Read Banggai AYUB 17 Bible Online

AYUB 17 - Banggai bible

AYUB 17

¹Loolanimo dakumatean, kabimo nakabus dakuansaang; tolongokai bakibulan komo totinggal doiyaku.

²Komian tealikene yaku langge motinotulai; kukitayo bulaa konapoo sokulikanano kosindiran.

³Yaku nia jujur, oh Mian Bisa. Anggaakumo! indee koidan komo motombonii dakubantilan?

⁴Ikoo tutupe konoanoila tobikon aki namangalati; inai sampe yanila lungguiyo yaku diabudodoo.

⁵Mololoi sosombot, indee komo kalaakene kotulano tolongo tuuk nakauntungan, napau-pau susungo naikon mantalima pabalaso.

⁶Diabudodoo yaku sinindir tukon dososombotoo; yanila lubat tuuk tupeiyo kodudusonggu.

⁷Nggalung komatanggu sabab susaan; molisuk kobutonggu posaapon.

⁸Komian mosoleh posibonggon tukon masainding, komian moakiyo konasalah, anggene yaku akiyo daku temeneno.

⁹Komian momonondok tukon moakiyo kona salah pololokon anggayo konandondoong tuboan pokokonoi doi Mian Bisa.

¹⁰Bai kalukai komuyu sasaibino lubat doisumai, akiyo komeeng komiankai mopandoi naikon kulinaat.

¹¹Daku oloyo-oloyo tembeledukono, akimo nateali sasaibino daku tetel; lapus koidan sasaibino konoanggu nabinantil-bantil.

¹²Bai dakusobat-sobat bantile, “Popook doo dodoa tukon madialang kabimo nalubat.” Maukai kutoiyo doi noanggu lalomo baikon tataap kalipookan daku ndondoong.

¹³Tolongo dunia matean daku minoinikon, indaamokai naikon daku mooloan doi kalipookan lalomo.

¹⁴Dakukibulan kusumbuikene “Tamanggu,” tukon nggalang-nggalang mokaane kobutonggu kubantile “Tinanggu” tukon “Utusonggu moluko.”

¹⁵Inaandomokai komoinian motuuk yaku; indee komo kitayo modaano komondokan motuuk yaku?

¹⁶Kalukai yaku obulus doi mian momate nadunia, yaku akiyono daku minoinikon koidan.”