Read Banggai TOBUATAN 8 Bible Online

TOBUATAN 8 - Banggai bible

TOBUATAN 8

¹Maka TEMENENO bantile doi Musa, “Ampakono mangadap doi tomundo tukon pelenggene doi yana Daku teteba nia: ‘Pataikene Daku mian naampakon sulano nabakaleda doiya-Ku.

²Kalu ikoo tolake, nalipunia naikon Kukoonoiyo tukon tupak salaku ukuman.

³Ko Nil Paisunobatango naikon moono tukon tupak, sampe iyayon-iyayonoo tobuat luwedoi paisu tukon usok doi mukamali lalomo, doi mukombiang mooloan lalomo tukon mutampat moolowan, doi sambu-sambu nabonua lalomo tukon rayat, tukon doi tampat basuwaan loti lalomo tukon pang-pang.

⁴Tupak-tupakoo naikon osuut tukon libaiyo ikoo, sasaibino kosambu tukon rayat.’ ”

⁵TEMENENO bantile doi Musa, “Sumboliiyomo Harun napepenge konatongkat doi paisu-paisubatango bunggono, sausalul tukon kolam-kolam sulano nasumbot kotupak-tupak tukon koonoiyo kotano Mesir.”

⁶Maka Harun pasekene konatongkat doi sasaibino kopaisu bunggono, maka sumbuto kotupak-tupak koonoiyo posaapon kolipu.

⁷Bai mian modaano kona motoiyan yanila pakeyo koilimuu minasaindinggon, tukon koidan kabaiyo sumbut kotupak-tupak doi lipudoo.

⁸Tomundo uange Musa tukon Harun, tukon bantile, “Posambeango doi TEMENENO sulano Naalapuse kotupak-tupak nia, maka yaku naikon pataikenemo komubangsa naampakon sulano napo mososubakon sosuba doi TEMENENO.”

⁹Musa timbiliyo, “Tukon sanaang konoanggu naikon mosambeang tuuk doi ku Tuan. Tataapenemo kotempono, maka yaku naikon sambeanggene daku Tuan, sambu-sambu tukon rayat. Maka ku Tuan naikon inosodiikon doi tupak-tupakoo, tukon akiyo naikon komo daano kolabino, alaasene doi Nil Paisunobatango.”

¹⁰Tomundo doo timbiliyo, “Posambeango tuuk doi yaku namodowa.” Musa bantile, “Yaku naikon kabaiyo oila daku Tuan nakinabi. Maka daku Tuan naikon toiyo baikon aki nadaano ko Mian Bisa bailon buno TEMENENO, mbai Mian Bisa.

¹¹Yana naikon osodiiyo daku Tuan, kosambu-sambu tukon rayat luwedoi tupak-tupakoo. Akiyono naikon kotupak-tupak doi bonua-bonua, alaasene doi Nil Paisunobatango.”

¹²Maka Musa tukon Harun otinggalemo tomundo. Doibundu Musa sambeang doi TEMENENO sulano Naalapuse kotupak-tupak molinubotiikon doi tomundo.

¹³TEMENENO talimayo Musa nakakabi, tukon tupak-tupak modaano doi bonua-bonua, doi basalean-basalean tukon doi kombung-kombung mate sasaibino.

¹⁴Mesir miano pototongikene kotupak-tupak banggenodoo polong tatandak kona inatambunan, sampe posaapon kolipu koboono boowan.

¹⁵Salataa tomundo kitayo baikon dotupak-tupakoo matemo, yana kakatikase konoano. Tukon buno komo lapamo TEMENENO bantile, tomundo aki naiyase paduliyo Musa tukon Harun nabantilan.

¹⁶TEMENENO bantile doi Musa, “Sumboliiyomo Harun naumbase kotano tukon natongkat, maka doi posaapon kolipu Mesir koambata naikon tobolii teali pipil.”

¹⁷Maka Harun umbase kotano tukon natongkat, tukon sasaibino koambata doi Mesir tobolii teali pipil motokuuniyo kobangkapi tukon iyayon.

¹⁸Mian modaano kona motoiyan kakaate pakeyo yanila nailimuu minasaindinggon tuuk koidan mokubai pipil-pipil bai yanila aki nateali mokubai pipil. Doiyayaa daano kopipil,

¹⁹ sampe domo pandoi motoiyanoo bantile doi tomundo, “Naiya Mian Bisa nakokubai.” Bai dotomundoo kakatikase konoano, tukon buno komo lapamo TEMENENO bantile, tomundodoo aki naiyase paduliyo Musa tukon Harun nabantilan.

²⁰TEMENENO bantile doi Musa, “Ampakono namodowa dodowa tuuno pososuunggene tomundo doi tempo nabulusan doi paisubatango, tukon pelenggenemo doi yana Dakubantilan nia: ‘Pataikene Daku mian naampakon bakaleda doiya-Ku.

²¹Kalu ikoo tolake, maka Yaku naikon olubatene kopoos doikoo, doi sambu-sambu tukon rayat. Mesir miano nabonua-bonua, polong posaapon kolipu naikon moono tukon poos.

²²Bai tuuk kabupaten Gosyen, Yaku naikon Kubaiyo tangalaas, tampat Daku mian nadungolan. Indaa aki naikon nadaano kopoos, sulano komuyu toiyo baikon Yaku, TEMENENO, komo Kubaiyo doiya.

²³Yaku naikon Kubaiyo kopasasalaan doi Kumian tukon murayat. Komo minasaindinggono naikon teali namodowa.’ ”

²⁴TEMENENO olubatene kopoos mobadaang tuuno doi tomundo nakamali tukon doi sambu-sambu nabonua. Posaapon kolipu Mesir sakisaa tuuno sabab dopoos-poosoo.

²⁵Doibundu tomundo uange Musa tukon Harun maka bantile, “Ampakono mososubakon sosuba doi mu Mian Bisa, bai doi lipunia tolong.”

²⁶“Konamonondokan aki,” Musa timbiliyo, “sabab Mesir miano naikon lasayo tosinggung kalu kitayo kombai sosubakonoo, tukon tantu kami naikon sinakul batu polong mate.

²⁷Kami sio mbai ampakon doi padang lalomo konaodoon tolu kooloyo koampakonan tuuk mososubakon sosuba doi TEMENENO mbai Mian Bisa, buno komo Napinarentakon doi kami.”

²⁸Tomundo bantile, “Monondoko, yaku pataikene komuyu ampakon doi padang lalomo sulano mososubakon sosuba doi TEMENENO, mu Mian Bisa, asal komuyu aki poampakon dodoon. Neneeke, sambeanggenemo yaku!”

²⁹Musa timbiliyo, “Kalu lapamo yaku ampakon, yaku mosobit sambeang doi TEMENENO sulano namodowa dopoos-poosoo otinggalemo daku Tuan, kosambu-sambu tukon rayat. Bai inai mokokoliiyo kami koidan, tukon inai mosembange ko Israel miano moampakon tuuk mososubakon sosuba doi TEMENENO.”

³⁰Musa otinggalemo tomundo, maka basambeang doi TEMENENO,

³¹tukon TEMENENO talimayo Musa nasambeang. Dopoos-poosoo bengamo otinggale tomundo, sambu-sambu tukon rayat. Akiyono maunabaino meeng komo totinggal.

³²Bai mau naiyania tomundo kakatikase konoano tukon aki napataikene dobangsadoo ampakon.