Read Banggai AYUB 34 Bible Online

AYUB 34 - Banggai bible

AYUB 34

¹Bolikonkai komuyudoo tukon daano kopoo pikilan? Nah ndongoliiyokai sasaibino daku binantil nia.

³Komian toiyo kokinaan momonondok kalu yana tamisemo, tukon pandoi bantil-bantil kalu yana lengelemo.

⁴Naiya haalia sio nda palesayo maka ndapikikene singgat-singgat.

⁵Ayub bantile, ‘Akiyo kosalah doiyaku, bai ko Mian Bisa aki naiyase beekene doiyaku komoadil.

⁶Yaku inaanggo kala-kala, sabab mobantile yaku akiyo dakulalim. Diabudoo babasalo dakupakol maukai naakiyo dakusalah?’

⁷Komuyu monggitamo komian mobuno Ayub nia? Yana sosiboliiyo ko Mian Bisa bubula luunggon.

⁸Yana yase polaing tukon mian-mian moaki nataat tukon pogouli komian-mian molokis.

⁹Yana bantile baikon akiyo kotakosokai kalu yana kakaate molakukene ko Mian Bisa namongiasan.

¹⁰He mian-mian mopandoi, ndongoliiyo! Bulaa konatealian ko Mian Bisa Mo Balakuasa momokubai salah?

¹¹ Yana otungguliyo kobanggapi pokonoikene konakokubai, molakukene yana pokokonoi kona kalakuan.

¹²Ko Mian Bisa Mo Balakuasa aki nalakukene kokulokisan, sasaibino komian yana beekene kokaadilan.

¹³Luwedoi indee ko Mian Bisa natalimaano Konakuasa? Indeekai komo inanggoikanggon nadunia nia doi Yana?

¹⁴Kalukai ko Mian Bisa kibute kobanggapi naansaang, tukon alayo koidan konaansaang tuboan,

¹⁵maka matemo sasaibino komahluk modaano konaansaang, tukon kobanggapi teali ambata buno tumbeno.

¹⁶Nah, kalu ikoo toiyo, palatikanggenekai, pasange kotolingaimu tukon ndongoliiyomo.

¹⁷Oilakai ikoo salakene ko Mian Bisa moadil tukon baranidoo? Kai ikoo anggene baikon ko Mian Bisa misikitene kokaadilan?

¹⁸Ko Mian Bisa ukume kotomundo tukon mokuasayo, kalu yanila lokis tukon mopalalentel.

¹⁹Yana aki naala doi sasaibino kotomundo kai utamakene komian mokaasa luwedoi mian motalalais. Sabab yanila sasaibino daanoon Yana matealikene.

²⁰Doi popook tangano, yanila moola mate tukon sosinggot. Ko Mian Bisa ukume komokuasaiyo tukon yaniladoo kai silaka; tukon mumunda Yana akateyo komian mobarani.

²¹Yana dagaiyo kobanggapi natuboan, yana kitayo sasaibino konalaakonan.

²²Akiyokai kokalipookan, mau nabulaandomo konakalipookanan, momoola seekene komian mobaladosa.

²³Aki napalaluu ko Mian Bisa motantukene kotempono, kobanggapi nalubatan sulano Naadiliyo.

²⁴Aki nasolidikiyo tukon palesayo Yana pusake mokuasaiyo tukon oduduke koposobolino.

²⁵Sabab, Yana toiyo oila konapoo linakukon; maka Yana nggolinggene tukon manase yanila doi tempo popook.

²⁶Sabab napoo lalim maka yanila tinapi, yanila inukum doi umum salaano.

²⁷Sabab, yanila aki naloingiyo Kona mongiasan tukon aki naanggayo sasaibino Kona parentah.

²⁸Yanila mangaanikene komian motalalais natambalais ko Mian Bisa lengele konapoo kokiilan.

²⁹Kalukai ko Mian Bisa putusiyo sulano naaki nabiyok tolong, akiyokai komeeng komian naikon mobarani Nanggimoliyo. Kalukai Yana seekene Koduduso, akikai komeeng komian momoola Noposunggene.

³⁰Maka kobangsa-bangsa akiyo konadaya sulano naakiyenggene kolokis nakuasa nabalai-lainggonan.

³¹Ayub, kai lapamo ikoo mangakukene komu lalim doi Mian Bisa? Kai lapamo ikoo paladandi moakimo naikon mumokubai lalim koidan?

³²Kai lapamo ikoo kabiyo sulano natinudoikon komu kasalahan? Kai lapamo ikoo batotopi moatadeyo dokokubaidoo?

³³Aki nateali ko Mian Bisa naikon moloingiyo komumongiasan, salataa ko Mian Bisa nakokubai aki muloingiyo? Diabudoo, sio ikoo komo putusiyo, bolikon yaku. Bantilemokai oila komu pandapat!

³⁴Sasaibino komian motoiyo tantu naikon napomenggene; mian mopandoi molengele yaku naikon bantil,

³⁵baikon Ayub nabasilinganan aki naalatiyo, tukon baikon konabantilan akiyo koalatino.

³⁶Kalu Ayub nabantilan-bantilan sinolidiki tukon teliti, naikon tokitamo baikon konasilingan bunokai mian molokis.

³⁷Konasalah sinuungi koidan tukon meeng kolalim; yana nggimoliiyo ko Mian Bisa, tukon totulaiyo Yana doi salaanggita.