Read Banggai AYUB 33 Bible Online

AYUB 33 - Banggai bible

AYUB 33

¹Diabudodoo, he Ayub, ndongoliiyokai tukon tutuu nabantilan-bantilan nia yaku naikon mopolonggene.

²Yakukai siapo naikon mobantil-bantil.

³Tukon noanggu namoloyosan yaku basilingan, daku binantil daanoon motutuu.

⁴Ko Mian Bisa Naroh pasitakayo yaku tukon beena tuboan doiyaku.

⁵Jadi, kalu moola, timbiliyomokai yaku. Sadiayomokai komu pembelaan.

⁶Doi Mian Bisa, ikoo tukon yaku akiyo konaposasalaan luwedoi buta kondakinubaiyan.

⁷Jadi inaimokai momatakutanaku; aki kumakisuutiyo mokalayo ikoo.

⁸Jadi, lapamo kulengele oilano komu binantil, tukon yaku mangalatikene oila komu minakisuuti.

⁹Ikoo bantile, ‘Yaku bilisii, aki mokubai palanggaran. Yaku akiyo kososiboliimo tukon aki kumokubai kasalahan.

¹⁰Bai ko Mian Bisa mounggolii sabab molawane yaku, tukon lakukanggene yaku buno musuh.

¹¹ Yana konoikene korante doi ainggu; tukon awasiyo sasaibino dakusipat-sipat.’

¹²He Ayub, komupandapat salah tuuno? sabab ko Mian Bisa babasal tuuno luwedoi bangkapi.

¹³Bulaando ikoo molaite ko Mian Bisa baikon Yana aki napaduliyo kobangkapi namondommukan.

¹⁴Ko Mian Bisa nabasilingan tukon moisalomo kokaliangano, bai akiyokai komeeng komian mopalatikanggene konabantilan.

¹⁵ Daanoon komian momoolo tombosookon doi tempo popook; ko Mian Bisa basilingan doi olumon tukon doi batokitaan lalomo.

¹⁶Ko Mian Bisa sumboliiyo yanila namondongolii; Yana donggalaiyo yanila tukon panganukon-panganuukon.

¹⁷Konamakisuut sulano napoo tade momokubai lalim tukon tinggalemo konapoo batinggaiyan.

¹⁸Yana aki nasodiikene yanila motaupe kokulokisan; yanila dinagai luwedoi matean.

¹⁹Ko Mian Bisa nggalakene komian tukon lubatene kopanakit tobikon sasaibino kobutongo yana neemiyo malalas.

²⁰Momasakitoo akimo naiyase kaan, kokinaan momonondok tuuno kai tinoluwekon.

²¹Kobutongo teali molisuk tuuno, kobuku-bukuno tokita sasaibino.

²²Yana kabimo mate, komian namate nalipu loolanimo doiyana.

²³Baanggokai daano komeeng ko Mian Bisa namalaekat moingotiikene kobangkapi nalimang, naikon lubat tulungiyo yana.

²⁴Tukon sedih domalaekatoo naikon bantile, ‘Sodiiyomo yana, aki namoola yana loboson doi mian mate nalipu. Naiyadoo kodoy potolos, sulano yana natongosodii koidan.’

²⁵Kobutongo naikon teali bukuan barani sehat buno tatabo.

²⁶Kalu yana sambeang, ko Mian Bisa naikon seseange, maka yana naikon nggaale ko Mian Bisa tukon sanaang, tukon ko Mian Bisa naikon abalinggene konandondoong.

²⁷Maka doi mian badaang salaano yana naikon bantil, ‘Molokis kuanggene monondok, babasalo dakudosa, maukai ko Mian Bisa naaki naukumaku.’

²⁸Ko Mian Bisa pantane yaku motaus doi mian mate nalipu tobikon diabudodoo yaku daano motubo.

²⁹Tukon abali koidan, ko Mian Bisa lapamo lakukene sasaibino nia,

³⁰sulano yana namoola salamatene kobanggapi, tukon beena namonondokan doi natuboan lalomo.

³¹Maka Ayub ndongoliiyo, dingate kotolingaimu inai mobiyok, diabudodoo yakumo komo basilingan.

³²Bai kalu daano komu binantil silakan basilingan; tukon kalu ikoo bisa, yaku naikon sadia momangakukene.

³³Bai kalu aki, inai mobiyok tukon lengelemo yaku, yaku naikon otunggulikene komontoiyan doikoo.