Read Banggai AYUB 32 Bible Online

AYUB 32 - Banggai bible

AYUB 32

¹Sabab Ayub anggayo tuuno kobutongo naikon natalakanaan, maka tolu konasobatoo akimo nayase natimbiliyo koidan.

²Bai idoo daano komeeng komian kosambuno Elihu Burakheel napau, meeng komian mobatulunanggene Bus luwedoi Ram namondopulian. Yana aki namoola tahane konanggimalan, sabab Ayub bisakene kobutongo susuungo tukon salakene ko Mian Bisa.

³Yana koidan nggimoliiyo Ayub nasobat toluiladoo sabab yanila aki namoola lawane Ayub nabantilan-bantilan, maukai yanila nasalakene.

⁴Elihu momongula tuuno doi antara yanila, tobikon doiya yana totiili polong lapa sasaibino basilingan.

⁵Sambuno kitayo baikon mian motoluiladoo aki namoola motimbiliyo, yana nggimalo,

⁶tukon bunonaiya konabantilan, “Yaku daano motabokon, bai komuyu motuamo, tobikon doiya yaku matakut tukon baingotii momatailukene dakupandapat.

⁷Yaku pikikene, komuyukai komo sio pobasilingan, momotuamo tuuno sio naebese namontoiyan.

⁸Bai komo beena montoiyan doi bangkapi, tolongokai Mian Bisa Naroh Mo Balakuasa.

⁹Komian moteali pandoi, bolikon sabab tatandako konaumur; komian momangalati motalakana, bolikon sabab tatandak konaumur.

¹⁰Tobikon doiya, ndongoliiyo yaku; pataikanakumo kubantile dakupandapat.

¹¹Tukon sabar yaku momondongolii doi tempo pobasilingan, tukon mototiili salataa komuyu mounggolii pandoiyan mobantil-bantil.

¹²Kupalatikanggene tukon tutuu; kundongoliiyo komuyu moposuunggenemo komo aki nateali. Ayub nasalaan doi nabantilan-bantilan aki pomoola buktikanggene.

¹³Bulaando kopoo bantilano baikon komuyu molapamo laate komontoiyan? Sabab komuyu tapakisaa kalah. Tolongokai Mian Bisa komo moola timbiliyo Ayub.

¹⁴Ayub nasilingan doikoomokai, tukon bolikon doiyaku, bai yaku naikon aki kumotimbili buno komuyu.

¹⁵Ayub, yanila bingung tukon akimo namotimbili; akiyono komo moola yanila bantile.

¹⁶Yanila kokondong tolong, akimo koidan nabasilingan. Kai sio kumototiili maukai yanila naakimo nabiyok?

¹⁷Aki, diabudodoo naikon kutimbiliyomo; yaku naikon pelenggenemo dakupandapat.

¹⁸Akimo koidan kusabar momototiili. Akimo namoola koidan kutaane dakubantilan-bantilan.

¹⁹Kalu akimo kubiyok tolong, naikon yaku susahmo buno bondeng momoonoh tukon anggur moboolu.

²⁰Sio kubasilingan sulano natanaang konoanggu; sio kubukayo kosuunggu tukon kumebee potimbili.

²¹Mau indee akiyo daku binela nai podangaanian nia lalomo tukon akiyo komeeng komiankai naikon daku ngginaal-nggaal.

²²Mau kokubai nggaalano komian, aki kutoiyo, tukon kalukai yaku lakukene doiya, Ko Mian Bisa naikon mosobit naukume yaku.