Read Banggai AYUB 23 Bible Online

AYUB 23 - Banggai bible

AYUB 23

¹Bai Ayub timbiliyo, “Yaku momuluk tukon bebe doi Mian Bisa; aki kumoola tahane komo binebekon.

³Ah, kalu moola kutoiyo konatampat Yana daanoan, sulano kumoola taus tukon pososuunggana Yana.

⁴Maka kusasalaanikene doi Yana daku perkara nia, luwedoi suunggu tabantil kobantilan-bantilan kopombelaan.

⁵Yaku yase toiyo oila naikon Yana nabinantil, tukon bulaando Yana nabenano potimbili.

⁶Oilakai Yana naikon tuuse Nakuasa doiyaku? Aki! Yana tantu naikon ndongoliiyo daku bantilan-bantilan?

⁷Yaku aki kusala tukon moola belayo kobutonggu doi Salaano, maka yaku naikon inatakanggon mobebas sidutu posidutukon.

⁸Kuunggoliiyo ko Mian Bisa doi tolopot, talise, lalom tukon lembet, bai doiyayaa ko Mian Bisa akiyo; tukon yaku aki kumoola posuunggene Yana.

¹⁰Maukai Yana toiyo sasaibino dakuloloon koidan sasamba daku laakonan. Kalu buno mosoni yaku inudi, naikon konabukutii baikon konoanggu bilisii.

¹¹Yaku taat tukon setia doi Yana; akiyoon naidan kulias luwedoi loloon Natinantukon.

¹²Yaku sidutu loingiyo ko Mian Bisa naparentah-parentah, Namongiasan kuloingia, bolikon kumoinian susuunggu.

¹³Mian Bisadoo aki nabolii; akiyo komo moola lawane Yana. Yana lakukene oila Konamongiasan.

¹⁴Yana naikon jalananggene Narencana tuuk yaku, tukon daano badaang koidan Narencana bailon.

¹⁵Sabab matakutene Yana, yaku mbombokon; pololokon sasaibinodoo kupikikene, yaku pololokon matakutene.

¹⁶Komo Balakuasa manasemo sasaibino daku baranian. Yaku matakut sabab Mian Bisa, tukon bolikon sabab kalipookan tuuno, maukai dokalipookanoo naboilingiyaku, tukon tutupiyo kodudusonggu.