Read Banggai AYUB 41 Bible Online

AYUB 41 - Banggai bible

AYUB 41

¹ Kai moola mulakoyo kobuea Lewiatan, tolongo tukon meeng koikan pekano? Kai moola mukeete koalepo tukon alos-alos poboi?

²Kai moola mukonoikene koalos doi soongano kai besi pakait doi adeno?

³Kai moola nakabiyo doi komuyu sulano nasinodiikon? kai balunding tukon ikoo, kabiyo komaasino?

⁴Kai moola namakabi palasatujuan tukon komuyu, tukon paladandi naikon sidutu moleleaniyo komuyu?

⁵Kai moola muboboiyo yana buno tomisi mopiniala, mosanaanggene koata-ata moluko?

⁶Kai kotolosabang-sabang moola nabadaganggene yana; tukon inobos-obos doi sasaibino kopadagang?

⁷Kai moola mutebeke kokulito tukon pandong motolu komatano, kai ikoo sakule yana tukon besi momandepa motadule kooluno?

⁸Singgile yana koikoidan, tukon akimo naikon mukuaikene; dopoakateanoo aki naikon mutoliminggene sidutu-posidutukon.

⁹Sasamba komian mokitayo Lewiatan, naikon teali miyuk maka otuwong poso.

¹⁰Yana nggimal kalu binangun luwedoi namooloan; akiyo komeeng domianoo mobarani kokondong doi salaano.

¹¹ Indee komo moola lobosiyo yana moaki nakanakon susah? Doi dunia nia akiyo komo sanggupe lakukene.

¹²Maimo kusalitayo kaliangano Lewiatan butongo anggotano, nabukuanan kaliangano tukon ndondoongo monggaangan.

¹³Akiyokai komeeng komian momoola bendinge konakalambi doi tonggulung kai motadule konakalambi polobosian yana mopakeyo.

¹⁴Indee komo moola bukayo kongoolo mobukuan, modaano kongoli-ngolingo modeikon lobo?

¹⁵Buno tombinde moposusuni, doiyamo kobungguto lambot polopoti, buno batu namatikasan.

¹⁶Popisa-pisai, toboboi tuuno, tobikon kombombuul naaki nateali usok doi lalom.

¹⁷Dotombindedoo bunomodoiya konamoonggolan tobikon aki nateali pinoalaason.

¹⁸Kalukai Lewiatan sambaing, daano kolaango; mangkilat komatano buno nasumbotan kooloyo

¹⁹totipas koaung lodono doi suungo; koaung napalapiitan tasabukon doiyayaa.

²⁰Kobung kotibolung luwedoi soongano lalomo buno kayung mosinua tibolungo doi balanga bilito.

²¹Konansaang akaite kobala; koaung nakaitan tobuat luwedoi babano.

²²Kooluno bunodoiya kona bukuanan tobikon sasaibino matakut doi salaano.

²³Akiyo kotampat momuyuk doi kulito; aki nateali mapasah sabab matikas tuuno.

²⁴Konoano namoonggolan buno batu, aki natingoniiyo kosusah moonggol tukon matikas buno batu bagilingan.

²⁵Kalu yana tubo, mian mobukuanoo lapus konabukuanan, kubaiyo akiyo konadaya sabab matakuto tuuno.

²⁶Akiyo kosabel molaate pokoloniyo; pandong, pana kai sosibuk aki nalaate osokitiyo.

²⁷Yana anggene kobesi buno bulung konaalusan tukon kotambaga buno kayung moakiyo koloono.

²⁸Akiyo kopanah momoola siikayo yana; kobatu molinombitikon yana tolongo buno bulung.

²⁹Kopakakas pongumbas musuh yana anggene buno bulung momotuul; yana kokumbit kalu komian sokulikene kososiduk.

³⁰Anano doi tiano buno kaca pasano mosusuungan kobunduno. Salaku pakakas pakali yana kaliyo kolapetak tukon batayo.

³¹Yana gulake kotobun tobikon buno paisu bukal; buno paang masaangan lisison mobukal-bukal.

³²Yana tinggale koaino salaano laalo moano kolaango, yana boliiyo kotobun teali bukalo momoute kotambongo.

³³Doi dunia bunggono akiyo kona pokakanaan; lobo motubo moaki natoiyo matakut, doiyamo yana!

³⁴Iyayon motambongan tuuno yanakai kitayo kulokis; doi antara sasaibino koiyayon mobarani, yanamo kotomundo.”