Read Banggai SADEONG 119 Bible Online

SADEONG 119 - Banggai bible

SADEONG 119

¹Untungokai komian mo tubo moakiyo konasala tukon taatiyo ko TEMENENO naukum-ukum.

²Untungokai komian mo loingiyo Konaparenta tukon totubo konoano mokakaate sulano natingoniiyo ko TEMENENO.

³Untungokai komian motubo motulutiyo ko TEMENENO namongiasan, tukon moaki nalakukanggene kokulokisan.

⁴Komu ukum Ikoo beenggami, oh TEMENENO, sulano mai lakukanggene mono-monondok.

⁵Boliisi tukon noanggu momoonggol namoola kuloingiyo Komu atu-aturan.

⁶Kalu yaku palatikanggene sasaibino Komu parenta, aki naikon komian namokubaiyanggu maa.

⁷Kalu yaku palajario Komu kaputusan mo adil, yaku nggaalon Ikoo tukon noanggu momoliyous.

⁸Yaku taatiyo Komu ukum, tobikon doiya inai mootinggalaku.

⁹Komian motabokon moola dagaiyo konatuboan sulano naakiyo konakasalahan kalu yana tubo tulutiyo Komu parenta.

¹⁰Tukon tootubo konoanggu mokakaate sulano kutingoniiyo Ikoo, tobikon doiya inai mosobiiyaku moisa luwedoi Muparentadoo.

¹¹Komu otunggul yaku abese doi noanggu lalomo, sulano naaki kubaladosa doi-Koo.

¹²Oh TEMENENO, yaku nggaalon, otunggulikanaku Komu katatapan.

¹³Babasal tuuno koalalonggu mopopitoikene sasaibino koukum Ikoo mo beekanaku.

¹⁴Yaku laba moloingiyo Komu parenta-parenta, pokakana yaku mototooli sasaibino kobuat kaliangano.

¹⁵Yaku yase mopalajariyo Komu kaputusan-kaputusan, tukon perhatikanggene Komu otunggul-otunggul.

¹⁶Komu katatapan kubaiyaku sanaang; Komu otunggul aki kutoliminggene.

¹⁷Boliisi nasanaang konoamu doi Mupeleleani nia, sulano kutataap tubo tukon taatiyo komu otunggul.

¹⁸Bukayo komatanggu sulano namoola kumokita Komu otunggul mo minasaindinggon doi Muukum lalomo.

¹⁹Aki namalumbit daku dungolan doi dunia nia, tobikon doiya inai moseekene Komu ukum doiyaku.

²⁰Masakit konoanggu sabab kupoloonan, yaku yase motoiyo Komu ukum sasamba kotempo.

²¹Ikoo anuukene komian mo bangga-banggaal, tukon kutuke komian moisa luwedoi Muparenta.

²²Osobiiyakukai luwedoi napo pototulai, sabab yaku lakukene Komu parenta.

²³Maukai nasasaibino kosambu napomeenggon molawanaku, bai komu peleleani nia tongo tataap pikikene Komu katatapan.

²⁴Komu aturan-aturan doiyamo komo otunggulaku tukon sanaanggene konoanggu.

²⁵Yaku bangokoolo doi ambata lalomo; tobikon doiya abalinggene dakutuboan pokokonoi komu perjanjian.

²⁶Yaku akuiyo daku kokubai, tobikon doiya Mutimbiliyaku; tukon otunggulikanaku Komu katatapan.

²⁷Tulungiyakukai sulano kutoiyo Komu ukum-ukum, tukon Komu otunggul mominasaindinggon yaku naikon pikikene.

²⁸Daku tuboan susa tuuno sabab tinepak susaan mobabasal, tobikon doiya okoonggolaku pokokonoi Komu perjanjian.

²⁹Dodongganakukai doi loloon mo tapa komian, tobikon doiya luwedoi Mumonondokan, otunggulikanaku Komu ukum.

³⁰Yaku lapamo piliyo kotaatan, tobikon doiya Komu parenta yaku neneeke momeenggon.

