Read Banggai SADEONG 106 Bible Online

SADEONG 106 - Banggai bible

SADEONG 106

¹ Ponggaalekai ko TEMENENO! Basukuurkai doi TEMENENO, sabab Yana monondok; Kona maasi tataap sidutu-posidutukon tukon akiyo Kona pupusan.

²Indee komo moola babilitakene ko TEMENENO nabarania, tukon mebee nggalano molayak doiyana?

³Kinatauwankai komian motaatiyo Konaparenta-parenta tukon sidutu benar doi natindakan lalomo.

⁴Nonookakukai, oh TEMENENO, demi Mumonondokan doi Muumat tulungiyakukai koidan kalu Ikoo salamatene yanila.

⁵Boliisi kukitayo konasanaangan konatuboan Komu mian linilik tukon lalaba tuuno posinggat Komu mian. Boliisi kubabanggaal tukon laba tuuno posinggat komian motealimo koo-Mu.

⁶Kami baladosamo pokakana komai mbumbu; kami mokubaimo lokis tukon akimo mai taat doi TEMENENO.

⁷ Doi tempo komai mbumbu nadaanoan doi Mesir aki napo mangalati; Komulimang mominasaindinggon aki napo pahamiyo. Yanila toliminggenemo Komumaasi molobi-lobian, tukon doi naloolania, ko Tobun Gelagah yanila nggimoliiyo komo Babasal Konakuasa.

⁸Bai ko TEMENENO salamatene yanila tukon butongo susuungo; sulano Konabaranian nateali totoy.

⁹ Luwedoi Naparenta ko Tobun Gelagah teali motuul, Yana babayo Kona mian loloiyo ko tobun, pokakana mololoiyo kopadang lalomo.

¹⁰Tukon buno doiya yanila sinalamatono luwedoi napo lawan limano, yanila Inopulut luwedoi musuh nakuasa.

¹¹Bai kopaisu otumbule konapo lawan; akiyokai komeeng komian mototinggal.

¹² Maka Kona mian aggayomo Kona perjanjian tukon manyanyikene konggaalano doiya-Na.

¹³Bai mosobit konapo tolimingganano ko TEMENENO nakokubai tukon yanila mokokubai tindakan aki napo makabi otunggul.

¹⁴ Doi padang lalomo konoanoila dinorong, tukon sobaiyo ko Mian Bisa.

¹⁵Yana beekene oila konapo kinabi, bai koidan kosesel mobaladanggit lubotiiyo yanila.

¹⁶ Doi padang lalomodoo masakit konoanoila doi Musa tukon doi Harun Napeleleani momoliyous.

¹⁷Maka kodunia tabata tukon lemese Datan, atombulee Abiran tukon kona kaluarga.

¹⁸Koaung bulus lalakene konapo kolompok, okopule sasaibino komo akimo nataat doi TEMENENO.

¹⁹ Doi Sinai Bunggulo yanila kubaiyo kosapi pauno luwedoi mosoni, tukon yanila sosubaiyo dosapidoo pauno moluwedoi mosoni.

²⁰Yanila soboliyo ko Mian Bisa mobabasal tukon sapi pakaan bulung.

²¹Yanila tomilinggenemo ko Mian Bisa mosalamatene yanila molapamo lakukanggene kolangge-langge mobabasal doi Mesir.

²²Tutuu lokis Kona kokubai-kokubai doi tanodoo, doi Tobun Gelagah minasanindinggon konatindakan.

²³Maka ko Mian Bisa batetel moakateyo kabus Konamian, Musa donamian linilik, aki Napataikene. Musa teali napo pangantara, tobikon doiya ko Mian Bisa nanggimalan teali tade.

²⁴ Doibundu yanila tolake dotanodoo momonondok, sabab akimo napo anggayo ko Mian Bisa Naperjanjian.

²⁵Yanila bantil-bantil nggimal doi napo sandung lalomo tukon aki napo yase lengele ko TEMENENO alalo.

²⁶Maka Yana berjanji tukon totopi naikon akateyo yanila doi padang gurun.

²⁷ Konapo katurunan naikon sinakukon doi sasaibino kobangsa-bangsa tukon pinobabandakon doi tano-tano bailon.

²⁸ Salataa yanila daanomo doi Peol yanila sombaiyomo ko Pilagat, tukon makaano sosubakon motuuk doi ila-ila.

²⁹Dokokubaidoo olubatene ko TEMENENO nanggimalan, tobikon doiya yanila linubotii sesel modanggit minatakuton tuuno.

³⁰Bai Pinehas mokubai tindakan hukume komosala, maka tademokai doseseloo mopaladanggit.

³¹Donakokubaidoo inakuai meeng kojasa doiyana, tukon tinanda sidutu-posidutukon.

³² Doi Meriba bubung-bubungo yanila tealikene ko TEMENENO nggimal, tukon donapo kokubaidoo tealikene susa Musa noano.

³³Yanila kubaiyo konoano aki nasanaang, tobikon doiya nabasilingan akimo nabapikir.

³⁴ Kobangsa-bangsa bailon aki napo akateyo kabus, pokakanamo ko TEMENENO napinarentakon.

³⁵Yanila tongo posombuli tukon dobangsa-bangsadoo, tukon moloingikon komian moaki natingoniyo ko Mian Bisa nakokubai kokubai.

³⁶Maka yanila sosubaiyo kopilogot-pilogot, tobikon doiya teali sabab luwedoi napo tuwongan doi dosa lalomo.

³⁷ Yanila tealikene silaka konapo laulabuk doi Kanaan miano napilogot-pilogot.

³⁸ Yanila opuute komian mookiyo kona sala sauno, napo pau-pau susunggu sauno tuuk teali sosuba doi pilogot-pilogot; tobikon doiya dotanodoo yanila kulokisanggenemo.

³⁹Sabab donapo kokubai-kokubaidoo yanila teali lokis, tukon akimo nataatiyo ko Mian Bisa.

⁴⁰ Maka ko TEMENENO nanggimalan kolot tuuk doiyanila, Yana usok tukon namian linilik susungo.

⁴¹Maka yanila sinalaakanggono doi bangsa-bangsa. Yana batadikenemo napo kinuasai musu.

⁴²Maka konapo musu-musu lailainggemo yanila, tukon yanila kinuasaimo.

⁴³Moimoiya luungon ko TEMENENO naolupute yanila, bai yanila tongo nggimal momeenggon, tobikon doiya yanila mate kabus doi napo dosa-dosa lalomo.

⁴⁴Bai ko TEMENENO lengele konapo nggeleamonan, yana perhatikanggene konapo susaan.

⁴⁵Sabab yanila yana neneeke kona palaandandian tukon namaasi babasal yana seseange yanila.

⁴⁶Yana kubaiyo napo sineseang luwedoi sasaibino komian motaane yanila.

⁴⁷ Oh TEMENENO komai Mian Bisa, salamatene kami, pototongikanggamimokai luwedoi bangsa-bangsa, sulano mai basukuur tukon ponggaalekai Kosambuno momoliyous.

⁴⁸Ponggaalekai ko TEMENENO, Israel miano na Mian Bisa, diabudodo tukon sidutu-posidutukon. Batadikenemokai sasaibino komian nabantile, “Amin!” Ponggaalekai ko TEMENENO!