Read Banggai SADEONG 109 Bible Online

SADEONG 109 - Banggai bible

SADEONG 109

¹Tuuk mokatuaiyo konyanyian. Daud na Sadeong. Oh Mian Bisa mosidutu kunggaale, inaikai motongo batingaakon.

²Sabab komian molokis tukon mopanipu lubat tukon lobosiyaku mobabilitakene kosalita-salita kaliangano mokala doi yaku.

³Yanila lubat lobosiyaku tukon bantilan-bantilan momoono mosikitan, tukon lobosiyaku akiyo konaalasan.

⁴Yanila tuduwaku, maukai kuseseange yanila, tukon maukai kusambeanggenemo yanila.

⁵Yanila balase daku monondokan tukon kulokisan, tukon daku seang balase mosikitan.

⁶Odudukemokai komeeng komian molokis sulano naadiliyo yana, batadikenemokai kona lawan natuduwo yana doi hakim salaano.

⁷Batadikenemokai nainadili tukon natontong konasala, tukon batadikenemokai konasambeang tongo inaanggon dosa.

⁸ Batadikenemokai konatuboan namosobit pupus, tukon konatugas mian bailon naalayo.

⁹Batadikenemokai konapau-pau nateali tuboon, tukon konaboloki nateali balu.

¹⁰Batadikenemokai konapau-pau nateali mian baikaikabi molausala, tukon siniika luwedoi nabonua natabaakan.

¹¹Batadikenemokai sasaibino konalobo kopatagi samea nasitayo, tukon konalimang hasilo mian bailon lambasemo.

¹²Inai nadaano komo monondok konoano doiyana, kai moseseange konapau-pau mootinggalemo.

¹³Batadikenemokai konambumbu nakulokisan nainakate kabus, tukon kosambuno komian motubu doibundu natoliminggenemo.

¹⁴Batadikenemokai konambumbu nakulokisan ko TEMENENO nataap neneeke, tukon kotinano nadosa aki nainapusanggon.

¹⁵Batadikenemokai konapo dosa ko TEMENENO nasidutu neneeke, tukon akiyo komo tandandayo yanila doi dunia.

¹⁶Sabab do mianoo aki nabiasa neneeke kookitakonano komasi tukon seang. Yana sakisaayo komian motalalais tukon mosakisaa, tukon akateyo komian moakiyono konadaya.

¹⁷Yana yase momokutuk; batadikenemokai yana susungo nakanakon kutuk! Yana aki nayase mebee balakaat, batadikenemokai naakiyo kobalakaat motuuk doiyana!

¹⁸Doiyana dokutukoo tongo kokubai mobiasa tolong, tongo buno pokakana konakonoikanano konapakean. Batadikenemokai dokutukoo natulo buno paisu doi butongo, tukon pokakana kolisison doi buku-bukuno.

¹⁹Batadikenemokai dokutukoo natombukiyo yana pokakana kopakean, tukon nasidutu gagese yana pokakana kopokoot mianowako.

²⁰Oh TEMENENO, otuwengemokai dohukumanoo doi motuduwaku, luwedoi mian mobasilingan lokis doiyaku.

²¹Bai tulungiyokai pokokonoy Komu janji, oh TEMENENO ku Mian Bisa, salamatanakukai sabab komu monondokan tukon museang.

²²Sabab yaku talalais tukon sakisaa, tukon konoanggu pokolon tuuno.

²³Adukon yaku lapus pokakana kolangge mbombokouno doi nakinobianan, yaku tinipason pokakana kobetek.

²⁴Kotuulonggu lolondong sabab yaku apata, kobutonggu teali molisuk motuul.

²⁵ Komian mokitaaku totulaiyaku tukon sua-sualilinggene kooluno.

²⁶Tulungiyakukai, oh TEMENENO daku Mian Bisa, salamatanakukai pokokonoy tukon Mumaasi.

²⁷Maka daku musuh naikon toiyo baikon doiya Mukokubai, baikon Ikoo, TEMENENO, komo lakukanggene.

²⁸Maukai napo kutukaku, boliisi Ikoo mubalakaatiyoku. Maukai napo kokondong molawanaku, bai yanila naikon komo mamaa; bai boliisi yaku, namu atania, natinealikon labalaba.

²⁹Batadikenemokai komian motuduwaku natinutupi pototulay, tukon rasaiyano komamawan natombukiyo yanila pokakana ko jubah.

³⁰Yaku yase monggaale ko TEMENENO tukon alalonggu mobabasal, tukon babilitakene Yana doi mian napototongian tanga-tangano.

³¹Sabab yana belayo tukon salamatene komian motalalais luwedoi yanila mootuwongikene kohukuman mate doi mian motalalaisoo.