Read Banggai AYUB 12 Bible Online

AYUB 12 - Banggai bible

AYUB 12

¹Ayub timbiliyo, “Bisa, komuyu nia komo wakiliyo kobangkapi. Kalu komuyu mate, komotoiyan naikon mate koidan.

³Mauyakukai bangkapi modaano konapikilan; sasaibino dopobinantiloo yaku lapamo mangalatikene. Koidan lakon, indee komoaki natoiyo sasaibino doiya? Jadi, inai posangkayo komuyu liisiyo yaku!

⁴Tulanggu tukon sobat kokumbite yaku, banggokai yaku nia bisa tukon akiyo kososiboliino. Looluk ko Mian Bisa timbiliyo dakusambeang, kalukai yaku nggeleamon mangkabi tulung.

⁵Komuyu totulaiyo komian mosilaka, banggokai komutuboan daano moaman komian mokabi otuwong komuyu bobokiiyo.

⁶Bai kopalambok natuboan aki nainotokuti; mian mobarani lawane ko Mian Bisa tubo monondok. Banggokai pilogot komo teali napoo moonggolan, tolongokai nabukuanan susuungo.

⁷Masadaikene doi tomisi tukon iyayon bailonggon, maka yanila naikon beena komuyu otunggul.

⁸Makabi katalangan doi sasaibino komo tubo doi buta tukon doi tobun, maka komuyu matalima katalangan.

⁹Indee doi sasaibinoiladoo komo aki nasadariyo, baikon komo pasitakayo yanila doiyamo Mian Bisa susuungo?

¹⁰Yana atule sasaibino komo tubo natuboan doi dunia; Yana balakuasa doi samba kobangkapi naansaang.

¹¹Buno aleponggu moyase matamis kinaan momonondok, bunomokai doiya kotolingainggu yase mondongolii bantilan.

¹²Kobilitano, motoiyan daano doi mian momotuamo konatuboan, bai komotoiyan tukon bukuanan daano tolong doi Mian Bisa. Tolongo komotoiyan komo daano doi mian momotuamo konatuboan, bai komotoiyan tukon kakuasaan daano tolong doi Mian Bisa!

¹⁴Oila Kona linombak akimo namoola kinokondong koidan, indee komo tinaan aki namoola abali bebas.

¹⁵Yana pepete kopaisu, maka namotiis tukon motuul sasaibino; Yana osodiiyo namololon, maka eaba namanase!

¹⁶Ko Mian Bisadoo bukuan, bukuan tukon tambongan! Mobangakakon tukon motangakakon daano doi Yana nakuasa,

¹⁷Yana sabute sasaibino komokuasaiyo kopamarenta namotoiyan, tukon sasaibino kokatua Yana tealikene langge mokinokumbit.

¹⁸Yana pusake kotomundo tukon Yana taane yanila;

¹⁹Yana rendah kanggene koimam-imam tukon sasaibino kotano-tano.

²⁰Komian mopandoi basilingan yana tealikene aki nabiyok, Yana sabute kopau-paulakai namotoiyan.

²¹Yana okimaayo komian mopaubakalingakon; Yana alayo konapoo basambuan kuasano mobalakuasa.

²²Yana kadiolongiyo kotampat-tampat mokalipookan tuuno Yana sinariyo kombombokounomopook tuuno.

²³Kobangsa-bangsa Yana tealikene momaju tukon monondok maka Yana sakisaayo yanila sampe mate.

²⁴Yana tealikene sasaibino kokatua bingung, tobikon yanila lausala akiyo konatujuan.

²⁵Yanila tataap doi kalipookan lalomo, tukon tapa-tapasokon buno mian momalangukene komoiminum.