Read Banggai SADEONG 102 Bible Online

SADEONG 102 - Banggai bible

SADEONG 102

¹Mian mosakisaa nasambeangan modanoo doi pakadakan tuuno mongoluu doi TEMENENO.

²Oh TEMENENO, lengelekai daku sambeang, bolisii daku uwangan napolong doi-Koo.

³Inai mototonggulungaku kalu yaku daano doi susaan lalom. Longolakukai kalu yaku uwang, tukon timbiliyakumokai namosobit.

⁴Daku tuboan lapus buno tibolung; kobuku-bukunggu moonas buno aung.

⁵Akiyono kobukunggu buno bulung momotuul, tukon akimo kuyase kaan.

⁶Yaku nggeleamon babasal koalalonggu; kobutonggu molisuko tuuno baino kulit komo bunguse kobukunggu.

⁷Yaku bunomo tomisi undan doi padang gurun, buno tomisi kolu doi buta motaabak mokiis.

⁸Aki kumoola moolo, buno tomisi mopoloon doi bonua atono.

⁹Posopokon kooloyo komusuh totulaiyaku; doi mian monggimoliiyaku kosambunggu tinealikon kutuk luwedoi mian monggimoliiyaku.

¹⁰Koabu yaku kaane pokakana koroti, daku paisu ininum posambul komatanggu paisuno,

¹¹sabab Ikoo binggatakumo tukon sakukanakumo doi Munggimalan lalomo mokolot-kolot.

¹²Daku tuboan lapus pokakana kolangge mokouno doi kinobian; yaku molooiyu pokakana kobulung.

¹³Bai Ikoo, oh TEMENENO, Tomundo tuuk sidutu-posidutukon, paisosoboli koturunan tataap ninonook.

¹⁴Ikoo naikon kokondong tukon seseange ko Sion, laatemo kotempono sulano nadaano konda seang doiyana.

¹⁵Sabab Komu pele-peleleani kilakene yana, maukai yana natealimo buta motabaak. Yanila tataap seseangge doiyana, maukai yana natealimo abu.

¹⁶Ko TEMENENO nakuasa naikon kobangsa-bangsa matakutenemo; tukon sasaibino kotabo-tabo maambanggene Kona babasalan,

¹⁷kalukai ko TEMENENO bangunemo ko Sion koikoidan, tukon lubat doi Nababasalan lalomo.

¹⁸Yana naikon lengele Kona mian motamballais nasambeang, tukon aki naakiyenggene konapo kakabi.

¹⁹Potulisekai sasaibino ko TEMENENO nakokubai tuuk doi mian motubo doi salaando, sulano kobangsa moakiyoon nasimung moola nanggaale Yana.

²⁰Maukai natatandaak Kona dungolan bai ko TEMENENO moola mbalenge, doi surgaa Yana totileyo kodunia

²¹sulano nalengele komian motinaan napongoluhan tukon olupute komian mohinukum mate.

²²Maka doi Sion naikon Kona binabilatakonan kosambuno, tukon Yana naikon ngginaanggaal doi Yerusalem,

²³doi tempo kobangsa-bangsa tukon kobatomundoan-batomundoan mopototongi sulano napo salaakanggene kobutongo doi TEMENENO.

²⁴Salaata doi kutabokonan ko TEMENENO komuyukemo daku bukuanan, tukon paupaluse dakuumur.

²⁵Maka kubantile, “Oh Mian Bisa inaikai moalayo daku asaangan doi natatangakonan daku tuboan.” TEMENENO, Ikoo tubo sidutu-posidutukon,

²⁶ looluk Ikoo tealikene kodunia; kotimbukai lima-Mu komo limange.

²⁷Sasaibino doiya naikon lapus, bai Ikoo tataap daano; sasaibino doiya naikon mbules buno pakean. Ikoo sakukene buno kalambi motua, tukon sasaibino naikon manas kabus.

²⁸Bai Ikoo tongo tataap biasa, Komutuboan akiyo konapupusan

²⁹Komai pau tumbu naikon tubo tukon sanaang, tukon doi Musoopan lalomo yanila aman sidutu.