Read Banggai AYUB 9 Bible Online

AYUB 9 - Banggai bible

AYUB 9

¹ Bai Ayub timbiliyo, “Takainomo, yaku toiyo, komu bantilan-bantilanoo aki nasalah. Bai, bulaando konatealian kobangkapi mobapalakala molawane ko Mian Bisa tukon lungguyo-Mo?

³Luwedoi soloon kopasadai Mian Bisa mopelenggene, mau meeng kobangkapi aki nalaate timbiliyo.

⁴Ko Mian Bisa pandoi tuuno tukon balakuasa; indee komo moola taane lawane Yana?

⁵Ko Mian Bisa biyele kobungkuko komian aki natoiyo, maka tukon naliitan mobarani yana anggalaupe.

⁶Ko Mian Bisa lubatene koleali sampe unggot kodunia tukon sudong potumbak dunia tanga-tangaakon.

⁷Ko Mian Bisa taane kooloyo mosumbot doi tempo dowa-dowa, tukon taane kobituwon-bituwon pauno panano doi tempo popook.

⁸Yana bukayo kodapang aki natinombonii; yana tudo-tudongiiyo konaga tobun bungguto.

⁹ Yana paase kobituwon pauno tambuno taalikon doi lalom, koidan mandala Biduk, mandala Belantik tukon mandala Kartika.

¹⁰Aki ndamoola alatiyo sasaibino Kona limang, aki ndasanggup moaite konatanda Namujizat-mujizat.

¹¹Yana aloi doi salaanggu, bai aki kukitayo; yana lolo doi bibilonggu, bai aki natokita doiyaku.

¹²Kalu yana lambase, indee komo barani mopantane Yana? kai barani masadai doi Yana, ‘He, Ikoo daano mobabulaa?’

¹³Ko Mian Bisa aki natahane konanggimalan tukon namoonasan Konoano; sasaibino Rahab napotomboniidoo tootuku doi Yana.

¹⁴Jadi, bulaando daku moolaan mobantayo Yana? Tukon bantilan-bantilan oila naikon daku timbilia-No?

¹⁵Maukai naakiyo daku salah, oila dakudaya, baimokai makabi soyang luwedoi Mian Bisa kuhakim?

¹⁶Kalukai Yana timbiliyo kalu yaku masadai, yaku balasaak, kaibisa Yana moyase ndongoliiyo koalalonggu?

¹⁷Yana manase yaku doi sokoi lalomo, tukon suungiyo daku susaan akiyo kona alasan.

¹⁸Yana aki nasodiikene yaku moansaang bulusan mau natongo soisikeen; bisamo Yana lobiyoniyo yaku komosopotan tuuno.

¹⁹Siokai yaku tukon Yana pokitaikene kobukuanan? Bai kitayo, hebat tuuno Nabukuanan! Kalukai yaku gugate terhadap Yana, indee komo barani uange Yana doi pangadilan?

²⁰Yaku setia tukon aki kumokubai lalim, bai kosuunggu naikon bantil posasala, sasamba kobantilan moluwedoi suunggu bibilo, bunokai salahkene kobutonggu.

²¹Yaku aki kusalah, bai yaku aki kupaduliyo. Akimo kuyase tubo. Doiyaku akiyono koidan komo penting; mosalah tukon mokana, pokakanakai konatuboan; ko Mian Bisa naikon akabusemo lua-luadoo.

²³Kalu mian moaki nasalah sosinggot mate, ko Mian Bisa tolongo kokumbit tolong.

²⁴Ko Mian Bisa salakanggene kodunia doi mokulokis, tukon kohakim-hakim lapamo Yana kubayo piit sasaibino. Mian Bisa lapamo lakukene sasaibino nia, kalu bolikon Yana, indeemo kai?

²⁵Daku oloyo-oloyo taus tukon mosobit, maka nalapus aki nalasayo sanaang.

²⁶Buno duangan momodoling, daku tuboan toliiso tukon mosobit buno tomisi alai mobenga basuanggon sokuwo konamusuh.

²⁷Kalu yaku yase boit tukon kokumbit tedes, kalu kusobayo molapusene sasaibino kosusaan, maka daku pinoloonggon lubato koidan mololongganaku; sabab yaku toiyo, ko Mian Bisa tataap salakene yaku.

²⁹Nah, kalu bunodoiya, oila daku pinaduli?

³⁰Akiyo kosabuu momoola alapuse dakulalim!

³¹Ko Mian Bisa otombule yaku doi manggilitan lalomo, tobikon mau dakupakean bai anggene yaku manggilit.

³²Kalukai do Mian Bisadoo bangkapi, yaku naikon moola timbiliyo yana; maka kami naikon mangadap doi pangadilan tuuk moulusiyo sasaibino kopodangaanian.

³³Bai doi antara kami akiyo kojaksa momoola adiliyo kami luakami.

³⁴Boliisi ko Mian Bisa natade moukume yaku tukon dedeenggene Kona hebatan doi yaku!

³⁵Aki kumatakutene Yana tukon naikon basilingan budodoiya, sabab yaku tingoniiyo konoanggu susuunggu.