³¹Lapamo kuloingiyo Komu aturan-aturan, sabab doiya oh TEMENENO, inai mobatadikanaku momalaat maa.

³²Tukon sanaang yaku naikon tulutiyo Komu parenta, sabab Ikoo tealikanakumo momangalati tuuno.

³³TEMENENO, otunggulakukai Komu katatapan-katatapan alatino, sulano kuloingiyo napolong popupuson.

³⁴Tealikanakukai momangalatikene Komu ukum sulano kutaatiyo, sulano kulakukanggene tukon totubo konoanggu.

³⁵Boliisi kubataani namoonggol doi Muparenta, sabab doiyamokai daku iniyas.

³⁶Beenggukai kamauan sulano kutaatiyo Komuparaturan, moliisiyo daku iyasano moteali kaasa.

³⁷Dagaiyakukai sulano naaki kumongotunggul kolangge mo akiyo kotakoso, beenggukai tuboan mopokokonoi tukon Komu mongiasan.

³⁸Komu perjanjian sio Muekeenggele doi Mupeleleani nia, Ikoo mobeekenemo doi mian motaat doi-Koo.

³⁹Dedeenggenekai kopototulai yaku mo matakutene, sabab tutuu konamonondokan Komu ukum.

⁴⁰Beenggukai tuboan mosoodo, sabab Ikoo adil, tukon yaku yase motaatiyo Komukaputusan-kaputusan.

⁴¹Oh TEMENENO, tudoikanakukai bulaando Komuseangano yaku, tukon salamatakukai pokokonoi tukon Muperjanjian.

⁴²Sulano namoolakai kutimbiliyo komian mototulaiyaku sabab yaku balaanggene Komubantilan.

⁴³Tulungiyakukai sulano kusidutu bantile komokana, sabab dakumoinian tongo doi Mukaputusan.

⁴⁴Yaku yase bataani doi Muukum, tuuk sidutu-posidutukon.

⁴⁵Sulano naikon kutubo tukon aman, sabab yaku kakaate tuuno motulutiyo Komuotunggul.

⁴⁶Komuaturan yaku naikon pelenggene doi tomundo-tomundo, tobikon doiya aki naikon kumalaat maa.

⁴⁷Dakusanaangan tongo lakukanggene Komuparenta, sabab tongo doiya dakukinilakon.

⁴⁸Yaku odotiiyo tukon kilakene Komuparenta, Komu katatapan sio kupikikene.

⁴⁹Neneekekai Komu perjanjian doi Mupeleleani nia, perjanjian mobeenggu moinian doiyaku.

⁵⁰Naiyamokai komobeenggu tanaangan doi kususaan lalomo, baikon Domuperjanjianoo beenggu tuboan.

⁵¹Komian mo babanggaal totulaiyaku tuuno, bai aki kuisa doi Muukum.

⁵²Yaku tataap neneeke komuukum modaanomo salataa doi looluk, tobikon doiya konoanggu tataap tanaang, oh TEMENENO.

⁵³Doi mian mo lokis yaku nggimoliiyo tuuno, sabab yanila tinggalemo Komuukum.

⁵⁴Dakutuboan mo aki namalumbit doi dunia nia, Komu katatapan yaku tealikene sasadoyong nggaalano doi-Koo.

⁵⁵Oh TEMENENO, doi napopookan tempono yaku neneeke doi-Koo, sabab Komu ukum yaku tataap taaniyo.

⁵⁶Yaku malaat kauntungan doi taatiyano komuparenta-parenta.

⁵⁷Tongo Ikoo tolong daku iniyas, oh TEMENENO, tobikon doiya yaku berjanji naikon molakukanggene Komuotunggul.

⁵⁸Tukon tootubo konoanggu momakabi Mumaasi, tobikon doiya seseangakukai pokokonoi Domuperjanjianoo.

⁵⁹Yaku pikikenemo dakukalakuan, tobikon doiya yaku berjanjimo motaatiyo Komuaturan.

