Read Banggai AYUB 13 Bible Online

AYUB 13 - Banggai bible

AYUB 13

¹Sasaibino doiya yaku mokitamokai tukon yakukai lengelemo, tukon tutuu yaku mangalatikenemo.

²Oila kopoo tinoi, mau yaku toiyo; inai moanggene yaku kalah tukon ikoo.

³Bai yaku naikon basilingan doi Mo Balakuasa; yaku yase mobelayo dakupalakala doi Mian Bisa salaano.

⁴Sabab komuyu tutupe komulongasan tukon bangakakonan, akiyo konaboliian buno tolosupa-tolosupa mopalsu.

⁵Kalukai komuyu aki pobasilingan, tantu komuyu inaanggon pandoi.

⁶Maka ndongoliiyomo dakupadangani; kiteese daku belaano.

⁷Kai moola komuyu bakala-kala doi Mian Bisa? Kai moola pobakala-kala tuuk Nakapantingan?

⁸Kai moola komiyu pihak doi Mian Bisa, tukon belayo Yana salaku buno pangacara?

⁹Kalu ko Mian Bisa palesakon, kai naikon monondok kohasilo? Kai moola pookoliiyo buno pookoliiyano kobangkapi?

¹⁰Kalu komuyu ala doiyana, maukai aki pobibiyok, ko Mian Bisa naikon hukume komuyu tukon lokis.

¹¹Oilakai ko Mian Bisa nababasalan aki konoamu nakaget? Oilakai Konahebatan aki nangginggim konoamu?

¹²Sasaibino komuo tunggul buno ambata moakiyo kotakoso; komu pembelaan buno buta momanggeanggang momoola mapasah.

¹³Tobikon doiya naimopelek, sodiiyomo kubasilingan! Yaku aki kupaduliyo maunabulaando kona tealian!

¹⁴Yaku sadia mobataanggene daku ansaang!

¹⁵Yaku nekate sabab manasalo! Kalu ko Mian Bisa kabi naakateaku, yaku batadikenemo tolong, bai yaku naikon belayo daku kalakuan doi salaa-No.

¹⁶Naanggokai sabab kubaranianoo yaku salamat, sabab komian lokis aki naikon nabarani momangadap doi Mian Bisa!

¹⁷Budodoiya ndongoliiyo mono-monondok dakubantilan; palatikanggene dakukatalangan.

¹⁸Daku palakala lapamo sadia kubantile, yaku anggayo, aki naikon kuinasalakon!

¹⁹TEMENENO, kalu Ikoo lubat tukon laitaku, akimo naikon kubiyok, tukon montotiilimo kumatean.

²⁰Bai lua dakukakabi nia podaanokenemo, sulano kubarani mangadap doi-Koo koidan.

²¹Tademo mosakisaayo yaku, tukon inai Mupisaiyaku tukon Mutakutiaku!

²²Basilingano, maka naikon kutimbiliyo. Kai sodiiyomo kubasilingan, maka beenamo potimbili!

²³Bulaamo konakadaang kosalah tukon lalim kulinakukon? Sasaibino dakupalanggalan siokai mubantile!

²⁴Bulaando Ikoo mobadodoonggon tukon bangalaason luwedoi yaku? oila kosababpo Ikoo moaangganaku buno Mumusuh?

²⁵Yaku tolongo loon momatanas kanakon mbombuul mopuul bulaando Ikoo mootakutia yaku! Yaku tolongo padibatangoo momotuul tukon molooyu bulaa konamolaan Ikoo mololo-lolonggaku!

²⁶Ikoo tantukene kotuboan molokis tuuk yaku; ikoo balase dakukasalahan doi tempo kutabokonan.

²⁷ Ikoo boboiyo koainggu tukon rante besi; Ikoo awasio sasaibino dakulenggang. Tukon koainggu salaano, aki natongosobi luwedoi Mupokita.

²⁸Maka yaku tealimo mandabuk buno kayung mobooano; buno toik eaka mokaane yaku teali manas.