Read Banggai AYUB 8 Bible Online

AYUB 8 - Banggai bible

AYUB 8

¹Maka bantilo Bildad, “Bulaa konakalumbit koidan komu basilinganan bunodoiya? Komubantilan-bantilan buno mbombuul mobulungan.

³Ko Mian Bisa aki napasekene kokaadilan; aki nagagal mokenggele konabisaan.

⁴Baanggokai komupau-pau baladosa doi Yana, maka pantasokai Yana naukume yanila.

⁵Bai kalu ikoo kokolilung doi Yana, makabi soyang tukon makabi ampun,

⁶kalu moloyos konoamu, akiyo kososiboliino, ko Mian Bisa naikon tulungiyo komuyu tukon mosobit; tukon salaku posobolino, komu bonua lalomo naikon amano.

⁷Komu kaasaan molapusoo akiyo koalatino kalu pinookakanakon tukon oila naikon komu linaat.

⁸Komian mopandoi doi lounu loolukoo siokai mupalahatikanggene, tukon ikoo pikikene sasaibino konda mbumbu napangalaman.

⁹Konda tuboan paupalus, aki ndatoiyo kooi-oila; konda oloyo-oloyo buno bayangan tolong.

¹⁰Ndongoliiyo komian mopandoidoo looluk nabantilan, yanila beena naotunggul nia doi komuyu,

¹¹‘Doi tampat moano kopaisu tolong tubo kogelagah; pondan tolongo talaat doi buta mombetak.

¹²Kalu motiiso kopaisuno, dogelagahdoo molooyumo, mosobit tuuno luwedoi tatanaman bailon. Baanggokai daanoon momonondok tukon akiyoon kotempono, yana pinatol tukon inala kogunano.

¹³Bunomo doiya komian moakiyo kona temeneno. Yana toliminggene ko Mian Bisa, maka lapuso komoinian.

¹⁴Meeng kobanang momiyuk teali na moinian; lowa natelea teali namanganggaan.

¹⁵Kai moonggol doteleadoo kalu tinealikon sosinggalangan? Kai moonggol dobanangoo kalu tinealikon bataanian?’

¹⁶Buno padang, monondoko komian moakiyo kona temeneno; kalu oloyo panano kadiyoloniiyo, yana tubo molumbang tukon koonoiyo kobasalean.

¹⁷Koalono boboiyo kobatu-batu doi butah; takalokon moonggol, yana aki naambang toliat.

¹⁸Bai, soba, kibutemo budodoiya dopadangoo, maka uga-ugaat akiyoon nadaano yana idoo.

¹⁹Oode, komian molokis nasanaangan tolongo doiya tolong; komian bailon lubat tukon soboliyo yana.

²⁰Bai ko Mian Bisa aki nateali tinggale komian mo totobos, tukon aki nateali koidan yana motulungiyo komian molokis.

²¹Kosuumu yana naikon kubaiyo kokumbit, kosuumu bibilo naikon rame tukon kokuweisan.

²²Momisikitano naikon mammaa tukon lasayo paupauno konoano, tukon komian molokis nabonua naikon minanas sampe manas.”