⁶⁰Yaku bato-batotobomo tukon moso-mosobit tukon akimo kumototiili malumbit, moambakonggene Komuparenta.

⁶¹Komian mokulokis pukataku, bai aki kutoliminggene Komukum.

⁶²Pintanga kopopook yaku bangun monggaale Ikoo, sabab Komukaputusan-kaputusan mo adil.

⁶³Dakuposobatan tongo mian mo taat, tukon sasaibino komian molakukanggene Komuparenta.

⁶⁴Oh TEMENENO, kodunia moono tukon Mumaasi, tobikon doiya otunggulikanakukai Komu katatapan-katatapan.

⁶⁵Oh TEMENENO, Ikoo daanekenemo Komuperjanjian, tukon Ikoo kubaiyomo monondok doi Mupeleleani nia.

⁶⁶Beenggukai pikiran mosehat tukon motoiyan, sabab yaku anggayo doi Muparenta-parentadoo.

⁶⁷Akiyoon kuinukum, yaku isamo, budodoiya yaku bataanimo doi Muparenta.

⁶⁸Sabab Ikoo monondok tukon mokubai monondokan, otunggulikanakukai Komu katatapan-katatapan.

⁶⁹Komian mobabanggaal bapitanaakanaku, bai totubo konoanggu tongo taatiyo Komukaputusan.

⁷⁰Domianoo aki namangalati, bai doiyaku Domuukumoo doiyamo komo sanaanggene konoanggu.

⁷¹Takainomo tadukai Muukumaku, sulano kutingoniiyo Komu katatapan-katatapan.

⁷²Doiyaku Domuukumoo lobian koanggano, doi sasaibino komosoni tukon suasa doi dunia nia.

⁷³Ikoomokai komo kubaiyo tukon motealikanaku, tobikon doiya beenggukai pangalatian sulano kupalajariyo Komuparenta-parenta.

⁷⁴Komian mo taat naikon sanaang kalu nakitaaku, sabab yaku tongo moini Domuperjanjian.

⁷⁵Oh TEMENENO, yaku baikon toiyo Komukaputusan adil, Ikoo ukumakumo sabab Mukosetiaan.

⁷⁶Boliisi Komuseang nateali kumoonggolan, pokokonoi tukon Muperjanjian doi Mupeleleani nia.

⁷⁷Mamaasikanakukai, sulano kutataap tubo, sabab Komuukum kubaiyo sanaang konoanggu.

⁷⁸Batadikenemokai komian mo babanggaal nateali mamaa, sabab bapitanaakumo, bai yaku tataap pikikene Komuparenta-parenta.

⁷⁹Boliisi komian motaat nalubat doiyaku, tukon sasaibino komo tingoniiyo Komuparenta-parenta.

⁸⁰Boliisi konoanggu naaki naisa doi Mukatatapan, sulano naaki kumalaat maa.

⁸¹Konoanggu peloonggene tuuno kokasalamatan moluwe doi-Koo; tukon yaku moinikene Komuperjanjian.

⁸²Komatanggu nggulal mototiilikon sulano Mudaanekene Komuperjanjian, yaku bantile, “Oila kotempono naikon Komu oluputano yaku?”

⁸³Kokulitonggu mokukut pokakana kobangabosan anggur monggunggum, bai Komu katatapan aki kutoliminggene.

⁸⁴Polong doi oila kotempono Namupeleleani nia nasabaran? Oila kotempono naikon Komuukumano komian mololongganaku?

⁸⁵Komian mo aki natoiyo Komu ukum, makalimo bitu sulano natuwongaku.

⁸⁶Sasaibino Komuukum moola nabinalaanggon, tobikon doiya tulungiyakukai, sabab yaku linolonggon akiyo koalasan.

⁸⁷Baino soisik yanila akateyakumo, bai aki kuotinggale Komuparenta.

⁸⁸Salamatanakukai sabab Ikoo tataap meseseang, sulano kumoola taatiyo Komuukum.

