Read Banggai AYUB 1 Bible Online

AYUB 1 - Banggai bible

AYUB 1

¹Doi buta Us dungol komeeng komala-malane mosinombuikon Ayub. Yana sosubaiyo ko Mian Bisa tukon setia doiya-Na. Yana mian momonondok konoano tukon aki namokubai soisik kolokis.

²Yana daano konapau mala-malaneno pitu komian tukon tolu konapau boine.

³Koikoidan yana daano badaang kona ata-ata, 7.000 kodomba, 3.000 kounta, 1.000 kosaapi tukon 500 kokeledai. Takainomo, yana daanoon mian mokaasa tuuno doi antara mian modungoliyo kolipu Tolopot.

⁴Domopitudoo Ayub napau mala-malaneno daano konakabiasaan mokubai lamean pai-paisoboli doi suwe-suwele nabonua. Doi lameanoo tolu Ayub napau moluko koidan inundang, maka yanila sasaibino kaan tukon monginum posinggat-singgat.

⁵Lapa komeeng kolamean, Ayub sidutu bangun dodowa tukon sosubakene kona sosubakon tuuk memeeng konapau sulano ko TEMENENO naompuniyo yanila. Sabab Ayub pikikene, moola nateali dona pau-paudoo tukon aki nasangadaiyo mokubaimo dosa tukon totulaiyomo ko Mian Bisa.

⁶ Daano kooloyo meeng komalaekat-malaekat doi surgaa mangadap doi TEMENENO, tukon ko Si Iblis daanoon doi antara yanila koidan.

⁷Ko TEMENENO masadai doiyana, “Luwe doi yaa ikoo?” Si Iblis timbiliyo, “Ata sodokai lausala dombalaa doisumai tukon mododongiiyo kodunia.”

⁸Maka TEMENENO masadai, “Oilakai lapamo ikoo palahatikanggene Dakuata Ayub? Doi posaapon kodunia akiyo komian mobunodoiya konatotobosan tukon namonondokan konoano buno yana. Yana sosubaiyo Yaku tukon aki tuuno namokubai kulokisan.”

⁹ Bai Si Iblis timbiliyo, “Tantumokai Ayub sosubaiyo Ikoo sabab yana matalima tambo.

¹⁰Yana, nakaluargaa tukon sasaibino konakaasaan sidutu Ikoo lindungiyo. Ikoo balakaatiyo konalimang tukon Ikoo beena yana badaang koiyayon piniala, sukupo tuuk koonoiyo sasaibino kolipu.

¹¹Bai kalukai sasaibino konakaasaanoo Ikoo alayo, tantu yana naikon banggadudul kutukiyo Ikoo!”

¹²Maka TEMENENO bantile doi Si Iblis, “Monondoko, lakukenemo kooioila tukon sasaibino Ayub nakaasaan, bai inai mopalasakitiyo yana!” Maka Si Iblis tauso luwedoi TEMENENO salaano.

¹³Bubula kotempo doibundu Ayub napau-pau daanoon momokubai lamean doi utusoila langgongo motua nabonua.

¹⁴Sosinggot meeng komian mosinumbolii lubat obu-obulen doi Ayub nabonua tukon pelenggene, “Tuan, ko Syeba miano lapamo lubat lobosiyo kami salataa saapi-saapi daano bapajeko doi asi tukon keledai-keledai daanoon momakaan bulung doi naloolanian. Yanila lapamo lambase doiyayon-iyayonoo tukon akateyo Tuan naata-ata modaano idoo. Tolongo yaku nia komo luput tobikon moola pelenggene doi Tuan.”

¹⁶Salataa yana daano mobasilingan, lubato atadoo koluano mobantile, “Tuan nadomba-domba tukon sasaibino kopadagai selese tulokiiyomo sampe mate sasaibino. Tolongo ata susuungo komo luput tobikon napelenggene doi Tuan.”

¹⁷Yana akiyoon nalapa basilingan, lubato koidan koata kotoluno mobantile, “Tolu kotambuno ko Kasdim napalambok lapamo lambase Tuan naunta-unta tukon akateyo Tuan naata-ata. Tolongo ata susuungo komo luput tobikon napelenggene doi Tuan.”

¹⁸Salataa yana daano mobasilingan, lubato koata bailon momababa bilita, “Tuan napau-pau daanoon momokubai lamean doi Tuan napau langgongo nabonua.

¹⁹Sosinggot puul kombeyus luwedoi padang bone tukon lupayo dobonuadoo tobikon natolubang tukon sasaibino Tuan napau mate. Tolongo ata nia komo luput tobikon namoola pelenggene doi Tuan.”

²⁰Maka Ayub kokondong tukon bendinge konapakean salaku paloosan poloonan. Yana daluwo kooluno, maka sosuba

²¹tukon bantile, “Yaku sinuung akiyo kooi-oila tukon yaku naikon mate akiyo kooi-oilano. TEMENENO lapamo beena tukon TEMENENO koidan lapamo alayo. Nggaale kosambuno!”

²²Jadi, maukai Ayub natoupiyo sasaibino dosusaanoo, yana aki namokubai lalim tukon aki naasalakene ko Mian Bisa.