Read Banggai SADEONG 104 Bible Online

SADEONG 104 - Banggai bible

SADEONG 104

¹Eh konoanggu, nggaalekai ko TEMENENO! oh TEMENENO daku Mian Bisa, tutuu Komu babasalan! Ikoo bapake pakean babasalan tukon taanggaan,

²tukon kolaango tombukiyo. Ikoo belekayo kotimbu pokakana kosandung,

³tukon Ikoo bangune Komu Bonua doi timbu paisuno bungkono. Kobunom-bunom Ikoo tealikene Mukereta, Ikoo lokitiyo kombombuul kapilo.

⁴Kombombuul kotealikene Mubito-bito, tukon kodidip Ikoo tealikene Mupeleleani.

⁵Tukon moonggol Ikoo abese kodunia doi naluwean, tobikon doiya aki naunggot tuuk posidutukon.

⁶Ikoo tombukiyomo tukon tobun dapango babasal, kopaisuno elembusomo kobunggul-bunggulo.

⁷Salaata Ikoo nggimoliiyo, dopaisudoo lomba, lomba makasang sabab alalo Nababasalan.

⁸Kopaisu lomba loloiyo kobunggul-bunggul doi pepelako lalomo, doi lipu Ikoo mosadiakene doiyana.

⁹Ikoo tantukenemo kokalalatan-kalalatano moaki namoola yana loloiyo, sulano naaki koikoidan nalembuse kodunia.

¹⁰Ikoo osumbate kopaisu matanodoi pepelako-pepelako, kopaisu batango pauno lombadoi na pokakalatanan kobunggul-bunggulo,

¹¹sulano sasaibino koiyayon doi asi namoola monginum, tukon kokeledai-keledai mosolot nambambul konamolouwan.

¹²Doi naloolanian kotomisi-tomisi mokubai telea; yanila mamakala doi kayung-kayung loono.

¹³Luwedoi timbu Ikoo obuluse koudan doi lipu bungkokon, moono kodunia tukon Mulimang hasilo.

¹⁴Ikoo tubekene kobulung sulano nateali iyayon nakaanan, tukon sasaibino kolangge motobu tuuk doi banggapi-kobanggapi. Maka kobangapi moola namasakakon,

¹⁵tukon olubatene koanggur paisuno mosanaanggene kobanggapi noano. Tukon koidan Zaitun lisisono motealikene lambongan koduduso, tukon kinaan mobeena yana bukuanan.

¹⁶Ko TEMENENO nakayung-kayung batango mbinotokii udan molobi-lobian tukon kokauwalu batango doi Libanoon Yana mosakakene susunggu mbinetokii koidan.

¹⁷Idoo kotomisi-tomisi mokubai telea, kotomisi ranggung mokubai telea doi tubono.

¹⁸Kobunggul-bunggul motatandak teali mbembe mosolot nadungolan; koasu labo basookon doi batu nggalanggang.

¹⁹Ikoo kubaiyo kobituwon teali paloosan kotempo, kooloyo matano toiyo kososopan.

²⁰Kalu olubatenemo kokalipookan, kooloyo kaputo, tukon sasaibino koiyayon mosolot sasabulo.

²¹Kosinga-singa motabokon ngangaaton moumbolii iyayon nakinaan, makabi kinaan Mian Bisa mosadiakenemo.

²²Kalu kooloyo matano sumbuto, yanila saakono tukon banggolinggon doi nalipu sapitan.

²³Maka tobuatokai kobanggapi sulano nalakukene konalimang, tukon banggadudul balimang polong pokinobianggon kooloyo.

²⁴Tutuu badaang Komulimang, TEMENENO, sasaibino Ikoo tealikene tukon pandoiyan; kodunia moono tukon Mulangge pinasitaka.

²⁵Kitayokai kotobuu motebeleaton bebelan, tukon sasaibino kolangge motubo babasal poipoisik akimo natangait.

²⁶ Idoo talabut kokapal-kapal, tukon Lewiatan, naga tobun Ikoo mopasitakayo namaemaenan.

²⁷Yanila sasaibino moinikene Ikoo, sulano namalaat kinaan doi tempono.

²⁸Ikoo beekene, tukon yanila pototongikene, Ikoo masadiakene, tukon yanila kaane polong pombambukon.

²⁹Kalu Ikoo totonggulung, yanila teali matakut; kalu Ikoo alayo konapo ansaang, yanila silaka kabus, tukon abali teali ambata buno doi tumbe.

³⁰Bai kalu Ikoo beena ansaang, yanila tinealikon koidan, Ikoo beena tuboan moboolu doi dunia.

³¹Boliisi ko TEMENENO Nababasalan natataap sidutu-posidutukon! Boliisi Yana nalaba tukon sasaibino komu pinasitaka!

³²Yana mbalenge kodunia tukon kubaiyo lolondong, kobunggul-bunggul Nadumboyo, tobikon sumbot kotibolungo.

³³Kalu yaku daanoon motubo yaku manyanyikene konyanyian motuuk doi ku Mian Bisa.

³⁴Boliisi daku nyanyian napokokoniy doiya-Na, sabab Yanamo komo kubaiyo laba konoanggu.

³⁵Batadikenemokai komian mobaladosa nalapus doi dunia bungguno, batadikenemokai komian molokis nakabus silakaa. Eh konoanggu, nggaalekai ko TEMENENO! Nggaalekai ko TEMENENO!