⁸⁹TEMENENO, komufirman moonggol sidutu-posidutukon, tataap sidutu-posidutukon.

⁹⁰Komusotiaan bataanggon popupuson koloonu, Ikoo ekeenggele kodunia sampe tataap daano.

⁹¹Diabudodonia sasaibino komodaano, daano sabab Muparenta, sabab doiyaniladoo daanokai Mupeleleani-peleleani.

⁹²Kalukai andeno Domuukumoo bolikon kulabaan uuno, pasti yaku matemo doi sakisaawan lalomo.

⁹³Momeenggon akikai kutoliminggene Komuparenta, sabab tongo doiya Ikoo otuboiyaku.

⁹⁴Salamatanakukai, sabab yaku nia koomumo, sabab yaku kakaatemo motaatiyo Komukaputusan.

⁹⁵Komian mo lokis totiilimo sulano naakateaku, bai yaku tataap mopalatikanggene Komuukum.

⁹⁶Kukitayo baikon komo talakana doi dunia nia terbatas, tongokai Muparenta komo talakana.

⁹⁷Bulaando dakukilaano Komuukum; tobikon doiya yaku pikikene popupuson kooloyo.

⁹⁸Komuparenta sidutu kuneneeke, sabab tealikanakumo pandoi liisiyo daku musuh-musuh.

⁹⁹Dakupangalatian liisiyomo dakuguru-guru napangalatian, sabab tataap kupikikene Komuparenta-parenta.

¹⁰⁰Dakupamahaman liisiyo koorang-orang tua napamahaman, sabab yaku tataap motaaniyo Komukaputusan-kaputusan.

¹⁰¹Kudedeenggene sasaibino kokalakuan mo lokis, sulano kutaat doi Muotunggul.

¹⁰²Aki kuotinggale Komuukum, sabab Ikoomokai komo otunggulaku.

¹⁰³Bukan maen kona maamisan Komu bantilan, kotamiso liisiyo kodokot konamaamisan!

¹⁰⁴Komuukum-ukum beenggu pangalatian, sampe yaku mosikitene kokalakuan mo lokis.

¹⁰⁵Komufirman teali dial doi kulaakonan, taraang motaraangiyo daku loloon.

¹⁰⁶Daku pinarjanjikon tukon batotopian yaku naikon tapaatiyo, sulano kubataani doi Mukaputusan-kaputusan mo adil.

¹⁰⁷Oh TEMENENO, yaku sakisaamo tuuno, dagaiyokai dakutuboan tukon Muperjanjian.

¹⁰⁸Oh TEMENENO, talimayokai dakusambeang basukuuran, tukon otunggulikanakukai Komu ukum-ukum.

¹⁰⁹Sidutu kubataanggene dakutuboan, bai aki kutoliminggene Komuukum.

¹¹⁰Komian mo lokis talongganaku, bai aki kuisa doi Mukaputusan.

¹¹¹Komuparenta teali ku pusaka sidutu-posidutukon, mokubaiyo laba konoanggu.

¹¹²Yaku yase motaatiyo Komu katatapan, polong doi napupusan dakutuboan.

¹¹³Yaku kilakene Komuukum-ukum, tobikon doiya yaku mosikitene komian mo aki natootubo setia doi-Koo.

¹¹⁴Ikoomokai daku pombela tukon dakusoopan, sabab doiya yaku tongo moini doi Muperjanjian.

¹¹⁵Eh komian mo lokis, badodoonggonkai doi yaku! sabab yaku yase motaatiyo daku Mian Bisa naparenta.

¹¹⁶Kobukuangganakukai pokokonoi tukon Muperjanjian sulano kutubo, inaikai mobatadikanaku momanasal doi kumoinian lalomo.

¹¹⁷Tumbakakukai sulano kusalamat, tukon sulano nasidutu kupalatikanggene Komuparenta.

¹¹⁸Ikoo tolake komian mo isa luwedoi Mukatatapan, tongo sia-sia konapo batipuan.

