Read Banggai AYUB 39 Bible Online

AYUB 39 - Banggai bible

AYUB 39

¹Kai ikoo toiyo kotempono kotinano nasuungano kombembe doi bunggo? Kai biasamo ikoo kiteese kodonga mombosolo mosuunge konapau?

²Kai ikoo toiyo bulaa konakalumbit yanila natiananan? Kai moola muaite doi tempo namosuungan?

³Kai ikoo toiyo oila kotempono konapoo talungguano kobutongo, maka nasuunge konapau-pau?

⁴Konapau-pau babasalo tuuno tukon bukuan doi padang lalomo; yanila taus tukon akimo naabali doi tinano.

⁵Indee komo sobiiyo kokaladai mombosolo doi bonggulung? indee komo bukayo koaloso tukon sodiikene yana nadampas?

⁶Kubeekene doiyana kopadang lalomo teali nabonua tukon padang-padang timuson teali natampat dungolan.

⁷Yana dedeenggene kokota-kota tukon nalamean, akiyo komo moola kamaluwo tukon mosumboliiyo balimang.

⁸Bulung tukon padang doi bunggul tampat nakaanan, yana umboliiyo kolobo momanampal indaa.

⁹Oilakai kosaapi mbosolo yase mobalimang tuuk doi komuyu? Kai yana yase mobamoolokon doi mutondok lalomo?

¹⁰Kai moola mukeete yana tukon mupakisaayo nabapajeko tuuk ikoo? Kai moola ikoo sumboliiyo yana napasele komuasi?

¹¹Kai moola mumoinikene konatanaga mobukuan, tukon ikoo salakanggene doiyana komulimang mobabalat?

¹²Oilakai ikoo maanggakene doiyana mopototongikene komu bapupuian, tukon babayomo doi tampat mubambasonan?

¹³Bukamaen konamosobitan konabakipasan kotomisi unta kapilo! Bai kotomisi kolong nabenga akiyo komo moola liisiyo yana.

¹⁴Tomisi unta manggalau doi buta, maka natinggale; maka bonekai naikon komo buungikene konanggalau.

¹⁵Yana aki natoiyo baikon komian tudongiiyo yana tukon koiyayon-iyayon mombosolo bai tudongiyo.

¹⁶Yana konasikap kakaadukon baikon konapau bolikon koona yana aki napaduliyo kalu konalimang akiyo kotakoso.

¹⁷Yakumo komo kubaiyo yana longas tukon akiyo kona tinoi, aki kubeekene doiyana kopandoiyan tukon pikilan.

¹⁸Bai kalu yana tambuuno moobulen mosobit, yana kalayo koadalan tukon polokitino.

¹⁹He Ayub, kai ikoomo komo beena bukuanan doi adalanoo tukon nabuk mobapail-pail doi okuna?

²⁰Ikoomokai komo sumboliiyo osuut buno betek, tukon nambongusonan mooto-otokutiyo komian?

²¹Yana badunge kobuta doi pepelakon tukon tetedes, tukon samangat tuuno yana lobosiyo doi tampat polobosian.

²²Yana aki natoiyo koalatino kombombokonan tukon matakutan; akiyo kosabel mokubaiyo yana abali.

²³Komolokitiyo ingite konasinapan ponggololisa tukon motontilang kanakon pana laango.

²⁴Tukon namololean tutuuno adalanoo obulen; kalu bulungan kotorompet yana aki nanggoola taane kobutongo.

²⁵Yana mbonguson doi sasamba kotorompet nabulungan luwedoi naodoonan yana somakenemo kopolobosian boono. Yana lengele sasaibino kosuludadu kapalano nakeisonan doi tempo napoo mebeean komando.

²⁶Kai kotomisi alai ikoo otunggule benga kalu yana pakituuwo ko lalom tukon kapilo motebeleka?

²⁷Kai muparentahmo kotomisi rajawali nalinoingi doi naakiyoonan nakubaiyo konatelea doi bunggul motatandak?

²⁸Doi bunggul batu bunggono tuuno yana kekendenge konabonua; kobatu-batu bunduno momamangan teali nabenteng.

²⁹Luwe idoo yana badagai doi sasamba kolipu pasuno yana pokosimbaleng komatuno mounggoliiyo konakinaan.

³⁰ Yaando konadaanoan komomate, idoomo yana, tukon konapau-pau inume kaane sauhnodoo.