Read Banggai AYUB 40 Bible Online

AYUB 40 - Banggai bible

AYUB 40

¹He Ayub, ikoo lawane Yaku, Mian Bisa Mobalakuasa; kai ikoo yase mangaku kala kai ikoo yase mobantayo?

³Maka Ayub timbiliyo doi TEMENENO, “Yaku basilingan buno mian longas, oh TEMENENO. Oila kopotimbilino momoola kubeekene? Akiyono kooioila koidan mosiokai kubantile.

⁵Todudulo badaang tuuno daku tinutur.”

⁶Maka, luwedoi sokoi lalomo ko TEMENENO basilingan koidan doi Ayub.

⁷Maka ko TEMENENO bantil doi Ayub, “Sasalaane Yaku salaku mala-malane, tukon timbiliyomo sasaibino Daku pasadai nia.

⁸Oilakai ikoo naikon saleanggene Dakuadilan, tukon bisakene kobutomu maka musalakene Yaku?

⁹Oilakai ikoo bukuan buno Yaku? Kai moola koalalomu nababasal buno alalonggu?

¹⁰Bubungaiyo kobutomu tukon namonondokan tukon nakinabasalan, konoikenemo konakinabasalan tukon namonondokan.

¹¹Mbalenge konoanoila mobabanggaal; kumbeyomo komunggimalan tukon pependoyo yanila.

¹²Ode, mbalenge komian mobabanggaal, akalayo yana! akateyo komian lokis doi natampat.

¹³Kibule yanila sasaibino doi ambata lalomo; kurunge yanila doi mian mate nadunia lalomo.

¹⁴Maka Yaku naikon nggaale ikoo sabab ikoo manaang tukon mubukuanan susuumu.

¹⁵Palahatikanggene Behemot, doiyayonoo mobabasal; buno ikoo, mau yanakai bai Yaku komo pasitakayo. Bulung-bulung teali nakinaan, buno saapi tukon saapi biasa.

¹⁶Bai kiteese konatenaga doi butongo lalomo tukon nabukuanan doi naotot-otot!

¹⁷Yana kekendenge kopuuso buno aras batango, kobanano naotot-otot bukuan buno matikas.

¹⁸Kobuku-bukuno bukuan buno tambaga, koaino bukuan buno besi batango.

¹⁹Doi antara sasaibino kolobo motubo yanamo komo minasaindinggon tuuno; tolongo Mopasitakayo yana tolong molungguiyo yana!

²⁰Doi bunggul-bunggul iyayon mombosolo natampat bala-balamaenan tukon natedesan tubokai kobulung moteali nakinaan.

²¹Yana banggonggolong doi mosolot mosoniton suukano doi dolak-dolaak modaano kobulungo konasapitan.

²²Mosolot mosoniton lindungiyo yana tukon mbombokouno. Kayung gandarusa doi paisubatango bibilo komo mbou-mboungiyo yana.

²³Yana aki nambombokon maukai ko Yordan Paisuno batango namakansang tuuno kosoloko, yana tataap tanaang maukai kopaisu nalupayo koduduso.

²⁴Indeekai komo barani mopiseke komatano, maka nalakoyo yana tukon talenggene koponggouso?”