Read Banggai AYUB 22 Bible Online

AYUB 22 - Banggai bible

AYUB 22

¹Maka Elifas bantile, “Doi antara bangkapi, akiyokai komeeng komian modaano konatotuuk doi Mian Bisa. Komian mopandoi tuuno bapikil, tolongo daano konatotuuk doi butongo susuungo.

³Oilakai daano konatotuuk doi Mian Bisa, kalu ikoo lakukene Namongiasan? Oilakai daano konauntung tuuk Yana, kalu komutuboan monondok?

⁴Bolikon sabab mumatakutan doi Mian Bisa, ikoo linait tukon inaanggon salah,

⁵bai sabab badaango tuuno komulalim, tukon kulokis tuuno komu kokubai tukon mukalakuan.

⁶Kalu koutusomu aki namola beale konasamea, ikoo rambase sasaibino konapakean.

⁷Komian mopakadak aki mubeena monginum, komomalaal aki musadiakene kokinaan.

⁸Ikoo pakeyo kobasambuan tukon kuasa sulano mualayo sasaibino kobuta.

⁹Aki natongo sasaibino kobalu komo aki mutulungiyo, bai ikoo lailainggene koidan kopautuboon.

¹⁰Tobikon doiya doi mupotikunggonan, diabudodoo moonomo talong, tukon soi-sosinggot konoamu matakuto.

¹¹Kooloyo polokono kalipookan, akimo nateali ikoo mokita; ikoo tombul linupokii eaba mobabasal.

¹²Bolikonkai Mian Bisa komo dungoliyo kotimbu motatandak, tukon mbalenge doi bilit, doi mandala-mandala motatandak tuuno?”

¹³Maukai mumasadaikene, “Toiya oila Yana? Yana daano doi bunom tonggulungo tukon aki nateali moadiliyo kita.

¹⁴Ikoo anggene baikon Kona pambaleng totonggupi bunom tukon baikon tolongo doi kalatan antara timbu tukon buta Kona ampakonan?

¹⁵Oilakai ikoo tataap loloiyo komian badaang molokis naloloon linilik?

¹⁶Yanila inakate doi naakiyoonan nalaate konatempo matean, tukon maanuso eaba molupayo.

¹⁷Doiyamo yanila mobarani tolayo Komo Balakuasa, tukon anggene Yana aki nateali mokubai oioila doi yanila.

¹⁸Baanggokai Mian Bisa komo lapamo tealikene yanila kaasa! Tutuu aki kumangalatikene komian lokis napikilan!

¹⁹Komian monondok, kokumbit moonoh tedesan, kalu nakitayo komian lokis momalaat ukuman.

²⁰Sasaibino komian lokis nalobo manaso, tukon aung suayomo kabus oila komo daano mototinggal.

²¹Nah, Ayub, podamemo tukon TEMENENO, sulano mumalaat kaamanan. Kalu ikoo lakukene doiya, tantu ikoo malaat untung.

²²Talimayomo oila ko TEMENENO nainotunggukon doi komuyu; abesemo doiya sasaibino doi noamu lalomo.

²³Abalimo doi TEMENENO tukon noa monondok siokai muatadeyomo kokulokisan doi mubonua.

²⁴Sakukenemo komu mosoni motuleng tuuno; lambitemokai doi paisu batango momotuulo taalikon doi bilit.

²⁵Sodiikenemo Komo Balakuasa nateali mumosoni, tukon musuasa momonondok tuuno.

²⁶Maka kalu moola anggayo mosidutu ko Mian Bisa, tukon toiyo baikon Yanamo komonondokan naluean.

²⁷Kalu ikoo sambeang, yana naikon timbilikon, tukon ikoo moola tapaatiyo sasaibino komu perjanjian.

²⁸Komuusaha sidutu naikon daano kohasilo tukon madialang naikon kadilongiiyo komutuboan.

²⁹TEMENENO kependeo komian mobabanggaal, bai komo kependeo konoano sinalamaton.

³⁰Ko Mian Bisa naikon tulungiyo ikoo kalu ikoo aki musala, tukon kalu ikoo lakukene konamongiasan.”