¹¹⁹Sasaibino komian mo lokis tongo ikoo aanggene peeput, tobikon doiya yaku kilakene Komuparenta-parenta.

¹²⁰Yaku lolondong sabab kumatakutanano Ikoo, tukon konoanggu lendeng tuuk doi Mukaputusan.

¹²¹Yaku lakukanggene komo adil tukon mo kana, sabab doiya inaikai mosalakangganaku doi kulawan limano,

¹²²Paladandimokai baikon Ikoo naikon tulungiaku, tukon inai mobatadikanaku komian mo babanggaal nalailaingganaku.

¹²³Moonas komatanggu momototiili Mupotulung mosalamatanaku, tukon yaku mototiili pongoluput Ikoo mo perjanjikenemo.

¹²⁴Lakukanakumokai pokokonoi tukon Mumaasi, tukon otunggulikanakumokai Komu katatapan.

¹²⁵Yaku nia mupeleleani, kubaiyakumokai momangalati sulano kupahamiyo Komuparenta.

¹²⁶TEMENENO, laatemo kotempono Komu mokubaiyan tindakan, sabab komian lumbaiyomo Komuukum.

¹²⁷Dakuiyasano Komu parenta-parenta liisiyo komosoni, tukon liisiyo komosoni mo tulen.

¹²⁸Tobikon doiya yaku tubo pokokonoi tukon sasaibino Komu potudoikon; kokalakuan molokis yaku mosikitene.

¹²⁹Komuaturan-aturan tutuu mo minasaindinggon, tobikon doiya kutaatiyo tukon tootubo konoanggu.

¹³⁰Kalu binasalitakon, Komuotunggul taraang tuuno doi ndapikilan lalomo, tukon doi mian mo akinduung napandoi bai taraang doi noanoila.

¹³¹Pakandang konoanggu, sabab poloonggene Komuparenta.

¹³²Palosiakukai tukon mamaasikanakukai, pokakana Komu mamaasikanano komian mo kilakonggon.

¹³³Kobukuanggene dakulaakonan pokokonoi Komu perjanjian, inai mobatadikanaku kukinuasai kulokisan.

¹³⁴Oluputaku luwedoi mian mo lailaingganaku, sulano namoola kutaatiyo Komuparaturan.

¹³⁵Doi Mudaanoan balakaatiyakukai, tukon otunggulikanakukai komu katatapan.

¹³⁶Komatanggu paisuno lomba pokakana kopaisu lomba, sabab Komuukum aki natinaati.

¹³⁷Oh TEMENENO, Ikoo adil, sasaibino Komu ukum tapaat.

¹³⁸Koparenta-parenta Ikoo mobeekene adil tukon moola naminoinikon.

¹³⁹Dakunggimalan moonas buno bilat doibutonggu lalomo sabab dakumusu toliminggene Komuotunggul.

¹⁴⁰Komu perjanjian moonggol tukon moola nainangga, tobikon doiya yaku kilakene tuuno.

¹⁴¹Yaku nia poipoisik tukon akiyo kotakoso, bai yaku aki kutoliminggene Komuotunggul.

¹⁴²Komuadilan bataanggon sidutu-posidutukon, tukon Komuukum sidutu kana.

¹⁴³Yaku tinepak kasulitan tukon susaan, bai Komu katatapan kubaiyo laba konoanggu.

¹⁴⁴Komu aturan sidutu adil; tobikon doiya beenggukai pangalatian sulano kutubo.

¹⁴⁵Tukon tootubo konoanggu mouang doi-Koo; oh TEMENENO timbiliyakukai, sabab yaku yase motaatiyo Komuparenta.

¹⁴⁶Yaku uang doi-Koo; salamatanakukai, yaku yase mobataani doi Muparenta.

¹⁴⁷Dowa-dowa yaku bangun tukon uang makabi tulung, tukon yaku moinikene Komu perjanjian.

¹⁴⁸Pomodoakon daku badagaan, mopikikene Komuotunggul.

