Read Banggai AYUB 27 Bible Online

AYUB 27 - Banggai bible

AYUB 27

¹Ayub banggadudukene konakatalangan, konabantilano, “Tolongo Mian Bisa motubo, moaki nabeenggu kaadilan,

³Yaku batotopi: Ko Mian Bisa modanon mobeenggu ansaang, doi nadaanoan koansaang doi butonggu lalomo,

⁴kosuunggu akimo naikon namabantilan-bantilan mokala, koaleponggu akimo naikon nabantile kobakokoliian.

⁵Jadi, aki kuiyase bantile baikon komuyu kana; yaku palataanggene sampe mate baikon aki kulokis.

⁶Yaku tataap bataani doi kumololean, tukon konoanggu lalomoo sidutu bilisii.

⁷Boliisi dakumusuh nainukum salaku mian mopalalentel, tukon nabinobokii dakulawan salaku mian molokis.

⁸Kai komian molokis daano konamoinian doi tempo ko Mian Bisa natuntutano konaansaang?

⁹Kai ko Mian Bisa naikon lengele konakokiilan kalukai kosusaan lubotiiyo yana?

¹⁰Siokai yana rindukanggene kosanaangan moluwedoi Mian Bisa, tukon sambeang doi Yana aki nalasayo pakadak.

¹¹Kuotunggulikene naikon komuyu kaliangano nababasalan ko Mian Bisa nakuasa, kopopitoikene doi komuyu Mo Balakuasadoo natetel.

¹²Bai, komuyu sasaibino lapamo pokitayo susuumuyu, Jadi, bulaando komuyu mobeena otinau moakiyo koalatino?”

¹³Maka Zofar bantile, “Bunonaiya ko Mian Bisa Mo Balakuasa natetel naukumano komian modano konalalim tukon moaki nataat.

¹⁴Kalu badaang konapau, yanila naikon mate doi polobosian lalomo tukon konapau tumbu naikon tubo daano konakakulangan.

¹⁵Konapau mototinggal, mate sabab panakit, tukon kobalu-baluno aki nakokiiliyo yanila.

¹⁶Moolakai kona suasa nabadaang kotambuno tukon naposusuni konapakean,

¹⁷bai suasa tukon pakeanoo sasaibino naikon teali mian momoliyous konoano koona.

¹⁸Mian molokis nabonua manas buno loa-loa natelea, tolongo bonua sementara buno mian badagai tenda.

¹⁹Yana nggenggela kobutongo salaku mian mokaasa, bai yana aki nateali ulange, salataa yana bangun luwedoi namooloan, lapuso sasaibino konakaasaan.

²⁰Komominatakuton lupayo buno paisu eaba mososinggot lubat. Mbombuul makansang doi tempo popook puule tukon saakene yana nataus.

²¹Mbombuul tolopot bingkate yana, tukon sapuwo luwedoi nabonua.

²²Yana binupa akiyo koseang tukon pakisaayo obulen mounggolii soopan.

²³Konaotuwongan mian sambute tukon balaupan; doiyayaa yana malaat totulai.”