Read Banggai AYUB 28 Bible Online

AYUB 28 - Banggai bible

AYUB 28

¹Doiyaa kosuasa napinosuunggonan daano kobakalian; daano kotampat doiyaa komosoni nakinindokan.

²Besi kinali luwedoi buta lalomo; kotambaga inala luwedoi batu.

³Kopopook molondomikon tuuno inompokonii, tampat moatean tuuno sinolidiki. Idoo doi kalipookan lalomo komian mounggolii batu-batu.

⁴Doi tampat moodoon moakiyo komo dungoliyo, moakiyoon napomanaanggon motinudang tukon linoloi, komian mobalimang bakaitude doi alos loloon doi buta lalomo mokiis kolipu.

⁵Kobuta hasilo tuuk banggapi nakinaan, bai doi butadoo koidan doi bilit, sasaibino pinajeko tabongkar tobikon ngganggala buta antoko sasabulo.

⁶Batu doi buta lalomo kona warna sasamelaong, tukon koambatano koantoko mosoni tuu.

⁷Alai belengga aki natingoniiyo kololoon dombalaa, tukon kotomisi kolu akiyoon nabenga idan doi bunggono.

⁸Singa tukon iyayon bailon mobarani akiyoon naidan mololoi loloon mokiis kona tujuiyo badombalaakon.

⁹Komian mokalio kobatu lalomo maukai namatikas, yana bongkare kobunggul polong doi anggolo.

¹⁰Salataa yana mokubai loloon doi bunggul batu lalomo, yana laate komutia moano koanggano tuuno.

¹¹Yana kaliyo polong doi paisu-paisudoo naluwean, maka yana tobuatene oila komo tosookon.

¹²Bai inaandokai konda moolaan umboliiyo komontoiyan? Doi yaandokai kona malaatan otunggul sulano ndamangalatikene?

¹³Komontoiyan akiyo doi bangkapi tanga-tangano; akiyo komo toiyo koanggano motutuu.

¹⁴Doi tobun lalomo nadumbakan tukon ndalangon bantil baikon komontoiyan akiyo doiyana.

¹⁵Komontoiyan aki namoola sinoboli maukai tukon mosoni tuu, tukonkai salakadoo aki nailaat inoli.

¹⁶Mosoni tukon momontontilang modaano koanggano tuuno aki namoola pokakana koanggano.

¹⁷Mosoni kai sulumin moalus aki napokokonoi tukon yana, aki nateali bineal tukon mosoni natampat.

¹⁸Komontoiyan tatandak tuuno koanggano luwedoi merjan, kristal, kai mutiara.

¹⁹Batu topas motuleng tukon mosoni tuu, kiduung koanggano luwedoi pikilan.

²⁰Doiyaandokai konaluwean dopandoiyanoo? Doiyaandokai konda malaatan pangalatian?

²¹Akiyo kolobo motubo biasa nakitayo, maukai tomisi doi dapang aki namokita.

²²Matean tukon sakisaawan kai bantil, yanila tolongo molongol salita-salita tolong.

²³Tolongo Mian Bisa komo toiyo komontoiyan natampat daanoan, tolongo Yana komo toiyo kololoon dombala,

²⁴sabab Yana kitayo kodunia bundu-bunduno; sasaibino kolobo doi timbu tailokon bilit Yana palatikanggene.

²⁵Salataa kombombuul binee Nabukuanan, tukon tinatapkanggon kotobun kalatano.

²⁶Salataa Yana tantukanggene koudan natampat lubatan tukon kodidip maka guluk naloloon linoloi.

²⁷Doi tempodoo doiya komontoiyan Yana kitayo Yana ujio koanggano maka binekon Yana, Yana restuiyo.

²⁸ Ko Mian Bisa bantil doi bangkapi, “Sulano malaat montoiyan siokai, poodotiiyo ko Mian Bisa. Sulano pomoola mangalati, kokulokisan sio podedeenggene.”