Read Banggai AYUB 38 Bible Online

AYUB 38 - Banggai bible

AYUB 38

¹Doibundu luwedoi sokoi lalomo ko TEMENENO basilingan doi Ayub, bunonaiya:

²“Indee ikoo miano, tobikon mubarani balasaakiyo dakupandoiyan tukon mubantilan-bantilan molongas tukon moakiyo koalatinodoo?

³Diabudodoo, sasalaanakukai bunokai mala-malane tukon timbiliyo napasadai-pasadai nia.

⁴Kai ikoo daanomo salataa kutealikanano kodunia? Kalu bisa mobabasal komumotoiyan, popitoikene!

⁵Indeekai komo tantukanggene kodunia nakebelak? Indeekai komo banatene koalos posukat doiyana? Kai ikoo toiyo timbiliyo?

⁶Bulaandokai kosudong-sudong potumbokii dunia motongokokondong moonggol? Indeekai komo abese kobatu posokol dunia tukon moonggol,

⁷doi tempo komandala-mandala alani komodoa namananian posinggat-singgat tukon komalaekat-malaekat doi surgaa mosanaang mokoku-kokuweis.

⁸ Indeekai komo tutupe kotataapon sulano natodimbol kondalangon salataa luwedoi dunia lalomo bukal sumbot kopaisuno?

⁹Yakumokai komo tutupiyo kotobun tukon bunom tukon bungusikene kokalipookan.

¹⁰Yaku tantukene kondalangon kalalatano maka Yaku dupele tukon tataapon mo sinupat.

¹¹Yaku Bantile doiyana, ‘Naiyamo kobataso. Inai moliisiyo! Dimbaamokai komu bokol-bokol momakansang natadean.’

¹²He Ayub, kai ikoo biasamo idan, mosumboliiyo lubat kododowasoono?

¹³Kai biasamo ikoo mosumboliiyo kopanah nataaniyo kodunia tukon tipasene komian lokis luwedoi napoo tampat sapitan?

¹⁴Kooloyo namadialangan okitakene tukon tontong kobunggo tukon pepelako bunokai cap doi butatina tukon doi meeng kojubah nalinipatan.

¹⁵Kooloyo namadialangan todudul taraang tuuk doi mian moakiyo kona temeneno, tukon taane yanila molakukene komotikasan.

¹⁶Kai ikoo biasamo moobulus doi tobun naatean, mododoon taalikon doi bilit? Kai biasamo ikoo moampa-ampakon doi ndalangon mobabasal saano bunggono?

¹⁷Kai biasamo komian motudoikonggon kotataapon babasal doi tampat matean salaano mokalipookan tuuno?

¹⁸Kai moola mutantukene nadunia nia nakebelak? Timbiliyokai kalu ikoo toiyomo.

¹⁹Kai ikoo toiyo luwedoiyaa komadialan nalubatan, tukon doiyaa konabiasaan kokalipookan naluwean?

²⁰Kai moola mutantukanggene kokalipookan tukon madialan kalalatano? kai sumboliiyomo namule kalu yanila lubato?

²¹Tantu ikoo laate, sabab ikoo motuamo, tukon salataa kodunia napinasitakaan, ikoo daanomo.

²²Kai biasamo ikoo duutiyo dakugudang-gudang es tukon udan batu natampat,

²³Yaku moabese tuuk doi lounu nasulitan, tuuk tempo polobosian tukon oloyo-oloyo molobosian?

²⁴Kai ikoo toiyo kooloyo matano naluwean? kai luwe doiyaa komombuul tolopot naluwean?

²⁵Indeekai komo kaliyo tuuk koudan mobabasal naloloon tukon beean loloon koguluk tukon didip?

²⁶Indeekai komo obulusene koudan doi padang lalomo bunggono, tukon doi buta bunggono moakiyo kobanggapi modungoliyo?

²⁷Indeekai komo bubusiyo kodunia momotuul tukon momolooyu tobikon nasopii sasaibino kobulung?

²⁸Oilakai koudan daano kotamano tuu? Indeekai kotamano kosoiluk paisuno mobatitik-titik?

²⁹Oilakai ko es paisuno daano kotinano? Indee komo suunge kosoiluk mokoyol?

³⁰Indee komo boliiyo kopaisu teali batu, tukon kubaiyo kotobun bunggono teali kaku?

³¹ Kai moola mupototongikene komandala Kartika poboino? kai ikoo bukase komandala Belantik pounguno?

³²Kai moola ikoo ajare kobituwon-bituwon pauno samba kolounu, tukon mandala Biduk mobabasal tukon mopoipoisik, ikoo tantukene konaloloon?

³³Kai ikoo toiyo koukum-ukum doi dapang? Tukon kai moola moutunggulikene doi dunia?

³⁴Kai moola muwookenggene koparenta doi bunom, tukon sumboliiyo nalelene ikoo tukon udan?

³⁵Tukon kalu ikoo sumboliiyo koselese-selese napotuloki-tuloki kai moola napoo lubat tukon bantile, “Yaku Tuan!”?

³⁶Luwedoi indee kotomisi kolu toiyo kotempono ko Nil Paisuno batango naikon molelang? Indee komo popitoikene komanuk tanggoloko baikon koudan naikon lubat?

³⁷Indeekai komo toiyo tuuno tuuk moaite kobunom tukon moabalinggene tobikon nalubat koudan,

³⁸udan mootikase koambata teali patiku, tukon buta teali polombot-lomboti?

³⁹Kai moola mumangasukene kosinga-singa nakinaan tukon mukobbosuliyo konapau-pau tiano,

⁴⁰doi tempo nasoopan doi leeng lalomo kai salop doi natelea lalomo?

⁴¹Indee komo tomboniiyo kotomisi gagak momalaal tukon posinggabut dombalaa doisumai mounggolii kinaan? Indeekai koidan komo tomboniiyo kalukai konapau-pau bantil doiyakumakabi kinaan?