Read Banggai SADEONG 103 Bible Online

SADEONG 103 - Banggai bible

SADEONG 103

¹Luwedoi Daud. Eh konoanggu, nggaalekai ko TEMENENO, nggaalekai kosambuno momoliyous, sasaibino konoanggu.

²Eh konoanggu, nggaalekai ko TEMENENO, inai motoliminggene sasaibino Kona monondokan!

³Yana komo ampuniyo sasaibino komulalin, komo tangalinggene sasaibino komu sesel,

⁴Yana komo olupute komu asaangan doi kubur, moolombayo kona maasi tukon seang doiikoo.

⁵Yana komo akambule komutuboan tukon nomonondokan, tobikon doiya ikoo tataap tambongan pokakana kotomisi rajawali.

⁶Ko TEMENENO ambakonggene kohukum tukon kaadilan doi sasaibino komian mo talailainggon.

⁷Yana okitakene Kona rencana doi Musa tukon Kona kokubai-kokubai doi bangsa Israel.

⁸ Sabab ko TEMENENO daano Kona maasi tukon seang, Yana sabar tuuno tukon Konamaasi lobi-lobian.

⁹Yana aki nabanggimolii banggadudul momeenggon, tukon aki nanggimal tuuk sidutu-posidutukon.

¹⁰Yana aki nahukume kita sosuai konda dosa, kai balasekonda dosa sosuai konda kasalahan.

¹¹Bai pokakana kotimbu kona tatandakkan doi dunia bunggono, pokakana doiya Konababasalan Konamaasi doi mian motaat.

¹²Pokakana Konaodoonan kotolopat tukon talise, pokakana doiya Kona sakukanano konda lalim-lalim.

¹³Pokakana komeeng kotama naseangono konapau-pau, bunomo doiyakai ko TEMENENO naseanganoo konamian motaat.

¹⁴Sabab ko TEMENENO toiyo kita tokubai luwedoi oila, Yana neneeke kita nia tongo luwedoi ambata.

¹⁵Kobanggapi natuboan paupalus tongo buno bulung; yana tebeleka buno bunga doi asi;

¹⁶kalu mbombuul puule, lapuskai yana, tukon kona tampat akino natinoi koidan.

¹⁷Bai ko TEMENENO tataap mamaasikene komian motaat, Kona monondokan banggadudul momeenggon paisobolii kotulunan

¹⁸doi mian mobataani doi Naperjanjian, tukon komo setia lakukene Konaparenta.

¹⁹Ko TEMENENO naparenta doi surgaa, Yana tomundo mokuasai kalangge sasaibino.

²⁰Ponggaalekai ko TEMENENO, eh Namalaekat-malaekat mobarani, komolengele tukon molakukene Konaparenta.

²¹Ponggaalekai ko TEMENENO, eh sasaibino komahluk doi surgaa, sasaibino Konaata molakukene Konamongiasan.

²²Ponggaalekai ko TEMENENO, eh sasaibino komo pinasitaka doi posaapon Konalipu kinuasai. Eh konoanggu, nggaalekai ko TEMENENO.