Read Banggai AYUB 31 Bible Online

AYUB 31 - Banggai bible

AYUB 31

¹Yaku paladadimo tukon totopi akimo naikon kumbalenge kopauboine tukon konapisuu.

²Oilamokai ko Mian Bisa nailakukon doi kita? Bulaandokai konapabalas kobangkapidoo napalabuatan?

³Tutuu yana lubatene kosilakaan tukon kosoean doi mian mokubaiyo kokulokisa!

⁴Ko Mian Bisa tantu toiyomo sasaibino daku kokubai; Yana kitayomo sasaibino daku laakonan.

⁵Yaku batotopi baikon akiyoon naidan yaku momalawan akiyoon koidan kubiasa moakakene komian.

⁶Sodiiyomo ko Mian Bisa natimbange yaku doi timbangan mosah bunggono, maka Yana naikon toiyomo baikon akiyo dakusalah.

⁷Kalukai yaku liaso doi loloon mobisa, kai daano konoanggu doi langge molokis, kalu kolalim kaditiyo kolimanggu,

⁸maka sodiiyomo komian bailon nakaane oila daku tinipas, tukon namanas sasaibino daku buta hasilo.

⁹Kalukai biasa daano konoanggu doi tulanggu kuponggaupan naboloki, tukon tosookon, kusopitiyo yana doi tataapon sembeleng,

¹⁰maka sodiiyomo dakuboloki namasaanggene komian bailon; sodiiyomo namoolo doi malane bailon nakoy.

¹¹Kalu yaku takainomo lakukene dolalimoo molokis, yaku patas kumatalima ukuman.

¹²Dolalimoo silakaiyo buno naraka aungo, yana suayo kabus sasaibino dakubuat.

¹³Salataa kabalatan daku ata sabab yaku salakene konahaak, kundongoliiyo yana maka kukindeke yana tukon noa moloyos.

¹⁴Kalu aki, sio nabulaando daku sasalaanano daku Mian Bisa? Doi tempo nalubatan moadiliyaku oila daku potimbili?

¹⁵Bolikonkai Mian Bisa komo pasitakayo yaku, tukon mopasitakayo koidan daku ata-atadoo?

¹⁶Akiyoon nabiasa aki kuiyase motulungiyo komian motalalais, kai sodiikene sasaibino kobauntal natubo susah konoano.

¹⁷Akiyoon nabiasa yaku batadikene kopau tuboon namalaal, sabeakai yaku susuunggu sukup daku kinaan.

¹⁸Yaku pialayo yanila salataamo doi napau-pauan; sampe yaku mate dakubimbingano yanila.

¹⁹Kalu kukitayo komian mokakulangan, tango natalaisan aki nanggola mongoli pakean,

²⁰yaku kotolonosiiyo yana tukon toik wol luwedoi kudomba buluno susuunggou, maka yana naikon nggaale yaku tukon tootubo konoano.

²¹Kalukai biasamo yaku loilokise kopau tuboon, sabab anggayomo baikon daku palakala naiko manaang,

²²sobiiyomokai namoloto loluakon kolimanggu sulano natangalaas luwedoi bengenggu.

²³Akimokai kumokubai bunodoiya, sabab ko Mian Bisa naukuman todudul nggabute konoanggu.

²⁴Akiyoon nabiasa yaku balaanggene dakubuat,

²⁵kai babanggaakene dakukasaan.

²⁶Akiyoon kubiasa mososubaiyo kooloyo matano momontontilang monondok kai kobituwon laango momonondok.

²⁷Akiyoon nabiasa daano konoanggu doiyana, kai kulipate kolimanggu sulano kuodotiiyo.

²⁸Lalim mobuno doiya pantas nainukum mate; sabab ko Mian Bisa Mo Balakuasa akimo nainangga.

²⁹Akiyoon nabiasa yaku balasanaang sabab daku musuh sakisaa, kai tedes-tedes sabab yana malaato silakaan.

³⁰Yaku aki kusambeang tuuk namatean daku musuh; aki nabiasa yaku mokubai lalim mobuno doiya.

³¹Komian-mian mobalimang doiyaku toiyo, baikon indemo komian yaku talimayo doi kubonua.

³²Dakubonua tobuka tuuk doi mian mopakataus aki nabiasa kusodiikene yanila namoolo doi loloon.

³³Komian bailon seekene konalalim, bai yaku aki kubiasa mokubai buno yanila.

³⁴Komian napandapat aki kumatakutene, tukon komian natotulai, yaku aki kupaduliyo Yaku aki kubiasa dungol doi bonua kai aki kubiyok tolong, sabab tolongo matakutene naikon natinotulai.

³⁵Akiyokai komian moiyase mondongolii daku bantilan-bantilan? Kubatotopi baikon bisamokai sasaibindoo. Boliisi Komo Balakuasa natimbiliyo yaku. Kalukai komusuh tuduwe doiyaku tinulis sasaibino sulano kukitayo,

³⁶maka tukon babanggaal naikon kupaase doi bengenggu, tukon salaku songgo kualambete doi olunggu.

³⁷Naikon kupelenggene doi Mian Bisa sasaibino daku kinubai; naikon kusasalaane Yana tukon babanggaal tukon taangkat koolunggu.

³⁸Kalukai buta kupinasol lapamo kundikuke, tukon kulambase luwedoi tumbuno tuuno,

³⁹kalukai kohasilo kabuso kukaane, tukon patani mosakakene kusodiikene namalaal.

⁴⁰Sodiiyomo nabolikon jelai tukon gandum komo tubo doi asi, bai kayung mosoniton tukon bulung padang.” Lapamo Ayub nabantilan-bantilan.