¹⁴⁹Oh TEMENENO, longolakumokai luwedoi Mumaasi, tukon luwedoi Muadilan dagaiyokai daku tuboan.

¹⁵⁰Loolanimo komian mo lolongganaku, konapo makasuut lokis tukon aki napopusinggene Komuukum.

¹⁵¹Bai Ikoo loolani, oh TEMENENO, sasaibino komu parenta kana.

¹⁵²Salataa doi looluk yaku toiyomo Komu otunggul-otunggul, bai Ikoo tataapkanggenemo tuuk sidutu-posidutukon.

¹⁵³Kitayokai daku sakisaawan tukon salamatanakukai, sabab aki kutoliminggene Komuukum.

¹⁵⁴Belayokai daku ulusan tukon oluputakukai; tukon salamatanakukai pokokonoi tukon Muperjanjian.

¹⁵⁵Komian mo lokis aki naikon nasinalamaton, sabab aki napo taatiyo Komu katatapan.

¹⁵⁶Oh TEMENENO, tutuu bisa Komu maasi, tobikon doiya salamatanakukai pokokonoi Komu adilan.

¹⁵⁷Badaang komian mo musuwaku tukon lolongganaku, bai aki kutoliminggene Komu paraturan.

¹⁵⁸Yaku mosikit tuuno kalu yaku kitayo domianoo mo lokis, sabab aki napo loingiyo Komu otunggul.

¹⁵⁹Oh TEMENENO, kitayokai bulaando daku kilakanano Komu parenta, tobikon doiya luwedoi Mumaasi salamatanakukai.

¹⁶⁰Sasaibino Komu bantilan kana, tukon sasaibino Komu ukum mo adil tataap sidutu-posidutukon.

¹⁶¹Komian mo berkuasa lolongganaku tutuu, bai tongo naukum daku minatakuton.

¹⁶²Komu perjanjian kubaiyaku laba, pokakana komeeng komian momalaat buat.

¹⁶³Sasaibino kobakakalaan kaliangano yaku mosikitene, bai Komu ukum yaku kilakene.

¹⁶⁴Yaku momeenggon basukuur doi-Koo, sabab Komuukum adil.

¹⁶⁵Komian mo kilakene Komuukum aman tukon sanaang konoano, akiyo komo moola halangiyo yanila.

¹⁶⁶TEMENENO, yaku totiiliyo kokasalamatan mo luwedoi-Koo, tukon Komu parenta-parenta yaku lakukanggene.

¹⁶⁷Yaku taatiyo Komu paraturan-paraturan, tobikon doiya yaku kilakene tukon tootubo konoanggu.

¹⁶⁸Yaku taatiyo Komu parenta tukon komu otunggul, tobikon doiya Ikoo sanaang mokitayo sasaibino dakukokubai.

¹⁶⁹Oh TEMENENO, boliisi daku uwangan napolong doi-Koo, tukon beenggukai pangalatian, pokokonoi tukon Komu perjanjian.

¹⁷⁰Boliisikai daku kakabi napolong doi-Koo, tukon salamatanakukai pokokonoi tukon Muperjanjian.

¹⁷¹Yaku yase monggaalon Ikoo momeenggon, sabab Ikoo otunggulikanaku Komu katatapan.

¹⁷²Yaku yase tuuno momanyanyikene Komu perjanjian, sabab sasaibino Komu parenta adil.

¹⁷³Boliisi konoa-Mu nasanaang motulungiyaku, sabab yaku nia lapamo loingiyo Komu parenta.

¹⁷⁴Konoanggu peleenggene kokasalamatan mo luwedoi-Koo, tukon Komu ukum tealikene laba konoanggu.

¹⁷⁵Batadikenemo kutubo, sulano kunggaalen Ikoo, tukon boliisi Komu katatapan-katatapan natulungiyaku.

¹⁷⁶Yaku tapa pokakana kodomba mo lapus, tobikon doiya siokai Mulubat, tukon umboliiyokai Namu peleleani nia, sabab akimo kupalatikanggene Komu parenta-parenta.