Read Banggai TOBUATAN 7 Bible Online

TOBUATAN 7 - Banggai bible

TOBUATAN 7

¹TEMENENO bantile doi Musa, “Yaku naikon tealikene ikoo buno Mian Bisa doi tomundo salaano, tukon utusomu Harun naikon basilingan doi yana buno munabi.

²Pelenggene doi Harun sasaibino komo Kuparentakene doi ikoo. Sumboliiyomo Harun nabantile doi tomundo baikon yana sio napataikene ko Israel miano mootinggale kotano Mesir.

³ Bai Yaku naikon tealikene tomundo matikas konoano. Yana naikon aki napusinggene ikoo, maukai Kulubatene badaang kobalaa doi Mesir.

⁴Tobikon doiya Yaku naikon ukume ko Mesir tukon ukuman-ukuman momotoong, doibundu Kubabayo sasaibino ko Israel miano, Kumian tobuat luwedoi lipudoo.

⁵Maka ko Mesir miano naikon toiyo baikon Yaku nia TEMENENO, doi tempo Kuukumano yanila tukon babayo ko Israel tobuat luwedoi napai lipu.”

⁶Musa tukon Harun kabaiyo oila ko TEMENENO napinarentahkon.

⁷Musa kona umur 80 kotaun tukon Harun 83 kotaun salataa yanila namangadapan doi tomundo Mesir.

⁸TEMENENO bantile doi Musa tukon Harun,

⁹“Kalu tomundo kabiyo komuyu mokubai langge minasaindinggon salaku buktii, sumboliiyomo Harun naalayo konatongkat tukon nalambitene doi tano doi tomundo salaano. Dotongkatoo tobolii teali binda.”

¹⁰Maka ampakono Musa tukon Harun mangadap tomundo tukon yanila kubaiyo oila komo Mian Bisa napinarentahkon. Harun lambitene kona tongkat doi tano doi tomundo salaano tukon napagawe-pagawe, maka dotongkatoo tobolii teali binda.

¹¹Tobikon doiya dotomundodoo uange kona mian-mian modaano kona motoiyan tukon ahli-ahli namotoiyan, maka yanila kubaiyo buno doiya koidan tukon yanila namotoiyan mominasaindinggon.

¹²Yanila lambitene konapai tongkat doi tano tukon tongkat-tongkatoo tobolii teali binda. Bai Harun natongkat lemese yanila natongkat.

¹³Maukai nabuno doiya, tomundo tataap kakatikase konoano tukon aki naiyase paduliyo Musa tukon Harun nabantilan, pokakana komo lapamo TEMENENO bantile.

¹⁴Doibundu TEMENENO bantile doi Musa, “Tomundodoo matikas tuuno konoano; yana aki naiyase mopataikene ko Israel miano naampakon.

¹⁵Tobikon doiya ampakono pososuunggene yana dowa-dowa, doi tempo yana bulus doi Nil Paisunobatango. Babayomo kotongkat momoola tobolii teali bindadoo tukon totiiliyomo kona lubatan doi paisu bibilo.

¹⁶Bantilemo doi tomundodoo: TEMENENO, Ibrani miano na Mian Bisa, sumboliiyo yaku tuuk mopelenggene doi ku Tuan sulano pataikene Konamian moampakon sulano nabakaleda doiya-Na doi padang lalomo. Bai polong doiyabudodoo ku Tuan aki naiyase molongol.

¹⁷ Tobikon doiya, TEMENENO bantile bunonaiya, ‘Luwedoi oila Daku kinubai naikon, ikoo naikon toiyo baikon Yakumo ko TEMENENO. Tukon tongkat nia yaku naikon umbase kopaisu batango bunggono, tukon kopaisuno naikon tobolii teali sau.

¹⁸Ikan-ikan naikon mate, tukon napaisubatango nia naikon koboono boowan, sampe bangsa Mesir aki namoola monginum paisuno.’ ”

¹⁹TEMENENO bantile doi Musa, “Sumboliiyomo Harun naalayo kona tongkat tukon napasekenemo doi sasaibino kopaisubatango bunggono, sausalul tukon kolam-kolam doi Mesir. Kopaisuno naikon teali sau tukon doi posaapon kolipu naikon daano kosau, mau sombe-sombe lalomo tukon gumbang-gumbang batu.”

²⁰Musa tukon Harun kubaiyo oila ko TEMENENO napinarentakon. Doi tomundo tukon napagawe-pagawe salaano. Harun tidekene konatongkat tukon umbase ko Nil Paisunobatango, maka kopaisuno tobolii teali sau.

²¹Ikan-ikan doi paisu batangodoo mate, tukon koboono boowan tuuno, sampe ko Mesir miano aki namoola monginum dopaisudoo. Doi posaapon kotano Mesir daano kosau.

²²Bai koahli-ahli motoiyan doi Mesir mokubai bunodoiya koidan tukon yanila namotoiyan minasaindinggon, sampe tomundo tataap matikas konoano. Pokakana molapamo TEMENENO bantile, tomundo aki naiyase ndongoliiyo Musa tukon Harun.

²³Tolongokai yana mule doi nakamali aki napaduliyo dokajadianoo maunasoisik.

²⁴Sasaibino ko Mesir miano makali bitu popupuson dopaisudoo batango bibilo tuuk moumbolii paisu ininum, sabab dopaisubatangodoo paisuno aki namoola ininum.

²⁵Pitu kooloyo molapa ko TEMENENO nakutukiyano ko Nil Paisunobatango.