Read Banggai AYUB 7 Bible Online

AYUB 7 - Banggai bible

AYUB 7

¹Banggapidoo buno pinakisaa mokakaate; konatuboan babalat buno meeng komian motinambo natuboan;

²buno ata mopoloonggene kosoopan; buno buruh mototiiliyo kopatambo.

³Bituwon paisoboli kobituwon dakutuboan akiyo kona tujuan; popook paisoboli kopopook konoanggu poloon tuuno.

⁴Kalu yaku taus moolo, malumbito kopopook; yaku peleenggene kododowa soono, aki nateali kubanggoonggolong motanaang.

⁵Kobutonggu moono ngganggalang tukon sauh mokeol; kokulitonggu dedenggon tukon tobuatene konanah.

⁶Dakutuboan moaki namoinikene doiya mosobit polong napupusan, mosobit tuuno luwedoi batonunan ampakongganano kona sekoci.

⁷Neneeke, ode Mian Bisa, dakutuboan tolongo ansaang mosinupakon; dakumonondokan lapus, aki natotinggal kolaalo.

⁸Budodoiya Ikoo kitayo yaku — bai doiya aki namalumbit. Kalu naikon Ikoo umboliiyaku, maka akiyono.

⁹Buno bunom mopototongi maka lapus, banggapikai mate, akimo naikon naabali mule. Sasaibino komian motingoniiyomo yana, toliminggene yana tukon akimo koidan naneneeke.

¹¹Tobikon doiya aki nateali yaku modongol tukon aki nabiyok! kuomiyo susah tukon mosopot aki namoola kuabese. Yaku sio kubukayo kosuunggu, tukon kundange konoanggu antoko.

¹²Bulaandokon yaku nia Ikoo moawasio tukon Ikoo modagaiyo? Oilakai yaku nia naga doi tobun mominatakuton?

¹³Yaku nggonggolonggon tukon sobayo mobatadei; yaku moumbolii mamalaanan tuuk noanggu mosusah.

¹⁴Bai Ikoo otokutiyo yaku tukon olumonan; Ikoo lubatene koolumon molokis tukon hayalan.

¹⁵Maka yaku yasemo mopinook sulano kumate makabaino motubo doi tuboan nia mosusah tuuno.

¹⁶Yaku pakadako tukon akimo kuyase tubo; yaku yasemo mate! sodiikenemo yaku, sabab dakutuboan akiyono koalatino.

¹⁷ Bulaando kobanggapi mobunodoiya konapentingan doi-Koo? Bulaando Ikoo mosidutu palahatikanggene konakokubai?

¹⁸Ikoo solidikiyo yana samba kododowa, tukon Ikoo ujiyo yana samba kotempo.

¹⁹Oila kotempono konaakiyan mumbalengaku, sulano kutodan molemese dakunggeook?

²⁰Hee dakupototooli, kai ikoo rugi sabab kulalim? Bulaando ikoo mopakeyo yaku salaku mupana napinakituu? Kabudoon babalato yaku motonggungikene kobutomu?

²¹Kai aki namoola Ikoo moompuniyo dakulalim? Kai aki nateali Ikoo moakiyenggene dakusalah? Naapa doiya koidan yaku tonggonggolongo doi kibul lalomo, tukon kalu Ikoo umboliiyaku, aki naikon mulaataku.”