Read Banggai AYUB 36 Bible Online

AYUB 36 - Banggai bible

AYUB 36

¹Ndongoliiyokai naapa koidan, tukon totiilikai, daanokai komosio kubantile demi Mian Bisa.

³Dakumotoiyan badaang; naikon kugunakanggene sulano kubuktikanggene baikon komo pasitakayo yaku adil.

⁴Dakubantilan akiyo komo kala; komian motutuu toiyo daano doi salaamu.

⁵Ko Mian Bisadoo balakuasa! Yana toiyomo kolobo sasaibino. Akiyo komeeng komian yana mombalenge kulokis.

⁶Komian mobaladosa aki nasinodiikon tubo malumbit, Yana beena kaadilan doi mian mosakisaa.

⁷Yana palatikanggene komian-mian mojujur, Yana tealikene yanila balakuasa buno tomundo-tomundo, tobikon yanila inodotii posidutukon.

⁸Bai kalu komian binoboi tukon rante besi, sakisaa sabab nakokubai susuungo limbako,

⁹maka kolalim tukon napooo babanggaalan ko Mian Bisa naikon ukume.

¹⁰Yana sumboliiyo yanila mondongoliiyo Konapoingotii tukon yanila tinggale konapoo kulokisan.

¹¹Kalu yanila tulutiyo ko Mian Bisa tukon bakaleda doiya-Na, yanila tubo dame tukon monondok polong pomatekon.

¹²Bai kalu yanila aki namondongolii, yanila naikon mate doi nabodoan lalomo.

¹³Komian moakiyo konatemeneno abese konggimalan; mau TEMENENO naukume, yanila aki naiyase makabi tulung.

¹⁴Yanila mate susah doi tempo natabokonan sabab konatuboan moono kulokisan.

¹⁵Ko Mian Bisa otunggule kobanggapi mololoi sakisaawan, Yana kubaiyo susah sulano nasadariyo.

¹⁶Ko Mian Bisa lapamo sodiiyo ikoo luwedoi kasukaran, tobikon mumoola toupiyo kotanaangan, tukon komumeda kaanan moono kinaan.

¹⁷Bai diabudodoo pokokonoi tukon mukulokisan, ikoo talimayo komuukuman.

¹⁸Badagaikai, inai mototipu tukon doy posogok; inai motongokolii sabab kaasaan.

¹⁹Akiyo kotakoso ikoo mouang makabi potombonii, palasuma sasaibino komutenaga tukon mubukuanan.

²⁰Inai mopoloonggene kokalipookan, kobangsa-bangsa natempo kabuso tukon naakiyonan.

²¹Badagaikai, inai moabali doi kulokisan. Komusakisaawan makisuuto sulano mutinggale kokulokisan.

²²Neneekekai, Mian Bisadoo babasal Konakuasa. Kai daano koguru mopokakana Yana konahebatan?

²³Indeekai komo moola tantukene kololoon tuuk Yana kai barani motuduwo Yana momokubai salah?

²⁴Yana sidutu ngginaal sabab nabalimangan, tukon ikookai patut Muakuiyo.

²⁵Sasaibino komian kitayo Konakokubai; bai akiyokai komeeng komian motutuu Yana pahamiyo.

²⁶Ko Mian Bisa tutuu inodotii, aki ndamoola toiyo Yana, kai moaite Konataun nakadaang.

²⁷Ko Mian Bisa molubatene kopaisu luwedoi dunia teali bunom maka Yana boliiyo teali udan paisuno mondendek.

²⁸Yana kundange koudan luwedoi bunom yuma bubusikene doi bangkapi.

²⁹Akiyokai komeeng komian momangalati kobunom-bunom nabiyokan tukon koguluk nabulunganan doi timbu Mian Bisa natampat dungolan.

³⁰Posaapon kotimbu Yana kadiolingiiyo tukon didip bai kotobun lalomo doi bilit tataap kalipookan tuuno.

³¹Doiyamo Konakokubai Konaotuboiyano kobangsa-bangsa tukon beena kinaan molobi-lobian tuuno.

³²Yana lakoyo kodidip tukon lima-No tukon sumboliiyo tulokiiyo Konapinakituu.

³³Koguluk nalalo doiyamo kopaloosano naikon lubat kosokoi, mau iyayon bai toiyo momosobit lubat kombeyus.