Read Banggai AYUB 21 Bible Online

AYUB 21 - Banggai bible

AYUB 21

¹Ayub timbiliyo, “Ndongoliiyo oila naikon daku binantiloo; tolongo doiya daku kinabi salaku hibulan.

³Pataikanakukai kumabalos silingan, nalapa doiya moolamo koidan pomototulai!

⁴Bolikon tukon bangkapi daku podangaanian, jadi aki nabulaandokon kalu kinduungo daku sabaran.

⁵Mbalengakukai, maka komuyu naikon manganga, komuyu totuku tukon aki pobasilingan.

⁶Kalu kupikikene daku ndondoong nia yaku mbombokon sabab matakut.

⁷Bulaando ko Mian Bisa mobeena tuboan momalumbit doi mian molokis, tukon konapoo buat pololokon tosuungi?

⁸Yanila sukupo malumbit konatuboan sampe kitayo konapoo tumbu motealimo tabo.

⁹Konapoo bonua tumbuno sidutu aman; ko Mian Bisa aki nalubatene kosilakaan doiyanila.

¹⁰Konapoo iyayon piniala pololokon mosuungi, tukon akiyo konakasulitan, momosuung.

¹¹Komian lokis napau-pau osuut tukon tedes, buno domba mongula mosu-osuut.

¹²Linolaing rebana, seruling tukon kasapi alalo, yanila lame momanani tukon osu-osuleng.

¹³Yana akabusemo konaoloyo-oloyo doi lalabaan lalomo tukon yanila mate doi podamean lalomo.

¹⁴Baanggokai yanila lapamo bantile doi Mian Bisa, “Pobadodoonggonokai doi kami tukon potauso! Kami aki mapaduli tukon aki maiyase momangalati komu makisud tukon Mumongiasan motuuk doimai tuboan.”

¹⁵Yanila pikikene, “Moleleaniyo ko Mian Bisa akiyo konatotuuk, tukon basambeang doiyana akiyo kotakoso.

¹⁶Bolikonkai sabab ndabukuanan tolong, laatemokai sasaibino komakisud tukon mopinakituu?” Bai yaku naikon sabole-bole aki kuyase tukon pikilan naambakonan tukon pandapat mobuno doiya.

¹⁷Kai biasamo mopinosoi komian lokis naposi, kai balaa tukon silakaan lupayo yanila? Kai biasamo ko Mian Bisa nggimoliiyo yanila, sampe yanila Yana ukume?

¹⁸Kai biasamo yanila buno paoli batango tukon ambata sokoi mopuule tukon mbobuul moalo?

¹⁹Komuyu bantile, “Ko Mian Bisa ukume ko Pau sabab tamano nalalim.” Bai kubantilan: Mian mobaladosa, doiyamo ko Mian Bisa sio nahukume, sulano yanila toiyo baikon sabab yanila nalalim, maka Mian Bisa kirime Kona ukuman.

²⁰Sobiiyo komian modaano konalalim natanggunge konalalim susuungo, sobiiyo natoupiyo ko Mian Bisa Moinakatandak Tuuno nanggimalan.

²¹Kalu kobangkapi kabuso konatempo doi dunia, kai yana daanoon moneneke kona kaluargaa nasanang?

²²Kai moola kobangkapi naotunggule ko Mian Bisa, sabeakai Mian Bisa susuungo komo ukume lobo matubo doi surgaa?

²³Daano komian moaki namasakit doi tempo natuboan; yana mate tukon monondok tukon sanaang. Kona matean tenang rasa sanang, bai kobutongo daano mobukuan.

²⁵Bai daanokai komo mate sakisaa, aki natoupiyo konamonondokan.

²⁶Mau doi kibul, yanila polaing-laing tongokoolo; tinokuuni besuk tukon ngganggalang.

²⁷Bisakai yaku toiyo oila kopoo pinikikon, tukon sasaibino kokulokisan pobinatetelkon.

²⁸Mupasadai, “Inaando doponguasadoo nabonua molakukene kokokubai palalentelan?”

²⁹Kai akiyoon posadaiyo komian badaangoo lunggon nataus? Kai aki poanggayo konapoo bilita pinolonggon?

³⁰Yanila bantile, “Doi oloyo ko Mian Bisa nabeenano ukuman, sasaibino komian lokis naikon sinalamaton.”

³¹Konakalakuan akiyono komo gugate; akiyono komo balase konakulokisan.

³²Yana binaba doi bakibulan, tukon inusokon doi buang lalomo; kona kinibulan dinagai tukon binilisii.

³³Doi lolono komian moampakon polainggene kobajano; tukon muyuk kobuta koidan sokoiyomo yana.

³⁴Jadi, domuhiburandoo kosong tukon sasaibino komupotimbili kala!”