Read Banggai AYUB 19 Bible Online

AYUB 19 - Banggai bible

AYUB 19

¹Bai Ayub timbiliyo, “Bulaando komuyu mobanggadudul nggimoliiyaku, tukon komuyu sakisaayo tukon bantilan?

³Badaang luunggon pototulaiyaku, tukon komuyu loi-lokisaku aki porasayo mammaa.

⁴Kalukai salah daku kokubai, doiya bolikon komuyu porugi.

⁵Komuyu pikikene kobutomuyu lobian monondok luwedoi yaku; dakususaan komuyu anggene kusalaan bukutiino.

⁶Potoiyokai baikon ko Mian Bisa daanoon mosakisaayo yaku, tukon lakoyo doi Napatalonggon lalomo.

⁷Yaku nggimal sabab Nakulokisandoo, bai akiyokai komeeng komian komo palatikanggene yaku. Yaku wookon, “Yaando kokaadilan,” bai akiyo komo ndongoliiyaku.

⁸Ko Mian Bisa tutupe dakuloloon, aki nateali yaku aloi, Yana kubaiyo kalipookan tuuno daku lia-liasan.

⁹Yana lambase sasaibino daku buat, tukon namonondokan Yana rusake.

¹⁰Yana lobosiaku luwedoi sasaibino kololoon, buno mian mokibute kotatanaman anggolo, maka nabatadikene motuul tukon moloyu, bunomo doiya Yana taane daku minoinikon saibino.

¹¹Kai-kaito ko Mian Bisa nanggimalan doiyaku; Yana anggene yaku salaku namusuh.

¹²Kona Pasukan namolobosian aki nateali inatasi; dinimbolo daku loloon, tukon kinepuungo dakusandung.

¹³Dakumotolutusan Yana dedenggene luwedoi yaku; yaku tealimo mian sangalaasan tuuk sasaibino daku potingoniian.

¹⁴Daku: Pamanggonan saibino dedenggene kobutongo; kotula-tulanggu aki naneneeke doi yaku koidan.

¹⁵Dakuata moluko toliminggene indee yaku, napoo tuan; yana anggene yaku mian moakiyoon natingoniiyo.

¹⁶Kuange dakuata, bai yana aki natimbiliyo, maukai kuoluuliyo tukon kumiyukiyo yana.

¹⁷Dakuboloki toluwe mongeekiyo daku ansaang boono, koutusonggu kootan aki naiyase mokolaniyaku.

¹⁸Pau-pau doi loloon totulaiyaku; kalu yaku kokondong, yaku kinokumbit.

¹⁹Kotulanggu pomanaanggonan lasayo ngginggim, kalu kitaaku; yaku tinggalemo yanila mo seseangaku.

²⁰Kobutonggu baimo kulit komo bunguse kobuku; yaku kabimo mate tukon leal daku ansaang.

²¹He tula-tulanggu, poseseangaku, sabab ko Mian Bisa limano umbasaku.

²²Ko Mian Bisa banggadudul tekaane yaku; bulaando komuyu mololoiyo Yana? Kai akiyoon polungguwon momasakisaa?

²³Ah boliisi daku bantilan-bantilan natinulis, sulano nasidutu ninoonook;

²⁴boliisi tukon besi kopangamaat doi batu, sulano nataanan doi tempo lalomo.

²⁵Yaku toiyo baikon doi surgaa daano komo belayo yaku; doibundu Yana naikon lubat motulungiaku.

²⁶Maukai kokulitonggu napako-pakolon tukon mapasa, bai kobutonggu namalumbitan naikon tanggakene ko Mian Bisa.

²⁷Tukon matanggu susuunggu Yana naikon kukitayo, tukon Yana naikon teali kusobat. Manaso konoanggu sabab komuyu bantile,

²⁸‘Bulaando kokubaiyano kalu kita balapulo?’ Komuyu mounggolii sabab tuuk mokubai palakala.

²⁹Bai, diabudodoo matakutenemo kosabel! Sabab ko Mian Bisa nggimal tukon hukume komian mobaladosa; maka komuyukai toiyomo, baikon daano ko Mian Bisa moadilio kobangkapi.”