Read Banggai SADEONG 107 Bible Online

SADEONG 107 - Banggai bible

SADEONG 107

¹ “Basukuurkai doi TEMENENO sabab yana monondok, Kona maasi sidutu-posidutukon tukon akiyo konapupusan.”

²Poulang-ulange kopobantilano doiya, eh komuyu mosinalamatono luwedoi susaan.

³Komuyu pinototongikono luwedoi tano-tano bailon, luwedoi tolopot tukon talise, lembet tukon lalom.

⁴Daano komo lausala doi padang moluas, tukon akimo toiyo kololoon mosuutiyo kodungolan doi Kota.

⁵Yanila malaal tukon molou tukon lapus sasaibino Konamian.

⁶Doi susaan lalomo yanila uwang doi TEMENENO, tukon Yana oluputemo yanila luwedoi todopitan.

⁷Yana taaniyo yanila mololoi loloon momoloyos doi tampat dungoliano kokota.

⁸Pantasokai napo basukuur doi TEMENENO sabab namaasi, tukon koidan konalimang-limang banggapi mo masaindinggene.

⁹Sabab Yana akambule komian momolou, tukon lobiyoniyo kinaan komian momalaal tukon sasaibino komo monondok.

¹⁰Daano komo papanggung doi kalipookan lalomo, komian motinauan mosusa doi papanga besi lalomo,

¹¹sabab yanila nggimoliyo ko Mian Bisa tukon aki napopusinggon Komo Babasal Konakuasa.

¹²Yana akamanase konoanoila tukon balimangan mobabalat, yanila tuwong tukon akiyo komo tulungiyo.

¹³Doi susaan lalomo yanila uwang doi TEMENENO, tukon Yana olupute yanila luwedoi napo todipotan.

¹⁴Yana tobuatene yanila luwedoi nakalipookanan, tukon Yana lotoyo kopapangano yanila.

¹⁵Pantasokai napo basukuur doi TEMENENO sabab Namaasi, tukon koidan Konalimang-limang ko banggapi momasaindinggene.

¹⁶Sabab Yana lubange mo ko tataapon-tataapon tambaga, tukon manase koposupat-posupat besi.

¹⁷Daano komo ponga tukon susa sabab napo dosa-dosa, tukon sinakisaa sabab napo kasalahan.

¹⁸Yanila modoko doi sasaibino kokinaan, sabab konapo ajal loolanimo.

¹⁹Doi susaan lalomo yanila uwang doi TEMENENO, tukon oluputene yanila luwedoi napo todipotan.

²⁰Tongo tukon naparenta yanila tangalin, tukon oluputene yanila luwedoi kibul liango.

²¹Pantasakai napo basukuur doi TEMENENO sabao namaasi, tukon koidan Konalimang-limang kobanggapi momasaindinggene.

²²Batadikenemokai napo basukuur tukon mababa sosubakon, tukon napo babilitakene Kona kokubai tukon lagu laba-labaan.

²³Daano koidan komo pintosiiyo kotobun tukon kapal, sabab mangambakene konatuboan doi tobun mobebelan.

²⁴Yanila kitayo ko TEMENENO nakokubai kokubai, Konalimang mominasaindinggon doi tobun dapango.

²⁵Kosokoy puul tongo tukon Naparenta tukon tealikene babasal tuuno kobokol-bokolo.

²⁶Kokapal-kapal toluwanggon tatandak doi dapang, maka natapapanggon doi tobun dapango. Komian lapus konabaranian mosasalaane kobahayadoo mobabasal.

²⁷Yanila pusing tukon tonggoinggolinggon domba-dosumai pokakana komian momalangu tukon lapuso konaakal.

²⁸Doi susaan lalomo yanila uwang doi TEMENENO, tukon Yana oluputenemo yanila luwedoi napo todipotan.

²⁹Kosokoy babasal tuuno Yana moola naatadeyo, tukon kobokol-bokolkai teali molino.

³⁰Yanila sanaango sabab kosokoy babasal tuuno lapamo lapa; Yana babayomo doi polabuhan mopinakatuu.

³¹Pantasokai napo basukuur doi TEMENENO sabab namaasi, tukon koidan Konalimang-limang kobanggapi momasaindinggene.

³²Yanila babotilanggene ko TEMENENO nababasalan doi Namian tanga-tangano, tukon nggaale Yana doi orang-orang tua napomeenggonan lalomo.

³³Yana boliiyo kopaisu-paisubatango teali padang lalomo kopaisu matano teali buta motuul.

³⁴Kobuta mosubur Yana tealikene padang momotono, sabab komian modungoliyo nakulokisan.

³⁵Kopadang lalomo momotuul Yana boliiyo teali paisu lelang, kobuta momotuul teali paisu matano.

³⁶Komian-mian momalaal Yana abese indaa; yanila mongokkondong kota tuuk napo dungolan.

³⁷Koasi-asi yanila tiposiiyo kolibuang tukon masakakon anggur batango, yanila mokombulo kohasil molobi-lobian.

³⁸Ko TEMENENO beena yanila pau mobadaang, tukon konapo iyayon banggadudul kolibuang badaang.

³⁹Bai yanila linunggui tukon baino soisik komototinggal sabab sakisaa tukon napolinailainggonan motodudul lokis.

⁴⁰Ko TEMENENO totulaiyo sasaibino kona penguasa, tukon sumboliiyomo yanila molausala doi padang lalomo momosoloton moakiyo kololoono.

⁴¹Bai komian motalalais inoluput luwedoi napo susaan, kopulinoila sosungi pokakana kodomba tambuno mo badaang.

⁴²Komian momoloyos konoano yana kitayo tukon labalaba, bai komian molokis kinukupo kobabano.

⁴³Boliisi komian mopandoy napikikene sasaibino dolanggedoo tukon napo akuiyo baikon ko TEMENENO tataap seseange konamian.