Read Banggai AYUB 2 Bible Online

AYUB 2 - Banggai bible

AYUB 2

¹Malaekat-malaekat doi surgaa abali mangadap doi TEMENENO, tukon ko Si Iblis daano koidan doi yaniladoo.

²Maka TEMENENO masadai doiyana, “Luwe doiyaa ikoo?” Si Iblis timbiliyo, “Luwedoi ampakonan balausalaan dombalaa doisumai tukon omopokoniiyo kodunia.”

³TEMENENO masadai, “Oilakai lapamo ikoo palatikanggene Ayub Daku peleleani? Posaapon kodunia akiyo komian mobuno doiya konasetiaan tukon namonondokan konoano buno yana. Yana sosubaiyo Yaku tukon akiyoon nalakukene kokulokisan. Yana daano motataap setia doiya-Ku, maukai mulapamo budukiyo Yaku mosilakaiyo yana tukon akiyo koalasano.”

⁴Bai ko Si Iblis timbiliyo, “Noano tukon butongo lobian koanggano luwedoi buat. Bangkapi yase kurbankanggene sasaibino konabuat sulano yana natataap malaat tuboan.

⁵Kalu andeno Ikoo palasakitiyo kobutongo, tantu yana naikon banggadudul kutukiyo Ikoo!”

⁶Maka TEMENENO bantilemo doi Si Iblis, “Monondoko, lakukenemo oilamo tukon yana, asal inai moakateyo yana.”

⁷Maka ko Si Iblis taus luwedoi TEMENENO salaano, tukon lubatene kotakatol doi posaapon Ayub butongo luwedoi aino salaano polong doi oluno bunduno.

⁸Maka Ayub osulang doi naloolanian kolimbut nainatambunan, tukon mangala belangatano bisilo teali pakaluk-kaluk butongo.

⁹Konaboloki bantile doiyana, “Bulaando ikoo modaano tataap setia doi Mian Bisa? Ayo, kutukiyomo Yana, maka matemo!”

¹⁰Ayub timbiliyo, “Ikoo basilingan buno mian molongas! Bulaando kita motolongo yase matalima oila komo monondok luwedoi Mian Bisa, bai komo aki namonondok kita tolayo?” Jadi, maukai Ayub natoupiyo sasaibino dosusaanoo, yana aki namabantil bantilan-bantilan molawane ko Mian Bisa.

¹¹Kosusaan molubotiiyo Ayub lapamo tolu komian kotulano lengele, doiyamo Elifas luwedoi kota Teman, Bildad Suah miano tukon Zofar Naamah miano, yanila pomeenggon sio naduutiyo tukon napoo hibure yana.

¹²Bai salataa doi namododoonan yanila tanggakenemo, yanila kabi akimo natingoniiyo koidan. Yanila kokiil tukon kokobukuan tukon yanila bendingiyo konapakean maka sabukene koambata doi dapang tukon doi oluno.

¹³Pitu kooloyo pitu kopopook yanila osulang doi buta, doi Ayub bibilo, aki namabantil mau meeng kobantilan, sabab yanila kitayo babalat tuuno kona pandalitaan.