Read Banggai AYUB 15 Bible Online

AYUB 15 - Banggai bible

AYUB 15

¹Maka Elifas timbiliyo, “Ayub, komusalita kala-kala, tutuu akiyo koalatino! Akiyo komian mopandoi motimbiliyo buno ikoo nia, yana aki naikon nabelayo kobutongo tukon bantilan-bantilan moakiyo koanggano.

⁴Kalubaikon domubantilan linoingikon, akiyo komeeng komian momatakut kai mosambeang koidan doi Mian Bisa.

⁵Komubantilan-bantilan kona bukti ikoo salah, bai komu kulokisan ikoo tutupe tukon alepo nasilatano.

⁶Aki napalaluu yaku molaite tukon musalakene ikoo, sabab doi mubantilan-bantilan susuumu ikoo inasalakon.

⁷Ikoo anggene ikoomo kobangkapi mosinuung tumbe? Salataa kobunggul-bunggul tinealikon ikoo daanomo?

⁸Kai ikoo ndongoliiyo ko Mian Bisa mokubaiyo korencana? Kai tolongo ikoo kobangkapi modaano konamotoiyan?

⁹Sasaibino komutinoi, kamikai toiyo; sasaibino komutinoi, tontongo koidan doikami.

¹⁰Namotoiyan nia kami talimayo luwedoi mian mombombolo konabuuk; akiyoon tamamu nasinuung yanila daanomo!

¹¹Bulaando moaki mutalimayo ko Mian Bisa nahiburan? Kami basilingan tukon sabar tukon miuk tuuk sambuno.

¹²Bai ikoo nggimal komatamu sumbol-sumbol;

¹³ikoo nggimoliiyo ko Mian Bisa tukon bantayo yana.

¹⁴ Kai moola kobangkapi naakiyo tuuno konasalah? Kai moola nabinisakon doi Mian Bisa salaano?

¹⁵Maukai doi malaekat salaano ko Mian Bisa aki naanggayo; yanila aki namoliyous doi Napatanggal.

¹⁶Bainokai koidan kobangkapi morusak tukon madikito, mokuotiyo kokulokisan buno paisu tolong.

¹⁷Ayub lingele, ikoo naikon kusalitaikene doikoo kolobo meeng,

¹⁸mian mopandoi mootunggulkene doiyaku. Dootungguloo yana talimayo luwedoi nambumbu, tukon binanggadudukon sasaibino doi nakatulunan.

¹⁹Doi tempodoo akiyo komian sangalaasan doinapoo lipu; akiyo komo atapayo yanila luwedoi Mian Bisa.

²⁰Komian molokis lailainggene kotulano, naikon toupiyo kosusah doi natuboan lalomo.

²¹Koala-alalo mobulungan tuuno tapakiike kotolingaino; doi tempo moaman lubat kopondikuk molobosiyo yana.

²²Akiyo komoinian doiyana motolae kokalipookan, sabab sabel pangakate lelenggene yana doi sasamba kotodanan.

²³Kotomisi-tomisi nasar montotiili konatempo matean, yanila kabi nakaane kobajano. Maka yana sadaro baikon kalipookan kona oloyo sinasalaan.

²⁴Kosilakaan bunokai tomundo mobarani, basadiamo naikon mosuoponiiyo.

²⁵Bunomodoiya komian nanasib molawane ko Mian Bisa, tukon barani molawane Komo Balakuasa.

²⁶Tukon yana babanggaal molobosiyo tukon lawane ko Mian Bisa; yana bingkate konatombide, yana aki namangaku kalah.

²⁸Yana manataap doi kota-kota mominanaso, doi bonua-bonua moakiyono kotumbuno. Dokota-kotadoo lapamo tinantukon tuuk tataap teali kota mominas.

²⁹Domianoo nakaasaan naikon lapus akiyo kolaalo; konabuat naikon kabus sasaibino.

³⁰Yana aki naikon natongosobii doi kalipookan tuuno; koaung naikon kopulemo kosopi-sopiino. Yana naikon kabus Mian Bisa suungo mososupaiyo.

³¹Kalu yana anggayo doi moakiyo kogunano naikon yana inokoliimo; tukon posobolino yana naikon motalimayo akiyo koidan konatotuuk.

³²Akiyoon nalaate kotempono, yana naikon matemo, buno kolangaano momolooyu moakimo namanampal koidan.

³³Yana buno anggur batango momatandang kosaono buno zaiton batango momatandang kobungano.

³⁴Komian molokis akiyo naikon konakatulunan; kobonua yana mobangune luwedoi buat tamboan kabus mosua.

³⁵Doiyamo yanila mobatetelkene kokulokisan tukon laksanakene; kobangokoliian sidutu daano doi noano lalomo.”