Read Banggai SADEONG 10 Bible Online

SADEONG 10 - Banggai bible

SADEONG 10

¹Bulaando Ikoo moodon oh TEMENENO tukon sapit doi tempo mai susaan?

²Tukon nababanggalan komian molokis pipiike komian motalalais; batadikenemo yanila tositak luwedoi napotalong susungo.

³Komian lokis bukalo konuano tentang konaminomotian molokis, komian modoko kutuke tukon akienggene ko TEMENENO.

⁴Komian mobaladosa aki napusinggene naikon ko TEMENENO, Sabab nabanggaalan yana pikikene baikon ko Mian Bisa akiyo.

⁵Komian lokis malaat hasil doi sasaibino konalimang lalomo, yana aki natingoniiyo kai mangalatikene ko TEMENENO Naukum tukon pandang enteng sasaibino konamusuh.

⁶Konabantilano doi noano lalomo, “Yaku aki naikon kugagal, tukon dakutulu-tulunan pokakana komian moaki natubo lokis.”

⁷ Yana banggadudul kutuke, ancame tukon batipu, konabantilan-bantilan moono mosikitan tukon kulokisan.

⁸Yana basookon doi kampung-kampung sulano nakateyo komian moakiyo konasalah. Bunokai singa yana montotiili doi mosolot lalomo papateekene komian moakimo nabukuan. Yana tedenge komian motalalais doi lipu moaki nalame, yana sokuwo tukon tandane bulenggene.

¹⁰Yana toutuku, batotobo momosoku; yana otuwenge komian tukon pakisaayo.

¹¹Konapopikikon, “Komian Bisa toliminggenemo tukon akimo naperhatikanggene; polong posidutukon yana akimo nakitaaku!”

¹²Kokondongokai, TEMENENO ukumemokai komian molokis! Nenekekai komian mopiniipik!

¹³Bulaando komian molokis banggadudul mototulaiyo ko Mian Bisa tukon pikikene ko Mian Bisa moaki naikon naukume?

¹⁴Bai Ikoo kitayomo; Ikoo perhatikanggene kokasusaan tukon sakisaa, tukon sidutu batotobo sulano mutulunge. Mian moakimo nabukuan sarakanggene kobutongo doi-Koo Ikoo sidutu tulungiyo komian motalalais.

¹⁵Lotoyomokai komian lokis tukon modurhaka nakakuasaan; ukumemokai yanila sabab napo kakabai polong yanila akimo nabarani.

¹⁶TEMENENO maparenta tuuk sidutu posidutukon; bangsa-bangsa moaki natingoniyo Yana akan lenyap luwedoi Nabuta.

¹⁷TEMENENO, Ikoo molongol mian motinotulai nasambeang tukon kabukuanggene konoanoila.

¹⁸Kopau tuboon tukon mian mopiniipik Ikoo belayo konaperkara, sulano naakio komian mootokutio yanila.