Read Banggai AYUB 5 Bible Online

AYUB 5 - Banggai bible

AYUB 5

¹Eh Ayub, masadaimo, kai daano kopotimbili? Indee malaekato komu makabian potombonii?

²Tolongokai mian molongas komo mate sabab namalalasan konoano.

³Yaku monggitamo mian molongas: kona tuboan tokita moonggol tuuno. Bai tongo sosinggot yaku kutukiyomo konatampat dungolan.

⁴Maka konapau-pau aki nabiasa malaat soopan; akiyo komo yase belayo yanila doi pengadilan.

⁵Oila konapoo pinupui doi naasi, mian momalaal kotiano kabus kaane. Baikon kogandum modoi mosolot tangano mian momalaal kabus pupuiyo. Koona tukon napoo kaasaan yanila teali palatian mian momoloukene kobuat.

⁶Bolikon luwedoi dunia kokulokisan nalubatan; bolikon luwedoi buta kosusah nalubatan.

⁷Bolikon! Bai luwedoi banggapi susuungo molubatene kosilakaan doi butongo buno aung balano mototipas sumbut luwedoi aungoo susuungo.

⁸Kalu yaku doi mundondoong lalomo, yaku naikon masadai doi Mian Bisa. Yaku naikon mangadu doi Yana, tukon salakanggene dakupalakala.

⁹Ko Mian Bisa nalimang-limang minasaindinggon; aki ndamoola motoiyonggon. Mominasaindinggon-minasaindinggon Yana kubaiyo, aki natangait tukon akiyo konakabusan.

¹⁰Yana lubatene kona udan doi dunia sulano natembetokii koasi tukon padang.

¹¹Yanamo ko Mian Bisa moakatandake komian momolole, tukon kindendeke komian mosusah.

¹² Yana akiyeneggene komian mopandoi natetel, yana akakene tukon lakoyo komian mopandoi, tobikon sasaibino konapoo kakaatean aki nateali, tukon yanila tangakakon doi napoo pikilan susuungo.

¹⁴Doi tempo oloyo yanila kanakon kalipookan, ngganggaame buno doi popook tempono.

¹⁵Bai Mian Bisa salamatene: komian motalalais luwedoi matean komian momolole luwedoi napiniipiikan.

¹⁶Diabudodoo daano kona moinian koidan tuuk doi mian moakiyo koona, Tukon mian molokis akimo nabiyok, sabab ko Mian Bisa akimo nabukayo kosuungo.

¹⁷ Ikoo mujur kalu ko Mian Bisa anuukonggon! Inai momanasal kalu yana sosiboliikon.

¹⁸ Sabab Mian Bisa komo palasakitiyo, yana koidan komo pakuliyo. Tukon lima-No komo pukule, koidan abali pinoputakon.

¹⁹Kalukai lubat kosilakaan, sidutu ikoo sinamalaton.

²⁰Kalukai kanakono malalan, ikoo aki naikon mumate laal. Kalu kopolobosian hebat tuuno ikoo tanaang luwedoi matean.

²¹Ikoo dinagai luwedoi baloobuan tukon bangoluulian; aki mumatakut mosasalaane kosilakaan.

²²Kalu nggimolon tukon kanakono laal, ikoo naikon sabal tukon baikon kokumbit. Ikoo aki murasayo matakut tukon pakandang, mosasalaane koiyayon barani moganas.

²³Asi ikoo mubadunge akiyo kobatu; iyayon mombosolo aki naikon nalobosikon.

²⁴Ikoo naikon aman dungol doi musandung: tukon kalu ikoo palesayo komudomba-domba, sasaibino salamat, aki nabolii mau meeng,

²⁵Komupau tumbu aki natangait, konapoo kadaang buno bulung doi padang.

²⁶Buno gandum momoyoo, pinupui doi tempono, ikookai naikon tubo monondok polong tempo lakai.

²⁷Ayub, doiya sasaibino lapamo kami palesayo, Dobantilanoo bisa, jadi talimayomo tolong.”