Read Banggai SADEONG 118 Bible Online

SADEONG 118 - Banggai bible

SADEONG 118

¹Basukuurkai doi TEMENENO sabab Yana monondok, Konamaasi sidutu-posidutukon.

²Siokai ko Israel miano nabantile, “Konamaasi sidutu-posidutukon.”

³Siokai sasaibino koimam nabantile, “Konamaasi sidutu-posidutukon.”

⁴Siokai nasasaibino komian motaat nabantile, “Konamaasi sidutu-posidutukon.”

⁵Doi kususaan lalomo yaku uwang doi TEMENENO; tukon Yana timbiliyaku maka naoluputaku.

⁶Aki kulolondong sabab ko TEMENENO lolaingaku, kobanggapi akiyo kona kubaiyano yaku.

⁷Ko TEMENENO lolaingaku tukon tulungiyaku, tukon yaku kitayo daku musuh molinungguimo.

⁸Tadukai nasoop doi TEMENENO, kalubaino kita moinikene kobanggapi napotulung.

⁹Tadukai nasoop doi TEMENENO, kalubaino kita moinikene kobanggapi moinodotii natulungan.

¹⁰Badaang komusuh moboilingiyaku; bai yaku lungguiyo yanila, tukon TEMENENO nakuasa.

¹¹Luwedoi sasaibino kotampat yanila lubat molobosiyaku; bai yaku lungguiyo yanila, tukon TEMENENO nakuasa.

¹²Pokakana koani konapo tokuuniano yaku; bai yaku lungguiyo yanila, tukon TEMENENO nakuasa. Doi sopiyoman lalomo yanila pinosoi pokakana kobilat molalakene komosolot.

¹³Bolikon langge daku linobosian tukon adukon yaku tuwong, bai ko TEMENENO tulungiyaku.

¹⁴Tongo TEMENENO daku moinian tukon daku inangga, sabab Yana salamatanakumo.

¹⁵Doi Namian nasandung-sandung, longol konapo wookonan sabab napo manaangan, “Ko TEMENENO lakukanggene kokokubai mobabasal tuuno!

¹⁶Tukon TEMENENO nakuasa beena kita manaangan! Tukon koidan ko TEMENENO lakukanggene kokokubai mobabasal tuuno!”

¹⁷Aki naikon kumate, bai tataap yaku tubo sulano kubabilitakene ko TEMENENO nakokubai.

¹⁸Ko TEMENENO sakisaakumo tuuno, bai aki Nasobiiyaku momate.

¹⁹Bukayo ko TEMENENO Na Bonua tataapono mobabasal, sulano kuusok tukon basukuur doiya-Na.

²⁰Naiyamokai ko TEMENENO natataapon mobabasal, tongo mian momoloyos konoano komo moola loloiyo.

²¹Yaku nggaale Ikoo, sabab Ikoo daanekenemo daku sambeang; tukon Ikoo lapamo beenggu manaangan.

²²Kobatu tukang-tukang bangunan mosakukene, tealimo batu pasuno doi posaapon kotampat.

²³Doiyamokai ko TEMENENO nakokubai, tutuu kita masaindinggene.

²⁴Naiyamokai kooloyono ko TEMENENO mo tantukanggene; mai nda lamekene tukon laba-laba.

²⁵TEMENENO, kami kabiyo, salamatanggamikai, oh TEMENENO, beenggamikai kamanangan!

²⁶Binalakaatikai yana mo lubat luwedoi TEMENENO sambuno, tukon kami balakaati komuyu doi TEMENENO Na Bonua.

²⁷Ko TEMENENO doiyamokai ko Mian Bisa, Yana momonondok konoano doi kita. Poambakon polaing-laing tukon pomataani kayung langa-langano tukon poboilingiyokai ko TEMENENO nabalabaan.

²⁸Ikoo daku Mian Bisa, yaku basukuur doi-Koo, tukon Ikoo daku Mian Bisa yaku akabasale Ikoo.

²⁹Pobasukuurkai doi TEMENENO sabab namonondokan, Konamaasi sidutu-posidutukon.