Read Banggai AYUB 14 Bible Online

AYUB 14 - Banggai bible

AYUB 14

¹Salataamo nasinuungan kobangkapi miyuk, akiyo konabukuanan; konatuboan palus tukon susah tuuno.

²Yana sopii tukon molooyu buno bubunga; lapus buno mbombokouno, banggadudul lapus.

³Ooh Mian Bisa, bulaando Ikoo moiyase mbalengaku, tukon yaku sinasalaanggon doi Mupangadilan?

⁴Kai moola kobangkapi mobaladosa nalubatene kolangge motalakana?

⁵Kobangkapi naumur nakadaang lapamo Ikoo tantukanggene; konabituwon nakadaang lapamo Ikoo tantukanggene. Ikoo tataapkanggene koidan konatuboan nadumbakan; aki namoola yana lumbaiyo.

⁶Batadikenemo yana nabatadei, inai ponggabute yana; sulano namoola toupiyo konatuboan polong lapa konalimang.

⁷Daanokai komoinian doi kayungo motinape; yana naikon sopii koidan, maka daano kolangaano.

⁸Maukai namanas koalono doi buta lalomo, tukon mate koanggolo sabab booan

⁹bai kalu paisu singgile, yana tubo koidan; buno tatanaman mosodo sinakakon, kosopi-sopiino abali tubo.

¹⁰Bai kalu kobangkapi mate, lapus kosalitano; yana mate doi dunia, maka inaando konatausan?

¹¹Buno paisu motoduap luwedoi talaga lalomo, buno paisu batango momooti sampe kabus kopaisuno,

¹²bunomokai doiya kobangkapi momatemo: yana akimo naikon namoola abali tubo. Yana akimo naikon natadagai doi nadaanoan modaano kotimbu, akimo koidan nabangun luwedoi namooloan.

¹³Sookanakumokai doi mian mate nadunia lalomo; lindungiyakumokai naaki nasampe Ikoo nggimal koidan. Bai tantukenemo kotempo tuuk moneneeke kobutonggu.

¹⁴Sabab kalukai kobangkapi mate, kai moola naabali tubo? Oloyo paisoboli kooloyo yaku totiili sampe daku tempo mosopotan nia alo.

¹⁵Maka Ikoo naikon uangaku, tukon yaku naikon timbiliyo; Ikoo naikon seange koidan doiyaku, lobo saibino motubo tukon moaki Ikoo mopasitakayo.

¹⁶Maka Ikoo naikon awasia sasamba daku laakonan, bai akimo koidan Ikoo palatikanggene dakulalim.

¹⁷Ikoo naikon ompuniyo tukon dedeenggene dakulalim; dakusalah doi tempo loolukoo naikon Ikoo hapusemo.

¹⁸Kalu naikon tabaako tukon molombomo kobunggul tukon batu bunggo tasaakon doi natangabosan.

¹⁹Kopaisu mosooan konalombaan naikon kikise kobatu-batu; koudan mobabasal naikon lalinemo kobuta. Bunomokai doiya Komu manasano kobangkapi namoinian.

²⁰Ikoo lungguiyo yana tuuk sidutu-posidutukon; Ikoo sumboliiyo yana taus tukon Ikoo boliiyo koduduso.

²¹Konapau-pau teali mian momonondok bai yana aki namongotoi. Tukon kalukai yanila teali talalais, akiyo komo popitoikene doiyana.

²²Tolongo nanggaulan kobutongo kona inomi; tolongo napoloonan kona tinoupi.”