Read Banggai AYUB 20 Bible Online

AYUB 20 - Banggai bible

AYUB 20

¹Maka Zofar timbiliyo, “He Ayub, yaku rasayo ikoo tosinggungo, diabudoo yaku yase namosobit beekene dakupotimbili.

³Domubantilan-bantilanoo tutuu mototulai, bai yaku toiyo bulaando daku timbiliyano.

⁴Ikoo aki mutoiyo baikon luwedoi loolukoo, salataa tumbe-tumbeno komanusia nainabosan doi dunia,

⁵komian lokis natedesan tolongo soisikeen, tukon komian lokis nakasanangan tongo sopioman mata?

⁶Maukai konakinabasalan polong doi dapang, sampe kooluno singgile kobunom

⁷maukai yana naikon nalapus sidutu posidutukon, lapu luwedoi dunia tukon kokubai motinotulai. Komian-mian moidano natingoniiyo yana, naikon masadai, “He, inaando konatausan?”

⁸Yana naikon lapus buno pakias doi olumon, lapus buno batokitaan doi popook oloyono.

⁹Komatanggita akimo koidan nakitayo yana; yana akimo koidan nadaano doi natampat dungolan.

¹⁰Doi loolukoo yana mondikuke luwedoi mian motalalais, sio napau-pau komo soboliyo.

¹¹Maukai yana namongula tukon barani, bai naapa koidan yana teali ambata tolong.

¹²Bukamaen maamis kokulokisan doi suungo lalomo! Rasayo seange kalu mosobit nalemese; tobikon doiya yana abese doi alepo bilit, sulano namalumbit kona tamisano.

¹⁴Bai dokinaanoo tobolii doi tiano lalomo teali lasum momosopot babayo komatean.

¹⁵Kona linomos buat mondinikuk, tapakisaa yana toluwekene; ko Mian Bisa kaluare luwedoi tiano lalomo.

¹⁶Komian lokis naikon monginum lasum mokanggiyo kolokisan, yana naikon matekene buno sinoku binda moano koupaso.

¹⁷Yana aki naikon namotoupi zaitun lisisono molobian, kai susu tukon dokot motoku-tokumbe.

¹⁸Sasaibino konauntung sio naabalinggene, konausaha hasilo aki naikon natoupiyo.

¹⁹Sabab yana pipiike tukon allaise komian moakiyo koona; yana lambase kobonua-bonua mobolikon yana komo bangune.

²⁰Sabab namodokoan motodudulo lobian, maka yana akimo naikon nateali biyai.

²¹Kalu yana kaan sasaibino inakabus, tobikon doiya konamonondokan aki natataan.

²²Salataa tuboi konamonondokan, kosusaan tukon matean lubat motepokiiyo.

²³Salataa yana sibuk mototuiyo kotiano, ko Mian Bisa teali nggimal tuuno tukon hukume.

²⁴Kalu yana obulen basilaton luwedoi sabel besi, yana pinokoloni pana tambaga.

²⁵Yana kanakon pana, tobikon napakolon; pana mangano mangkilap tadule kobutongo, maka komatakutan kuasaiyomo konoano.

²⁶Manaso sasaibino konabuat inabos; yana tukon sasaibino konakaluargaa tosua doi aung mobolikon bangkapi komookoitiyo.

²⁷Kotimbu bukayo konakulokisan; kodunia bangkit molawane yana.

²⁸Sasaibino konakaasaan naikon kabus, sabab ko Mian Bisa nggimalo tuuno.

²⁹Doiyamo komian lokis natuboan, Mian Bisa natuboan tinantukon doiyana.”