, “Israel miano susuungo aki naiyase molengele yaku. Bulaando kona tealian ko tomundo Mesir mondongoliiyo komian moaki napandoi basilingan buno yaku?”

¹²Bunomodoiya TEMENENO sumboliiyo Musa tukon Harun tuuk mopelenggene doi Israel miano tukon doi tomundo Mesir baikon yanila TEMENENO tugaskanggene sulano naandane ko Israel miano tobuat luwedoi Mesir.

¹³Naiyamo kotunduno Musa tukon Harun: Ruben Yakub napau langgongo, daano sangkap konapau malaneno: Henokh, Palu, Hezron, tukon Karmi. Yaniladoo mian-mian doi Ruben nabenseno lalomo nambumbu.

¹⁴Simeon tukon naboloki meeng koboine Kanaan modaano konoom konapau malaneno: Yemuel, Yamin, Ohad, Yakhin, Zohar tukon Saul. Yaniladoo mian-mian moluwe doi Simeon nabenseno lalomo nambumbu.

¹⁵Lewi daano tolu konapau malaneno: Gerson, Kehat tukon Merari; yaniladoo mian-mian moluwe doi Lewi nabenseno lalomo nambumbu. Lewi konaumur polong 137 kotaun.

¹⁶ Gerson daano lua konapau malaneno: Libni tukon Simei; yanila daano badaang konatulunan.

¹⁷Kehat daano sangkap konapau malaneno: Amram, Yizhar, Hebron tukon Uziel. Kehat kona umur polong 133 kotaun.

¹⁸Merari daano lua konapau malaneno: Mahli tukon Musi. Doiyamo komian-mian doi Lewi nabenseno lalomo tukon yanila nakatulunan suwe-suwele.

¹⁹Amram osowaan tukon Yokhebed, tamano utuso boine pioto, tukon yanila napau-pau doiyamo Harun tukon Musa. Amram tubo 137 kotaun.

²⁰Yizhar daano tolu konapau malaneno: Korah, Nefeg tukon Zikhri.

²¹Uziel koidan daano tolu konapau malaneno: Misael, Elsafan tukon Sitri.

²²Harun osowaan tukon Eliseba, Aminadap napau boine; Eliseba koidan montolutus tukon Nahason, Eliseba suunge Nadap, Abihu, Eleazar tukon Itamar.

²³Korah daano tolu konapau malaneno: Asir, Elkana tukon Abiasaf. Yanila doo Korah pulino nambumbu.

²⁴Eleazar, Harun napau malaneno, osowaan tukon Putiel napau meeng, tukon yanila napau doiyamo Pinehas. Doiyamo sasaibino komian-mian kapalano tukon puli kapalano doi Lewi nabenseno lalomo.

²⁵Harun tukon Musa doiyamo ko TEMENENO napinarentahkon tuuk mobabayo ko Israel miano tobuat luwedoi Mesir.

²⁶Yanila luaila mangadap tomundo doi Mesir sulano yana naosodiiyo ko Israel miano.

²⁷Salataa TEMENENO basalita tukon Musa doi Mesir,

²⁸TEMENENO bantile, “Yakumo ko TEMENENO. Pelenggenemo doi tomundo Mesir sasaibino kolangge molapamo Kubantile doi ikoo.”

²⁹Bai Musa timbiliyo, “TEMENENO, Ikoo toiyo baikon yaku aki kupandoi basilingan. Bulaa konatealian tomundo yase ndongoliiyo yaku?”