Read Banggai TOBUATAN 9 Bible Online

TOBUATAN 9 - Banggai bible

TOBUATAN 9

¹TEMENENO bantile doi Musa, “Ampakono mangadap doi tomundo, tukon bantile doi yana baikon ko TEMENENO, Ibrani miano na Mian Bisa bantile: ‘Pataikenemo Daku mian naampakon sulano yanila moola bakaleda doiya-Ku.

²Kalu ikoo aki muiyase mosodiiyo yanila,

³Yaku naikon olubatene kobalaa molokis doi sasaibino komu iyayon piniala, adalan, keledai, unta, sapi, domba tukon mumbembe.

⁴Yaku naikon posasalekene ko Israel miano naiyayon piniala tukon Mesir miano naiyayon piniala. Doi Israel miano naiyayon piniala akiyo komeeng kai naikon momate.

⁵Yaku, TEMENENO, tataapenemo namodowa kooloyo tuuk mokubaiyo dolanggedoo.’ ”

⁶Modoakon kooloyono TEMENENO kubaiyo pokakana komo lapamo Nabantile. Sasaibino kobangsa Mesir naiyayon piniala mate, bai doi Israel miano naiyayon piniala maunabaino meeng akiyo komo mate.

⁷Tomundo mansadaikene oila komo lapamo teali, maka sinalitaikon doi yana baikon doi Israel miano naiyayon piniala maunabaino meeng akiyo komo mate. Bai tomundo kakatikase konoano tukon aki naiyase mosodiiyo dobangsadoo ampakon.

⁸TEMENENO bantile doi Musa tukon Harun, “Mangalamo moi-moiya konggunggumo koabu moluwe doi tampat basuwaan. Doi tomundo salaano, Musa sio natipase diabudodoo doi dapang.

⁹Maka abudoo naikon tebeaason doi posaapon kotano Mesir. Doi bangkapi tukon iyayon diabudodoo naikon sumbetene kobisul-bisul momapasa teali pakol monanaon.”

¹⁰ Maka Musa tukon Harun mangala abu, tukon mangadap doi tomundo. Musa tipasene doabudoo doi dapang. Doi bangkapi tukon iyayon sumboto kobisul-bisul momapasa teali pakol monanaon.

¹¹Mian mopandoi motoiyan aki namoola mangadap doi Musa sabab posaapon yanila butongo moono bisul pokakana ko Mesir miano bailonggon.

¹²Bai TEMENENO tealikene tomundo kakatikase konoano, tukon buno komo lapamo TEMENENO bantile, tomundo aki naiyase paduliyo Musa tukon Harun nabantilan.

¹³TEMENENO bantile doi Musa, “Ampakono modowa dowa-dowa tuuno mangadap doi tomundo, tukon pelenggene doi yana baikon ko TEMENENO, Ibrani miano na Mian Bisa bantile: ‘Sodiiyomo Daku mian sulano yanila moola ampakon bakaleda doiya-Ku.

¹⁴Diabudodoo Yaku naikon olubatene kobalaa aki natongo doi sambu-sambu tukon rayat tolong, bai koidan doikoo, sulano ikoo toiyo baikon akiyo komo buno Yaku doi posaapon kodunia.

¹⁵Kalu andeno Yaku yase ukume ikoo tukon murayat tukon sesel, tantu komuyu sasaibino silakamo.

¹⁶ Bai komuyu Kusodiiyo tubo, sulano Yaku moola otudoikene Daku kakuasaan doikoo, sampe Kosambunggu teali tololongol doi posaapon kodunia.

¹⁷Maukai nabunodoiya, ikoo daano koidan motatandak konoamu tukon aki muiyase Daku mian naampakon.

¹⁸Modowa dowa-dowa, doi tempo mopokakana, Yaku naikon olubatene koudan es molokis, pokakana komo akiyoon nabiasa teali doi Mesir salataa doi looluk polong budodoiya.

¹⁹Maka parentakenemo sulano sasaibino koiyayon piniala tukon sasaibino komu langge modaano doi tonggulung nabinaba doi tampat moaman. Sasaibino komian tukon iyayon piniala modaano doi tonggulung tukon aki namoola soop naikon mate kinonoi udan es.’ ”

²⁰Bubula dosambu-sambudoo matakutene ko TEMENENO nabantilan. Yanila mababa ata-ata tukon napai iyayon piniala usok doi bonua lalomo sulano natosoopon.

²¹Bai kobailon aki namopusinggon dopoingotidoo tukon otinggale koata-ata tukon yanila naiyayon piniala doi padang.

²²Maka TEMENENO bantile doi Musa, “Tidekenemo kolimamu doi babo, tukon naikon bulus koudan es doi posaapon kotano Mesir. Doudanoo naikon konoiyo kobangkapi, iyayon piniala tukon sasaibino kolobo mosinakkanggon doi kombung.”

²³Musa bingkate kona tongkat doi babo, tukon ko TEMENENO obulusene koduluk tukon udan es, tukon selese tulokiiyo kodunia. TEMENENO olubatene

²⁴ koudan es molokis linolaing selese moposambal-sambal. Doiyamo koudan es molokis tuuno tunduno Mesir.

²⁵Doi posaapon dolipudoo koudan es akateyo sasaibino kolangge doi kombung, tousokon kobangkapi tukon iyayon piniala. Sasaibino kolangge mosinakkanggon doi kombung manas tukon kayung-kayung batango tolubang.

²⁶Tongo kabupaten Gosyen, tampat ko Israel miano nadungolan, aki nakinonoi udan es.

²⁷Maka tomundo uange Musa tukon Harun, tukon bantile, “Yaku baladosamo. TEMENENOmokai komo bisa, yaku tukon kurayat mokubaimo salah.

²⁸Posambeangokai doi TEMENENO; sukupo kombai sakisaawan sabab duluk tukon udan es nia. Yaku naikon sodiiyomo komuyu ampakon. Komuyu maunaaki podungol naimbaa koidan.”

²⁹Musa bantile doi tomundo, “Mosobit salataa yaku polong doi kota tonggulungo, yaku naikon bingkate kolimanggu tuuk mobasambeang doi TEMENENO. Koduluk naikon tade tukon udan es naikon koas, sulano tomundo natoiyo baikon nadunia nia TEMENENO koona.

³⁰Bai yaku toiyo baikon daku Tuan tukon sambu-sambu akiyoon koidan namatakut doi TEMENENO Mian Bisa.”

³¹Tatanaman rami tukon jelai mate, sabab korami daano mobungai, tukon jelai daano mosao.

³²Bai gandum tukon tatanaman moano kobatuno aki namanas sabab akiyoon nalaate kotempono.

³³Maka Musa otinggalemo tomundo tukon ampakon doi kota tonggulungo; indaa yana bingkate kolimano tuuk mosambeang doi TEMENENO. Tempodoo koidan tademo koduluk, udan es tukon udan.

³⁴Salataa tomundo kitayo oila komo teali, yana baladosa koidan. Yana tukon kona sambu-sambu tataap katikase konoanoila.

³⁵Buno komo lapamo TEMENENO bantile lolo doi Musa, tomundo aki naiyase pataikene ko Israel miano ampakon.