Read Banggai AYUB 37 Bible Online

AYUB 37 - Banggai bible

AYUB 37

¹Kosokai kubaiyo lolondong konoanggu tukon pakkandang dakutibubung.

²He komuyu sasaibino, polengele ko Mian Bisa nalalo; polengele koguluk motobuat luwedoi Suungo.

³Posaapon kotimbu, Yana sodiiyo konadidip; Yana kapatuwe Konaselese doi dunia bundu-bunduno.

⁴Lapadoiya, longolo konalalo motimbuukan guluk tukon bubuung momonondok konabulungan tukon nalalo tangano moselesean selese didip poala-ala.

⁵Sabab Mian Bisa naparentah, maka teali komominasaindinggon laba-laba moajaib moaki ndapahamiyo.

⁶Linggous otuwong doi dunia luwe Naparentah; babasal koudan molubat luwe Nasosumbolii.

⁷Yana atadeiyo kobangkapi nalimang, sulano napoo toiyo baikon Yana daanoon mobalimang.

⁸Koiyayon mombosolo usok koidan doi buang tukon leeng lalomo tukon soop doi natelea lalomo.

⁹Luwedoi lalom lubat komombuul makansang tukon luwedoi lembet lubat kokumel.

¹⁰Ko Mian Bisa Naroh tealikene kundot kopaisu moluas bunggono, yana boliiyo teali es momatikas.

¹¹Kobunom Yana muatiyo tukon paisu, tukon lalaangan kobunom didip mokadiolongiiyo.

¹²Kobunom-bunom tebeas posaapon kodunia, luwe Mian Bisa naparentah yanila palabiyok doiyayaa.

¹³Mian Bisa lubatene koudan tuuk mbetokiiyo kobuta, kai koidan tuuk ukume kobanggapi; moolakai koidan tuuk okitakene doi yanila, Konamaasi Nababasalan tuuno motataap tuuk posidutukon.

¹⁴Hai Ayub, inai mobiyok soisikeen, tukon ndongoliiyokai; palatikanggene ko Mian Bisa nalangge mominasaindinggon-minasaindinggon.

¹⁵Kai ikoo toiyo bulaando ko Mian Bisa namebeean kumando, tobikon palapiit kodidip luwedoi bunom tukon bunom?

¹⁶Kai ikoo toiyo bulaando kobunom-bunom natebengakonan salaku Mian Bisa napandoiyan limbako mominasaindinggon?

¹⁷Aki, ikoo tolongo moola mondommuk sabab namoonasan kalukai mombuul lalom lupayo kodunia.

¹⁸Kai ikoo moola buno Mian Bisa mobeleatene kodapang tukon mokatikase buno tambaga kai kaca doi suangan?

¹⁹Otunggulekai kami oila komo sio mai bantile doi Mian Bisa; akiyono komo moola kami jelaskanggene, akiyono komai pikilan.

²⁰Akimo kuiyase makabi basilingan doi Mian Bisa inai-inaikene Namalaat alasan mokubaiyo yaku silaka.

²¹Diabudoo kotimbu laango madialang tuuno tobikon naakimo natontong kondambinaleng, mbombuul mopuul bilisiiyo kodapang.

²²Pana momosoisoni sumbot doi lembet, tukon ko Mian Bisa namoliyousan kindendeke konoanggita.

²³Tutuu babasal konda Mian Bisa Nakuasa; aki nateali kita koolaniyo Yana moloyos konoano tukon sidutu adil; aki nabiasa Yana lailainggene kobanggapi.

²⁴Doiyamo kosababpo Yana patut nainodotii luwedoi indeemo komiano tolong, tukon komian momangaku toiyo, Yana aki napopusinggon.”