Read Banggai AYUB 16 Bible Online

AYUB 16 - Banggai bible

AYUB 16

¹Bai Ayub timbiliyo, “Idan luunggon kulengele kopandapat mobuno doiya; komuhiburan tolongokai sakisaawan.

³Oila kotempono kopoo atadeano kobakala-bakalaanoo? oila komo sunggele komuyu tuuk beena potimbili?

⁴Kalukai komuyu nia yaku, tukon yaku komuyu, yakukai moola basilingan pokakana buno doiya. Badaang tuuno komuyu napenuturan; koolunggu naikon sua-sualiling.

⁵Yaku naikon keenggele konoamu tukon moisalomo koteteba daku bantilan-bantilan naikon buno hiburan.

⁶Kalu yaku basilingan, daku susaan aki nambeeng; kalu yaku aki kubiyok, oila koidan kotakoso?

⁷Ko Mian Bisa kubaiyo yaku payah; sasaibino daku kaluargaa linopumo.

⁸Yana tantange tukon lakoyo yaku. Diabudodoo kobutonggu molisuko tuuno, tukon doi mian badaang doiyamo kobukutiino baikon yaku mobaladosamo.

⁹Tukon nggimalan ko Mian Bisa bending-bendinge kobutonggu tukon namisikitan tuuno yana mbalengaku.

¹⁰Komian badaang totulaiyaku tukon tobuka babasal kosuungo; yaku pinook tukon tinapi kopidalinggu.

¹¹Ko Mian Bisa salakanggene yaku doi mian molokis; yaku inotuwong doi mian lokis limano.

¹²Budoiya dakutuboan aman tukon monondok, bai ko Mian Bisa lobosiyaku tukon sosinggot. Yana lakoyo kobulunggu tukon yaku sinakukono; Yana tealikene yaku sasaran tuuk latihan.

¹³Tukon akiyo koseang Yana banggadudul mopanaaku, tobikon sasabulo kotianggu antoko.

¹⁴Yana molobosi buno meeng komian mobaladuang, tukon pokoloniaku badaang luunggon.

¹⁵Yaku pakeyo kokarung susaan paloosano, tukon osulang doi ambata lalomo sabab kinalamo.

¹⁶Memela kodudusonggu sabab kukokiilan; komatanggu lalomo boboongan tukon manampal.

¹⁷Bai yaku aki kulakukene komatikasan; tokita dakusambeang moloyos doi TEMENENO.

¹⁸He dunia, inai moseekene daku kulokisan; inai moaki mubiekene daku nggeleamonan kabiyo kokaadilan.

¹⁹ Yaku toiyo baikon daku pombela daano doi surgaa; Yana kosakisii baikon yaku aki kubaladosa.

²⁰Kotula-tulanggu totulaiyaku tukon kokumbitaku; daanoon mokokiil yaku mangadap doi Mian Bisa mangkabi potombonii.

²¹Ah, boliisi ko Mian Bisa susuungo nabelaaku doi salaano, buno meeng komian mobelayo konasobat tukon sanaang.

²²Daku taun-taun labino akimo koidan nabadaang; naapa koidan yaku tauso tukon akimo naikon kuabali.