Read Banggai AYUB 29 Bible Online

AYUB 29 - Banggai bible

AYUB 29

¹Ayub banggadudukene konasilingan, nabantilano,

²“Boliisi dakutuboan nabuno koidan doi lolukoo, tempodoo Mian Bisa nalindungiyano yaku.

³Yaku sidutu yana bambenggu tulung, yana kadiolongiiyo doi tempo kuampakonan doi kalipookan lalomo.

⁴Doiyamo daku oloyo-oloyo monondokan, salataa ko Mian Bisa sanaang molindungiyo daku bonua.

⁵Tempodoo, Mo Babasal konakuasa daanoon molaingaku, tukon dakupau-pau daanoon doi kupotikunggonan.

⁶Daku iyayon piniala badaang tuuno kosusu nahinasilkanggon. Daku kayung-kayung zaitun lisisono badaang tuuno, maukai doi buta mobatuon konasinakakonan.

⁷Kalu sasaibino kokota kolaka-lakaino polaing moosulang, yaku mangala osulangan doi yaniladoo,

⁸saakonokai kotabo-tabo, tukon mosobit sambuno yanila kitayo yaku. Koidan kolaka-lakaino kokondong tukon namontoiyan; tuuk momebee pongodotii.

⁹Mau sasaibino kosambu bai tade mobantil-bantil,

¹⁰tukon mian motaangga akimo nabasilingan.

¹¹Maukai indee komiano masainding kalu molongol tentang yaku, indee komo kitaaku nggaale daku jasa.

¹²Sabab komian motalalais momakabi bantuan yaku tulunge; yaku belayo kopau tuboon moakiyo konabuat.

¹³Komian mosusah nggaale yaku, yaku tulungiyo kobauntal tobikon yanila tanaang.

¹⁴Daku kokubai monondok akiyo kososiboliino; yaku sidutu palataanggene kokaadilan.

¹⁵Bai komian piit, yaku komo teali matano tukon komian molemat, yaku teali aino.

¹⁶Tuuk mian motalalais, yaku teali tamano; tuuk mian molulubaton, yaku teali napembela.

¹⁷Bai komian mongginggimolon nakuasa, yaku lotoyo, tukon yaku salamatene yanila sosubakon.

¹⁸Yaku moinikene kumalaat tuboan momalumbit, tukon mate tanaang doi kubonua susuunggu.

¹⁹Yaku buno kayung momolumbang konatuboan, koanggolo sukup paisu tukon soiluk mbetokiiyo kolangaano.

²⁰Sasaibino komian sidutu nggale yaku, tukon aki nabiasa mbeeng daku bukuanan.

²¹Kalu yaku mongotinau, komian-mian aki nabiyok; sasaibino daku bantilan yanila ndongoliiyo tukon tutuu.

²²Sambuno lapa yaku basilingan, akiyokai komo palaluu sinuungi; kobantilan telem buno paisu udan mototook.

²³Sasaibino komian talimayo dakubantilan-bantilan tukon sanaang, bunokai tani miano motalimayo koudan bunga tempono.

²⁴Yaku boit doi yanila salataa yanila susamo; kodudusonggu mosanaang suungiyo konapoo bukuanan.

²⁵Yakumo komo taaniyo kokatua, tukon kubaiyo sasaibino kokaputusan. Kukatuaiyo yanila buno tomundo doi napasukan tanga-tangano, tukon kuhibure yanila doi napoloonan lalomo.